Krooniiki Gbɔnliliitiiku 18

Joosafaati nì Isirayeel bɔtiu Akaab ŋá mpèé

(Kpèè 1 Bib 22.1-4)

1 Joosafaati nìn ká tigaajati nì tinyool tikpil. U nìn yāntì u-dicaŋkun niliu ubɔ cáá Isirayeel bɔtiu Akaab dicaŋkun biki kiba. 2 Abin aba boonee ní Joosafaati cūtìi māntì Akaab pu Samaarii tiŋkin. Akaab nìn kūū ipii nì inaa kupaau ki fōō u nì bin céeǹní-uee kucaŋu. U nìn páb́-u yii ú kūtì u-pu bí cùú já nì Ramooti tiŋki kin bí Galaadee^a. 3 Isirayeel bɔtiu Akaab nìn bí Juuda bɔtiu Joosafaati yii: «A làá céeǹ-mi ḿ cùú já kí fōō Ramooti tiŋki kin bí Galaadi tiŋkpaaŋkineeee?» Ní Joosafaati kíí Isirayeel bɔtiu yii: «Man nì si sá unibaanti ní. A-nibul sá m-nibul ní. Ti làá kūtì a-pu tí cù kujaau.»

Tipɔjikaal bɔnaatiliibi nāatì dijajil

(Kpèè 1 Bib 22.5-12)

4 Ama ní Joosafaati gíti kútì ki lī yii: «Tí bàlifì ti-Dindaan kí wàatī.» 5 Niinee ní Isirayeel bɔtiu kóoǹ u-bɔnaatiliibi^b ki kpáfì. Bi nìn bí binib alaataa anaa nyɔkɔm ní ubɔti bālifì-bi yii: «Tí cùú já kí fōō Ramooti tiŋki kin bí Galaadi tiŋkpaaŋkeeyaaa, tí taa cù?» Ní bíǹ kíí-u yii: «Nín̄ cá! Ti-Dindaan dū-kì ki ŋá a-ŋaan.» 6 Ama ní Joosafaati gíti bālifì yii: «Mimmee báà ti-Dindaan bɔnaatiliu ubɔ gíti kpá doo tí ŋmā kí cù u-cee kí bàlifì kí béé ti-Dindaan nín sòon̄ pueeee?» 7 Ní Isirayeel bɔtiu kíí Joosafaati yii: «Ubɔ gíti bí un pu ti ŋūǹ kí bàlifì kí béé ti-Dindaan nín sòon̄ puee, ama maa là u-bɔti, di sá yii tin kaa ŋān̄ee ŋma ní u nàatī-mi, waa nàatī-mi tin ŋān̄ee dalba dalba. Úǹ di sá Yiimila jipɔɔn Miisee.» Ní Joosafaati bí yii: «Taa sòoǹ míǹ!» 8 Niinee ní Isirayeel bɔtiu yíiń u-kàlinjau ubɔ ní ki bí-u yii: «Cùú cáań Yiimila jipɔɔn Miika doo malaa!»

9 Isirayeel bɔtiu nì Juuda bɔtiu Joosafaati nìn kā báà ŋma u-beejal pu Samaarii tiŋki punyɔkɔki caŋin ki pēē bi-beebɔkutiŋ. Bibɔnaatiliibi kɔkɔ nìn bí ki nàatī tibɔti bi-nimbiin. 10 Keenaana jipɔɔn Siideekiyawuu nìn dū tikúti ki mɔ́ɔ́ ŋyin. U nìn bí yii: «Ti-Dindaan nín sòon̄ puee sèé: <Nì ŋyin nee ní a làá dūú jáǹ Siirii yab kí céetí-bi múb.>» 11 Bibɔnaatiliibi bin kɔkɔ nìn kíǹee nìn pée sòoǹ tibɔbaantiil ní ki lì yii: «A ŋūǹ kí cùú já kí fōō Ramooti tiŋki kin bí Galaadi tiŋkpaaŋkinee. A làá já kí pɔ̄ɔkiǹ-kì, ti-Dindaan làá dū-kì kí ŋá a-ŋaan.»

Miika nāatì yii Akaab kaa làá já kí jī

(Kpèè 1 Bib 22.13-28)

12 Un bi tú ú cùú yíiń Miikayee bàn̄ee ní ki bí-u yii: «Kpèè, Unimbɔti bɔnaatiliibi kɔkɔ ŋá kinyɔɔbaantii ki sòoǹ ki nàatī ubɔti tiŋan ŋma ní. Si mun yaa bàn̄ee, á sòoǹ kí nàatī ubɔti tin ŋān̄ee ŋma kii bin béeyee.» 13 Ama ní Miika kíí-u yii: «Nì ti-Dindaan un bí dimaŋfalin nee puee, tin ti-Dindaan yaa tīī-mi ḿ nàatēe, tíǹ ní m làá nàatī.»

14 U bāań ubɔti ceeyee ní ubɔti bālifì-u yii: «Miika, tí cùú já kí fōō Ramooti tiŋki kin bí Galaadi tiŋkpaaŋkineeyaaa, tí taa cù?» Ní Miika kíí-u yii: «Nín̄ cá! A làá já kí fōō-kì! Ti-Dindaan dū kitiŋ gbanti ki ŋá a-ŋaan.» 15 Ama ní ubɔti gíti bí-u yii: «Ŋfunyɔm miŋa ní m máaǹ kí yàntī á pùtī kí tùkù-mi ibaamɔn ti-Dindaan yindi pu ní á nín tùkù-mi ní?» 16 Niinee ní Miika bí yii:

«M ká Isirayeel nibul

yàl̄ ki gbí ajoon pu

kii ipii in kaa cáá ukpaalee^c

Ní ti-Dindaan bí yii:

<Baa ti cáá ukpil.

