Krooniiki Gbɔnliliitiiku 13

Juuda bɔtiu Abiiya bɔti

(Kpèè 1 Bib 15.1-8)

1 Jeerooboowaam nín kāl̀ Isirayeel beel pu dibeel abin saalku nì ata poonee ní Abiiya kpántì Juuda tiŋki bɔtiu. 2 U nìn jíń dibeel Jeerusaleem abin ata ní. U-na nìn sá ugiibeeyaja Uriyeel bisal ní bi yíì-u yii Miikaya.

Abiiya nì Jeerooboowaam nìn pée jáà ní kaa gbèentí. 3 Abiiya nìn cūtì kí já nì Jeerooboowaam. U nìn yōoǹ bijanjaliibi bibaatandambi kutukub alaataa anaa, ní Jeerooboowaam mun yōoǹ bijanjaliibi bibaatandambi kutukub alaataa anii. 4 Abiiya nìn jɔ́m̀ Seemarayiim jool din bí Eefiraayiim jooŋŋi puee ní ki bí yii: «Jeerooboowaam nì Isirayeel yab kɔkɔ, ní pīlifìmaan. 5 Naa nyí yii ti-Dindaan, Isirayeel Nimbɔtiu dū Isirayeel beel ki tīī Daafiidi nì u-naantiibi ní ki nīn cáa cá jaanjaanaaa? An sá dipoondi din bí kaa kpìtēe ní. 6 Ama Neebaati jipɔɔn Jeerooboowaam un nìn sá Daafiidi jipɔɔn Saloomɔn tɔntɔnliuee yíkì ki jáń nì u-kpiliu. 7 Naayeekub nì binib bin kaa bí tibanee yíkìi páaǹ u-boon ki jáń ki pɔ́ɔkiǹ Saloomɔn jipɔɔn Rooboowaam. Rooboowaam mun nìn dáá sá kinaacimpɔmbiki, kaa nìn dáá nyí tiba ní kaa nìn ŋúń ki síl̀ bi-nimbiin. 8 Too kɔŋkɔnnee, ni bíi lì yii ni làá já nì dibeel din ti-Dindaan dūu ŋá Daafiidi naantiibi ŋaanee. Tiŋman ni wīikí ní ki cáá sindaariya nabil din Jeerooboowaam mɔ́ɔ́ ki tīī-ni dí nīn sá ni-nimbɔtiuee^a. 9 Ni jìn̄ ti-Dindaan saraaŋaliibi, Aarɔn naantiibi nì Leefii yab ni-kansikin. Ni lēē nimbi ni-ba bisaraaŋaliibi kii anibul ŋin kíǹee yab nín ŋáań puee. Ubɔ yaa cáań unaja nì iŋɔjaa ilulee, udaan kpáàa kpántì inimbɔti in kaa kpáàa sá Unimbɔtee saraaŋaliu dee. 10 Ama timbee, ti-Dindaan di sá timbi Nimbɔtiu, ní taa dū-u ki fá. Bisaraaŋaliibi bin tūǹ ti-Dindaan tundee sá Aarɔn naantiibi ní, ní Leefii yab mun bí ki tūǹ bi-tundi. 11 Kutaafaau nì kujoou kamaayee, bi ŋáań bisaraawɔkaabi ní ki tùutī talaalub ki tìì ti-Dindaan. Bi pāantí kpɔnɔb bin bi dūu ŋá Unimbɔti saraayee circir teebiliu^b pu, ní ki tùutī fitilab bin tɔ́kɔ́ sindaariya tɔ́kɔŋkaati puee kujoou kamaa. Di sá yii timbee, ti ŋúb́ ti-Dindaan ti-Nimbɔtiu nín bí yii tí ŋá puee ní. Ama nimbee, ni dū-u ki fá. 12 Kɔŋkɔnnee, Unimbɔti u-ba di līī timbi nyɔkɔpu. U-saraaŋaliibi mun bí ki bɔ́ntì kí búń bi-yiŋyi ti kíĺ nì ni kujaau^c. Míǹ puee Isirayeel yab, ní taa já nì ti-Dindaan, ni-naanjab Nimbɔtiu! Naa làá ŋmā kí já kí pɔ̄ɔkiǹ-u.»

13 Ŋyunti gbantee, Jeerooboowaam nìn lēē u-janjaliibi biba bi cūtìi bál̀ Juuda yab janjaliibi boon pú kí túuǹ-bi. An ŋá mimmee ní Isirayeel janjaliibi biba bí Juuda yab nyɔkɔpu ní bin bál̀ee mun bí bi-boon pú. 14 Juuda yab fātèe ní ki ká yii bi cáá kí jáǹ bijanjaliibi bin bí bi-nyɔkɔpuee nì bin bí bi-boon púee. Niinee ní bi kúuǹ ki yíiń ti-Dindaan, ní bisaraaŋaliibi búń iyin. 15 Juuda yab nìn fáá ijanjakuŋkuunti. Ŋyunti ŋun bi bíi kūuntí mimmee ní Unimbɔti yāntì Abiiya nì Juuda yab jáń ki pɔ́ɔkiǹ Jeerooboowaam nì Isirayeel yab kɔkɔ. 16 Isirayeel yab nìn sáǹ Juuda yab nimbiin ní Unimbɔti dū-bi ki ŋá Juuda yab ŋaan. 17 Abiiya nì u-janjaliibi nìn jáń ki pɔ́ɔkiǹ Isirayeel janjaliibi sɔ́kɔ sɔkɔ. Bi nìn kūū bi-janjaliibi bibaatandambi kutukub alaataa aŋmoo. 18 Ŋwiin gbantee, bi nìn nàn̄ Isirayeel yab dúsi dusi, ama Juuda yab bíǹ nìn ká dijajil, di sá yii bi nìn dū bi-mákal ki páaǹ ti-Dindaan, bi-naanjab Nimbɔtiu pu. 19 Abiiya nìn kùl̄ ki páaǹ Jeerooboowaam boon. U nìn jáń ki fōō u-cee Beeteel nì Yeesana Eefrɔn timmu nì ntimbilimu mun pìl̄-muee.

20 Ŋyunti ŋun Abiiya sá ubɔtee, Jeerooboowaam kaa nìn gíti ká mpɔn. An dāa kúntèe ní ti-Dindaan fáá-u ní u kpíì. 21 Ama Abiiya úǹ nìn mɔ̄tìi ká mpɔn. U nìn cáá binimpoobi ubɔ kpá saalku ní ki cáá jipɔmbi mmuŋku nì bili nì bisalib saalku nì ubɔ.

22 Abiiya tuuŋŋi ŋin u túńee, tin kɔkɔ u ŋée nì tin u lēe ŋmàn̄ ki kā Unimbɔti bɔnaatiliu Idoo gbɔŋkun. 23 Abiiya kpíì^d ki cūtìi ŋàl̄ u-baabee ní bi síb́-u Daafiidi Tiŋkin. U-jipɔɔn Asaa di fōō u-yil ki kpántì ubɔti.

Asaa beel bɔti

(Kpèè 1 Bib 15.9-11)

Asaa nín kāl̀ dibeel puee, ŋgbansɔŋfi nìn dɔ́miń Juuda tiŋki pu ki cáa sāā abin saalaa.