Krooniiki Gbɔnliliitiiku 23

Joowaasi kpántì ubɔti

(Kpèè 2 Bib 11.4-20)

1 Dibinluluútiil poonee, ní Yooyadaa dàkā tininjati. U nì bijanjakpilib bin kpòotī bijanjaliibi dilaataal dilaataalee nìn ŋá kunyɔɔbaantii. Bíǹ di sá Yeeroowaam jipɔɔn Asariyawuu nì Yoowanan jipɔɔn Isimaayeel nì Oobeedi jipɔɔn Asariyawuu nì Adaaya jipɔɔn Maaseeyawuu nì Sikirii jipɔɔn Eeliisafaati. 2 Bi nìn yìin̄ Juuda timmu kɔkɔn ki kóoǹ Leefii yab nì Isirayeel dicaŋŋi kpilib ki kpáfì. Míǹ boonee ní bi nì bi táań ki gítì Jeerusaleem. 3 Samaa kɔkɔ nìn kóoǹ ki kpáfì ti-Dindaan Diikun ní bi nì ubɔti ŋá mpèé. Yooyadaa nìn bí-bi yii: «Ubɔti jipɔɔn sèé. U máaǹ kí jī dibeel kí nóó nì ti-Dindaan nín nìn pōoǹ Daafiidi naantiibi puee^a. 4 Ni nín làá ŋá puee sɔ̀. Bisaraaŋaliibi nì Leefii yab yaa dɔ́miń kí tɔ̄ ditundi ŋwiŋŋuŋfikaayee, bí ŋá akiti ata ní diba ń nīn cí kunimbɔtidii punyɔkɔki. 5 Dikitililiitiil làá nīn cí dibeecindi ní ditataatiil ń nīn cí Dinyeel punyɔkɔki. Samaa un kɔkɔ kíǹee làá nīn bí ti-Dindaan Diiku cindin. 6 Ubɔ kaa cáá nsan kí kɔ́ ti-Dindaan Diikun, see bisaraaŋaliibi nì Leefii yab baba. Bíǹ ŋūǹ kí kɔ́, di sá yii bi dū-bi ki sú ti-Dindaan ní. Samaa un kɔkɔ kíǹee máaǹ kí nīn ŋúb́ ti-Dindaan nín síiǹ puee kí nīn yú mmɔŋki. 7 Leefii yab làá màntīí tū ubɔti báà ŋma ń nīn ŋúb́ u-janjawanti u-ŋaan. Un yaa là kí ŋá mpɔn kí kɔ́née, bí kpɔ̀-u. Laakin kamaa ubɔti yaa cée, bí nīn bí u-cee.»

8 Leefii yab nì Juuda yab nìn ŋá kii usaraaŋakpil Yooyadaa nín nìn tīī-bi mara puee. Ukpil kamaa nìn yōoǹ u-nib, bin tundi nìn kífí ŋwiŋŋuŋfikaa dalee nì bin tundi nìn kúntí ŋwiin gbanti dalee, di sá yii Yooyadaa kaa nìn tīī báà dikitil diŋuŋfil. 9 U nìn tīī bijanjakpilib bin kpèé bijanjaliibi dilaataal dilaataalee ŋkpamu nì ubɔti Daafiidi gbampɔɔŋi ŋin bí a-ba a-ba ki nìn bí kunimbɔtidiinee. 10 U nìn yāntì bijanjaliibee kɔkɔ māntìi tú ubɔti ki ŋúb́ bi-janjawanti, ki kíĺ ti-Dindaan Diiku ŋgiil pú ki cáa sāā ŋgan pú, nsaraafan nì kunimbɔtidii caŋin. 11 Niinee Yooyadaa nì u-jipɔmbi nyántì Joowaasi. Bi nìn dū kibeefuulii ki cíkiǹ-u ní ki dū dipoondi taŋkpapilinti^b ki ŋúbiǹ-u. Boonee ní bi bātì ŋkpam ki sītì u-yil pu ki kāaǹ-u tibɔtiil ní ki téeń mpɔn yii: «Ubɔti ń nīn cáá mmaŋfafɔkɔn!»

12 Atalii nín gbìl̄ samaa wooku puee ní u nín cá ti-Dindaan Diiku watil pú, diniwul cee. 13 U kpēēyee, ubɔti di tɔ́kɔ́ ti-Dindaan Diiku nyɔkɔpu kɔl puee. Bijanjakpilib nì bikantámbunliibi nìn yú ki kɔ́ĺ-u. Samaa kɔkɔ nìn bí mmɔnni ní bikantámbunliibi búǹ akantán, ní bi bɔ̀ɔ́ tiwan ní bilaŋgaaliibi gà ilan. Niinee Atalii cúú tiwan tin u pēēyee ki dáaĺ ki cátì ní ki téeń yii: «Bi nyáń m-boon ní! Bi nyáń m-boon ní!» 14 Yooyadaa nìn nyántì bijanjakpilib bin kpèé bijanjaliibi dilaataal dilaataalee ki bí-bi yii: «Nyāntímaan-u doo! Un di yaa páaǹ u-boonee, bí kpɔ̀-u!» Di sá yii usaraaŋakpil nìn lī yii bí taa kpɔ̀-u ti-Dindaan Diikun doo. 15 Bi nìn cúú Atalii ní ki dáaĺ-u ki cūnnì kubɔtinaakoou watil pú, ní ŋyunti ŋun bi bàn̄ Itaamu punyɔkɔkee^c ní bi kūū-u niin.

16 Yooyadaa nì samaa nì ubɔti nìn ŋá mpèé ki pōoǹ kí nīn kíǹ ki sá ti-Dindaan nibul. 17 Niinee ní samaa kɔkɔ nín cá diwaal Baal diikun ki gbáń ki wīī-ku. Bi nìn gbáń ki wīī Baal saraafaŋyi nì ataŋkpee ŋin nìn bí niin bi tòotēe. Bi nìn kūū Baal tandaaŋwu Matan ki bíl̀ isaraafan nyɔkɔpu. 18 Yooyadaa nìn dū ti-Dindaan Diiku ki ŋúbiǹ bisaraaŋaliibi bin sá Leefii yabee^d bí nīn cí. Daafiidi nìn kpáfì-bi akiti akiti bí nīn ŋáań bisaraawɔkaabi ti-Dindaan Diikun, kii an nín ŋmàn̄ ki kā Mooyiisi marau poon puee. U nìn gíti kpáafì-bi yii bí nīn tūǹ ditundi gbanti ki gà ilan nì mmɔn. 19 Yooyadaa nìn dū bipunyɔɔciitiliibi ki síiǹ bí nīn cí ti-Dindaan Diiku, án nín làá ŋá pu unil un yaa bí tijɔkɔndinee ń taa kɔ́ ku-nee.

20 Yooyadaa nìn kóoǹ bijanjakpilib nì akpambal nì bikàliŋkpilib nì samaa kɔkɔ ní bi yōoǹ ubɔti ti-Dindaan Diikun, ki dū-u ki dī mpunyɔɔjaati ki cáá-u ki kɔ́ǹ dibeecindi. Bi nìn dū-u ki kāaǹ dibeejal pu, 21 ní samaa kɔkɔ kíĺ ki bíi fàal̀.

Bi nín kūū Atalii míǹ boonee ní kitiŋ kɔ́ ŋgbansɔŋfin.