Krooniiki Gbɔnliliitiiku 27

Yootam beel bɔti

(Kpèè Bibɔtiibi 2 15.32-38)

1 Yootam nìn cáá abin mmuŋku nì aŋmoo ní ki kpántì ubɔti, ní ki kāl̀ Jeerusaleem ki jíń dibeel abin saalku nì diba. Bi nìn yíì u-na yii Yeerusaa, Sadooki bisal. 2 U nìn ŋá tin fáatiǹ ti-Dindaanee. U nìn pée ŋá kii u-baa Oosiyasi nín nìn ŋá puee ní deedee. Ama úǹ kaa nìn kɔ́ kunimbɔtidiin kii u-baayee. Samaa úǹ nìn pée gbíntì nìkì ki ŋáań ikpiti.

3 Úǹ di nìn máń kunimbɔtidii punyɔkɔki kin bí Yilpu púee, ní ki ŋáŋkì digundi din bi nìn máń ki tú Jeerusaleem tiŋkee Oofeel gbantaŋki pu. 4 U nìn máń ntimu Juuda jooŋŋi pu, ní ki máń agun ŋin boon bijanjaliibi bāal̀ee nì sintil difɔkɔŋi laakin isufi bí tikpilee.

5 Yootam nìn jáń nì Amɔn yab bɔtiu ní ki pɔ́ɔkiǹ-u. Dibindi gbantee, Amɔn yab nìn pàn̄-u lampoo animbil kúti tɔɔnib bita nì bilee tɔɔnib kutukub bita nì ɔɔji tɔɔnib kutukub bita. Dibinliliitiil nì dibintataatiilee, bi nìn gíti pàn̄-u lampoo míǹ mbaantiimin ní. 6 Yootam nìn ká mpɔn gbanti, kun puee u nìn yúl̀ nì ti-Dindaan u-Nimbɔtiu deedee.

7 Yootam tuuŋŋi ŋin kíǹee nì tijáti tin kɔkɔ u jáńee nì tin kɔkɔ u ŋáaǹee ŋmàn̄ ki kā Isirayeel yab nì Juuda yab bɔtiibi tuuŋŋi gbɔŋkun. 8 Yootam nìn cáá abin mmuŋku nì aŋmoo ní ki kpántì ubɔti ní ki kāl̀ Jeerusaleem ki jíń dibeel abin saalku nì diba. 9 Yootam kpíì ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Akaasi di fōō u-yil ki kpántì ubɔti.