Krooniiki Gbɔnliliitiiku 15

Asaa fātìi ŋáŋkì dinimbɔtinool

(Kpèè 1 Bib 15.12-15)

1 Unimbɔti Fam nìn kpákatì Oodeedi jipɔɔn Asariyawuu pu. 2 U nìn cūtìi túŋkì Asaa ní ki bí-u yii: «Asaa nì Juuda nì Beenjameen yab kɔkɔ, ní pīlifìmaan-mi! Ni yaa bí ti-Dindaan ceeyee, u mun bí ni-cee ní. Ni yaa nyàab̄-uee, u làá yàntī ní ká-u, ama ni yaa dū-u ki fée, see u mun ń dū-ni kí fá. 3 Isirayeel yab nìn dū iyunti tikpil ki kāl̀ ibaamɔn Nimbɔtiu kpá bi-ceeyaaa, usaraaŋal ubɔ kpá kí dàkà-baaa, ní mara ubɔ mun nìn kpá. 4 Ama bi-nimbinaamandi poonee, bi fātìi gítìń ti-Dindaan Isirayeel Nimbɔtiu cee, ki nyàab̄-u, ní úǹ yāntì bi ká-u. 5 Ŋyunti gbantee, unil kaa nìn ŋūǹ kí nyā kí fàtīí kɔ́nní nì ŋgbansɔŋfi, di sá yii kitiŋ kamaa pu nib nìn bí dinyoondin ní. 6 Ditimbundi diba nìn jáà nì di-juti, ní kitiŋ kiba jáà nì ki-juti, di sá yii Unimbɔti di nìn cáań animbinaaman gbanti kɔkɔ nì ŋi-bulifi ki tɔ́ bi-pu. 7 Ama nimbee, ní nīn ŋúb́ an píkí, ni-wunti ń taa yɔ̀tī. Di sá yii ni-tundi dāa cáá tipaal.»

8 Ŋyunti ŋun Unimbɔti bɔnaatiliu Asariyawuu, Oodeedi jipɔɔn dū tibɔti gbanti ki nāatì Asaayee, ní u ká kunyannyaau. U nìn kúntì awaa ŋin kɔkɔ nìn bí Juuda nì Beenjameen timmunee. U nìn kúntì ŋin mun nìn bí ntimu mun u nìn jáń ki fōō Eefiraayiim jooŋŋi puee. U nìn ŋáŋkì ti-Dindaan saraafaŋŋu ŋun nìn bí kunimbɔtidii nyɔkɔpuee. 9 U nìn kóoǹ Juuda yab nì Beenjameen yab kɔkɔ nì Isirayeel yab bin nìn nyánní Eefiraayiim nì Manasee nì Simeeyɔn naakɔtin ki dɔ́mińee ki kpáfì. Di sá yii Isirayeel yab tikpil nìn dɔ́miń ki páaǹ u-boon ŋyunti ŋun ní bi ká yii ti-Dindaan u-Nimbɔtiu bí u-ceeyee. 10 Asaa nín jíń dibeel abin saalku ŋmatataatiu poonee, ní bi kóoǹ ki kpáfì Jeerusaleem. 11 Yaadal wiiŋŋuee, bi nìn lēē tiwaŋkuti tin bi nìn fúkúl̀ bi-nannanliibi ceeyee poon inaa alaataa aluli nì ipii kutukub biluli ki ŋá ti-Dindaan saraa. 12 Bi nìn pōoǹ kí nyàab̀ ti-Dindaan, bi-naanjab Nimbɔtiu nì bi-pɔbiliŋ kɔkɔ nì bi-nammu kɔkɔ. 13 Bi nìn pōoǹ yii kibikeeee, unikpaaneeee, uninjeeee, unimpueeee, un kamaa yaa kaa nyàab̄ ti-Dindaan, Isirayeel Nimbɔtiuee, bí kpɔ̀-u. 14 Ní bi téeń mpɔn ki fáá iwiliili, ní ki búń akantán nì iyin ki pūtì ki pōoǹ ti-Dindaan. 15 Juuda yab kɔkɔ nìn bí mmɔnni, kun puee bi nìn pūtì ki pōoǹ nì bi-pɔbiliŋ kɔkɔ ní. Bi nìn lēē bi-ban kí nyàab̀ ti-Dindaan, ní ti-Dindaan mun nìn yāntì bi ká-u. Ti-Dindaan nìn tīī-bi ŋgbansɔŋfi ijaan kɔkɔ pu.

16 Ubɔti Asaa nìn lēē u-naan Maaka^a tinimpubɔtiilin, kun puee u nìn kpítì diwaal ki nántiǹ ntimbiil waal Aseera. Asaa nìn gāā diwaalee ki lúkú, ní ki càkā càkā-dì ki dūu tɔ́ ŋŋmin Seedrɔn tantakalin. 17 Ama ŋgbantamu pu waatootipaaŋyi kaa nìn kúntì Isirayeel tiŋkin. Nì míǹ kɔkɔee, Asaa pɔbil nìn bí diba nì ti-Dindaan ní u-maŋfal wiiŋyi kɔkɔ poon. 18 U nìn cáań animbil nì sindaariya nì tiwan tin kɔkɔ u-baa nì úǹ u-ba nìn dūu sú Unimbɔtee ki síiǹ kunimbɔtidiin.

19 Asaa nín jíń dibeel ki cáá sāā abin aŋmoo kpá imuŋku ili poonee, baa ti gbìl̄ kujaau pu^b.