Báà ŋma ń nīn gítí u-dumpu nì ŋgbansɔŋfi.>»

17 Ní Isirayeel bɔtiu bí Joosafaati yii: «M bàà tùkū-si yii bee! Waa pée nàatī tin ŋān̄ee kí tīī-mi, see tikpitil!» 18 Ama ní Miika gíti bí-u yii: «Too! Pīlifì tin ti-Dindaan sòon̄ee. M ká ti-Dindaan kā u-beejal pu ní yilpu janjaliibi yú ki kɔ́ĺ-u, biba yú u-ŋaŋgiil pú ní bin kíǹee yú u-ŋaŋgan pú. 19 Ní ti-Dindaan bí yii: <Ŋma ní m làá nín ká ú cùú ŋmàtiǹ Akaab kí yàntī ú cùú já nì Ramooti tiŋki kin bí Galaadi tiŋkpaaŋkinee bí kpɔ̀-u ní?> Niinee ní ubɔ ń bí yii tina, ní un kíǹee ń bí yii tina. 20 An ŋá mimmee ní ŋfam miba dɔ́miń ki síl̀ ti-Dindaan nimbiin ní ki bí yii: <Man di làá cù kí ŋmàtiǹ-u.> Ní ti-Dindaan bālifì-mì yii: <A làá ŋá mana ní?> 21 Ní mì kíí yii: <M làá cù kí kɔ́ bibɔnaatiliibi kɔkɔn ní kí yàntī bí sòoǹ tinyimɔmbɔti kí tùkù ubɔti.> Ní ti-Dindaan bí-mì yii: <A làá cùú ŋmàtiǹ-u ní m nyí yii a làá ŋmā. Nín̄ cá kí ŋá míǹ.> 22 Ti-Dindaan yaa lafun dū nnyimɔn fam ki ŋá a-bɔnaatiliibi kɔkɔ nyɔmmunee, á béé yii u là dinimbinaamandi ń jēetí a-pu ní.»

23 Niinee ní Keenaana jipɔɔn Siideekiyawuu sútì ki pìl̄ Miika ní ki fáá-u ntampa ki lī yii: «La pú ní ti-Dindaan Fam nyáń m-ni ki cūtìi bíi sòoǹ nì si?» 24 Ní Miika kíí yii: «Tiŋman, ŋwiin ŋun ní a yaa láa sáń ki póotí adiin ki bāal̀ee, a làá dāá gbìl̄ taapu.» 25 Niinee ní Isirayeel bɔtiu tīī mara yii: «Ní cúúmaan Miika kí cùnnì kí tīī Amɔn tiŋki kɔmandaŋwu nì ubɔti jipɔɔn Yoowasi, 26 ní kí tùkù-bi yii: <Man ubɔti di bí yii, ní dū kijapaai nee kí tɔ̄ sarka. Ní tīī-u tijin ŋwaam pu nì nnyim kí nīn cí ŋyunti ŋun m làá fàtīí gítiń nì ŋgbansɔŋfee.>» 27 Ní Miika bí-u yii: «A yaa fātìi gítìń nì laafiyee, mimmee ti-Dindaan kaa dī m-pu ki sòon̄ dee.» Ní u gíti kútì yii: «Nimbi samaa kɔkɔ, pīlifìmaan^d!»

Bi kūū ubɔti Akaab dikɔ̀ndin

(Kpèè 1 Bib 22.29-40)

28 Isirayeel bɔtiu Akaab nì Juuda bɔtiu Joosafaati nín cá kí já nì Ramooti tiŋki kin bí Galaadi tiŋkpaaŋkinee. 29 Ní Isirayeel bɔtiu bí Joosafaati yii: «M làá kpántí m-wampeeŋkaati bí taa béé-mi^e ní kí cùú já kujaau. Ama siiyee, dū a-beebɔkutil kí pèen̄.» Ní Isirayeel bɔtiu lafun kpántì u-wampeeŋkaati bí taa béé-u ní ki cūtìi bíi jáà. 30 Siirii mun bɔtiu nìn tīī u-janjaliibi mmuŋku nì saalaa nì bili bin sá bin kpèé janjatɔrɔkub kpilibee mara yii: «Ní taa já nì bijanjaliibi ŋwaamuɔɔɔ, kí taa já nì bijanjakpilib, ama ní pée já nì Isirayeel bɔtiu baba.» 31 An pu ní bin kpèé janjatɔrɔkub kpilibee nín ká Joosafaatee, bi bí yii: «Báà an ŋá pu, Isirayeel bɔtiu dee», ní bi fātì bi-ba ki túĺ-u ki bíi jáà nì u, ní Joosafaati kíĺ ki bíi kūuntí. 32 Niinee ní bijanjakpilibee nín béè yii an kaa sá Isirayeel bɔtiu ní bi yāntì-u kaa tí bíi jì-u.

33 Ama Siirii yab janjaliu ubɔ pée tɔ́ mpiin yìkíl̄ yikil ní an cūtìi yá Isirayeel bɔtiu laakin u-gbampɔɔl janliitiliŋ tūū tɔbee. Ní ubɔti bí un ŋàal̀ u-tɔrɔkuuee yii: «Fàtīí gítí a-boon tí nyā dikɔmbool pu, di sá m ká tiweendi.» 34 Ama ŋwiin gbantee, kujaau nín nìn pɔ́ɔkì puee, bi nìn yāntì ubɔti yú u-tɔrɔkuu poon ki túĺ Siirii yab áli kujoou, ní u kpíì.