Krooniiki Gbɔmpeepeekaaku 19

Bi kpēē Daafiidi kàliŋkpilib fám

(Kpèè Sami 2, 10.1-5)

1 Ŋyunti ŋubɔ boonee ní Amɔn yab bɔtiu Naasi kpíì ní u-jipɔɔn fōō u-yil ki kāl̀ dibeel. 2 Niinee Daafiidi bí yii: «M làá ŋá Naasi jipɔɔn Anuun tiŋan kii u-baa nín nìn ŋá man tiŋan puee.» Daafiidi nìn lēē binib ki tú bí cù kí sɔ̀ŋkì Anuun pɔbil u-baa nín kpíìyee pu. Ní Daafiidi tɔntɔnliibi bin u lēē ki túee dūu bàn̄ Amɔn yab tiŋkin. 3 Ama ní Amɔn yab yidambi bí Anuun yii: «A dàkafī yii Daafiidi nín là kí tīī a-baa tinyool kí sɔ̀ŋkì a-pɔbil puee ní u túnní binib a-ceeee? Waa túnní u-nib bí dāan̄ kí yìiǹ kí cɔ̄ŋkì kí béé kitiŋ filiŋfeetii níii?» 4 Niinee ní Anuun yāntì bi cúú Daafiidi kàliŋkpilib ki kōol̀ bi-nyimpuliŋ, ki cátì bi-bɔkutiŋ ki ŋmāntiǹ bi-kpiliŋ ní ki jìn̄-bi. 5 Ní bi cūtìi máafì Daafiidi binibee bɔti. U nìn lēē binib ki tú bi cūtìi túŋkì-bi nsanni kun puee bi nìn kɔ́ǹ-bi icoo tikpil. Ubɔti nìn tú bi tùkū-bi yii: «Ní gbíntí Jeeriikoo tiŋkin ni-nyimpuliŋ ń fàtīí nyā. Míǹ boonee ní nín gítiń doo nee.»

Daafiidi jáń nì Amɔn yab nì Siirii yab

(Kpèè Sami 2, 6-19)

6 Anuun nì Amɔn yab ká yii Daafiidi kaa làá dū tin bí ŋée kí pɔ̄-bi. Niinee ní bi nyàab̄ animbil kúti tɔɔnib mmuŋku nì saalaa ki tú bi cūnnì ki tīī Aram yab bin kóò amɔɔ ali kansikinee nì bin kóò Maaka nì Sooba timmunee janjaliibi, bí dāá já kujaau kí tīī-bi kí kpáaǹ bi-janjatɔrɔkub nì bi-tanjakaliibi. 7 Bi nìn ŋúń ki ká janjatɔrɔkub kutukub mmuŋku nì saalaa nì bili, ní ki tīī Maaka bɔtiu nì u-janjaliibi animbil. Bíǹ nìn dɔ́miń ki ŋātì bi-janjanaapaal Meedeeba^a tiŋki caŋin. Amɔn yab mun nìn nyánní bi-timmun ki dɔ́miń ki kpáfì kí já kujaau.

8 Daafiidi nín gbìl̄ mimmee, ní u dū ujanjakpil Joowaab nì bijanjaliibi bin sá bibaatandambee ki tú. 9 Amɔn yab nìn cūtì ki yúl̀ mpɔn pu bi-tiŋyil punyɔkɔki nyɔkɔpu kí já kujaau. Ama bibɔtiibi bin nìn dɔ́miń kí tūtuǹ-bee bíǹ nìn yúl̀ tisatin laaba. 10 Joowaab ká yii kujaau làá nīn bí u-nyɔkɔpu nì u-boon pú. Di sá ní u lēē Isirayeel janjaliibi bimɔntiibi ki yāntì bi yúl̀ mpɔn pu ki bíitiǹ Aram yab. 11 U nìn dū u-janjaliibi bin kíǹee ki ŋúbíǹ u-naal Abisayi ní ki yāntì bi yúl̀ mpɔn pu ki bíitiǹ Amɔn yab. 12 Joowaab tùkū u-nabiki yii: «Siirii yab yaa bíi pɔ́ɔkíǹ-mee, á dāá tíkiń-mi. M yaa tí ká yii Amɔn yab bíi pɔ́ɔkíǹ-see, ma mun làá dāan̄ kí tíkiń-si. 13 Dàkà dibaatandi, tí dàkà dibaatandi kí fīī ti-nibul nì ti-Nimbɔtiu timmu. Ti-Dindaan ń ŋá min u lèe.» 14 Niinee Joowaab nì u-janjaliibi nín cá kí já nì Siirii yab, ní bíǹ sáǹ-bi. 15 Amɔn yab nín ká yii Siirii yab sáǹee, ní bi mun sáǹ Abisayi, ki kɔ́ kitiŋin. Niinee ní Joowaab nín gítí Jeerusaleem tiŋkin.

16 Siirii yab nín ká yii Isirayeel yab pɔ́ɔkiǹ-bee, ní bi tú binib bí cùú yíiń Siirii yab janjaliibi bin kóò Eefiraati mɔɔl lapu púee. Adadeeseer janjakpiliu Soobaaki di nìn līī bi-nyɔkɔpu. 17 Ní bi tùkū Daafiidi an bɔti, ní u kóoǹ Isirayeel yab janjaliibi kɔkɔ ki kpáfì, ní bi nín cá ki dūtì Jɔɔdan buŋŋu ki cūtìi yúl̀ ŋkɔnjaloon pu. Siirii yab nìn yúl̀ mpɔ̀n pu ki tātìi gbāaǹ dikɔ̀ndi pu kí já nì Daafiidi. 18 Ama Isirayeel yab nìn jáń ki pɔ́ɔkiǹ-bi, ní bi sáǹ. Daafiidi yab nìn kūū itaamu in dátí janjatɔrɔkubee kutukub biluli, ní ki kūū bijanjaliibi bin còom̄ ataa puee binib kutukub imuŋku ili. Bi nìn kūū Siirii yab janjakpiliu Soobaaki. 19 Bibɔtiibi bin kɔkɔ nìn bí Adadeeseer taapuee nìn ká yii Isirayeel yab jáń ki pɔ́ɔkiǹ-bi. Niinee ní bi nì Daafiidi sòon̄ ki gbìlīǹ tɔb ŋgbansɔŋfi ń nīn bí bi-kansikin. Bi nìn kíǹ ki bí u-taapu ní. Kí yòon̄ ŋyunti gbantee, Siirii yab kíǹ ki fàŋkí kí jòò Amɔn yab.