Krooniiki Gbɔnliliitiiku 21

1 Joosafaati kpíì ki cūtìi ŋàl̄ u-baabee ní bi síb́-u ki kɔ́ĺ-bi, Daafiidi Tiŋkin. U-jipɔɔn Jooram di fōō u-yil ki kpántì ubɔti.

Jooram beel

(Kpèè 2 Bib 8.16-24)

2 Joosafaati jipɔɔn Jooram nìn cáá naalib pēē baa. Bíǹ di sá Asariya nì Yeeyiyeel nì Seekariyawuu nì Asariyawuu nì Miikayeel nì Seefatiyawuu. 3 Bi-baa Joosafaati nìn púb́-bi animbil nì sindaariya nì tiwan tin cáá kunyampoouee tikpil. U nìn gíti tīī-bi Juuda timmu mun bi máń agun ki túee bí nīn kpòotī. Ama Jooram ní u nìn lēē ú fōō u-yil kí kpántí ubɔti, di sá yii úǹ di nìn sá ujipɔŋkpil.

4 Jooram nìn fōō u-baa beel ki kpántì ubɔti ní ki báaǹ inyaan. Míǹ boonee ní u cúú u-naalib kɔkɔ ki lāntì, ki kpáaǹ Isirayeel bɔtibiliŋ aba. 5 Jooram nìn cáá abin mmuŋku nì saalaa nì ali ní ki kpántì ubɔti, ní ki kāl̀ dibeel pu Jeerusaleem abin anii. 6 U nìn pée nóó Isirayeel bɔtiibi tabɔbiliŋ ní, a lì kii Akaab dicaŋkun yab nín nìn bí puee, di sá u nìn cáá Akaab bisal ubɔ ní. U nìn ŋá tin kaa nìn kítì ti-Dindaan nimbiinee. 7 Ama ti-Dindaan tɔntɔnliu Daafiidi puee, waa nìn là kí nàan̄ Juuda tiŋki, kun puee u nìn pōoǹ Daafiidi yii u-jipɔmbi làá nīn pée kā dibeel pu Jeerusaleem ní kí nīn cá jaanjaan^a.

8 Jooram beel yuntiŋu ní Eedoom yab yíkì kaa kíí bi-ba pu kí nīn gbíntìi bí Juuda yab taapu ní ki kāaǹ bi-ba nì bi-bɔtiu^b. 9 Jooram nìn yíkì ki nín cá Seeyiir tiŋkin ki kpáaǹ u-janjatɔrɔkub kɔkɔ. Ama kunyeeuee ní u nì u-janjatɔrɔkub kpootiliibi jáń ki pɔ́ɔkiǹ Eedoom yab bin nìn māntìi tú-bee. 10 Kí yòon̄ yaadal wiiŋŋu gbanti ní Eedoom yab fōō bi-ba kaa ti bí Juuda yab taapu.

Ŋyunti gbanti mbaanti ní Liibina^c yab mun kaa kíí bi-ba pu. 11 Jooram u-ba nìn máń iwaatootipaan Juuda jooŋŋi pu, ní ki yāntì Jeerusaleem yab nì Juuda yab kɔ́ tijɔkɔndin ki dū Unimbɔti ki fá.

12 Dalbee ní Unimbɔti bɔnaatiliu ŋmàn̄-u kugbɔŋu ki bí-u yii: «Ti-Dindaan, a-naanja Daafiidi Nimbɔtiu nín sòon̄ puee sɔ̀. Aa dī a-baa Joosafaati tabɔbiliŋ kaa ti dī a-naanja Asaa, Juuda bɔtiu tabɔbiliŋ. 13 Ama a dī Isirayeel yab bɔtiibi saŋŋu ki yāntì Jeerusaleem yab nì Juuda yab bíi tòotī awaa kii Akaab dicaŋkun yab nín ŋáań puee. Áli gba a kūū a-naalib bin nìn sɔ́ǹ-see. 14 An pu ní ti-Dindaan làá cáań atulim ki tɔ̄ a-nibul nì a-jipɔmbi nì a-nimpoobi nì a-gaajawanti kɔkɔ pu. 15 Sii a-bee, tiweeŋkpiil di làá cúú-si, iween in làá ŋmɔ́ kí bà a-nai ní kí nīn púntí-si baabadal áli a-nai ń dāá nyā mpaampiin puee.»

16 Niinee ti-Dindaan yāntì Fiiliistii yab nì Bilaalibub bin kóò ki pìlīǹ Kuusi yabee dɔ́miń kí já nì Jooram. 17 Bi nìn jáń ki pɔ́ɔkiǹ Juuda yab ní ki kɔ́ kitiŋin ki kóoǹ tigaajawan tin kɔkɔ nìn bí ubɔti dicaŋkunee. Bi nìn kpáaǹ u-jipɔmbi nì u-nimpoobi. U-jipɔŋwaaliu Akasiya baba ní bi nìn kíǹ-u. 18 Míǹ boonee ní ti-Dindaan yāntì ina weeŋyi in baa ŋūǹ kí cáaǹee dɔ́miń ki cúú-u. 19 An pée bí míǹ ki cá abin ali boonee, iweenee píĺ-u ní u-nai nyáń, ní u dāa kpíì nsansaaŋkúm. U-naacimbi kaa nìn kpāā ŋŋmi ki súń u-kpool kii bi nín nìn ŋá pu ki tīī u-naanjab tinyoolee.

20 Jooram nìn cáá abin mmuŋku nì saalaa nì ali ní ki kpántì ubɔti ní ki kāl̀ Jeerusaleem tiŋkin ki jíń dibeel abin anii. U nín kpíìyee, ubɔ nì ubɔ kaa yáliŋkì u-pu. Bi nìn síb́-u Daafiidi Tiŋkin, ama baa nìn síb́-u bibɔtiibi kaakuliŋin.