Krooniiki Gbɔmpeepeekaaku 9

1 Bi kàan̄ Isirayeel yab kɔkɔ nyɔkɔm ní ki ŋmàn̄ ki ŋá Isirayeel Bɔtiibi gbɔŋku poon ki nóó nì bi nín pēē pēē mmaal puee.

Binib bin kóò Jeerusaleem tiŋkinee

Juuda yab fātì bi-boon ki tīī Unimbɔti ní Unimbɔti yāntì bi cáá-bi ki cūnnì kuyuŋu Babiloon tiŋkin. 2 Bi nín dāa gítìń kuyuŋu púee, bi-kansikin bin nìn péé péé ki fātìi kāl̀ bi-timmu pu bi-tinjaŋŋi poonee di sá Isirayeel yab nì bisaraaŋaliibi nì Leefii yab nì kunimbɔtidiin tɔntɔnliibi.

3 Juuda yab nì Beenjameen yab nì Eefiraayiim yab nì Manasee yab di nìn gítìń ki kāl̀ Jeerusaleem tiŋkin^a.

4 Juuda naakookunee, Amiiwuudi jipɔɔn Utayii nìn bí. Amiiwuudi nìn sá Oomirii jipɔɔn nì Oomirii naantiiu nì Banii naantitɔntɔkɔl ní ki nìn sá Peereesi maaliŋun. 5 Seera maaliŋunee, Asaaya nì u-jipɔmbi nìn bí. Asaaya nìn sá u-dicaŋkun ujipɔŋkpil. 6 Seera maaliŋunee, Jeewuyeel nìn bí. Juuda yab bin nìn gítìń ki kāl̀ Jeerusaleem tiŋkinee nìn sá binib saalaa kpá alaataa aluli ní.

7 Beenjameen naakookunee, Meesulam jipɔɔn Salu nìn bí. U nìn sá Oodafiya naantiiu nì Aseenuwa naantitɔntɔkɔl. 8 Jeeroowaam jipɔɔn Ibineeya nì Usi jipɔɔn Eela nìn bí. Eela naanja di sá Miikirii. Seefatiya jipɔɔn Meesulam mun nìn bí. U-naanjab di sá Reewuyeel nì Ibineeya. 9 Bin bí nee kɔkɔ nìn sá adican kpilib ní. Beenjameen yab bin nìn gítìń ki kāl̀ Jeerusaleem tiŋkinee nìn sá binib alaataa awa nì binib binaa kpá imuŋku ita ní.

10 Bisaraaŋaliibi kansikinee, Yeedaya nì Yooyariib nì Jaakin nì 11 Asariya nìn bí. U-naanjab di nìn sá Ilikiya, Meesulam jipɔɔn nì Meesulam, Saadooki jipɔɔn nì Saadooki, Meerayooti jipɔɔn nì Meerayooti, Ayiituub jipɔɔn nì Ayiituub u-ba un nìn sá bin kpèé kunimbɔtidiiyee kpiliuee. 12 Adaaya mun nìn bí. U-naanjab di sá Yeeroowaam nì Pasuur nì Maalkiya. Masayi mun nìn bí. U-naanjab di sá Adiyeel nì Jaseera nì Meesulam nì Meesileemiiti nì Imeer. 13 Bisaraaŋaliibi yaa kútèe, adican kpilib gbanti nìn nyáń binib kutuku ubɔ nì alaataa aluli nì binib imuŋku ita ní. Bi-kɔkɔ nìn sá bibaatandambi ní ki nìn tūǹ kunimbɔtidiin ditundi.

14 Leefii yab kansikinee, Seemaya nìn bí. U-naanjab di sá Asuub nì Asiirikam nì Asabiya nì Meerarii. 15 Bakibakaar nì Eereesi nì Galaal nì Mataniya mun bí. Bi-naanjab di sá Sikirii nì Asaafi. 16 Oobadiya mun nìn bí. U-naanjab di sá Seemaya nì Galaal nì Yeedutun. Beereekiya mun nìn bí. U-naanja di sá Asaa nì Eelkana un nìn kóò Neetoofa yab timbiliiki kibanee.

17 Bipunyɔɔciitiliibi kansikinee, Saluum un sá ukpilee nì u-nabiyaamu Akuub nì Talmɔn nì Ayiiman nìn bí. 18 Bi-naantiibi dáá gbíntìi cí kipunyɔkɔ kin bí ŋwìiń nyalaŋki pú, bi yíì-kì yii ubɔti punyɔkɔkee. Bi-naanjab di nìn sá Leefii yab naapaal punyɔɔciitiliibi. 19 Saluum nìn sá Kooree jipɔɔn nì Abiyasafi naantiiu nì Kooree naantitɔntɔkɔl ní. U nì Kooree dicaŋkun yab bin kíǹee di nìn cí circir kɔŋkooŋŋu punyɔkɔki. Bi-naanjab di nìn cí ti-Dindaan nibul naapaal. 20 Njaminee, Eelasaar jipɔɔn Piinaasi di nìn sá bi-kpiliu, kun puee ti-Dindaan nìn bí u-cee. 21 Meeseeleemiyawuu jipɔɔn Seekariya mun nìn sá dikpafindi tantiu ciitiliu ubɔ ní.

22 Binib bin bi nìn lēē bí nīn sá bipunyɔɔciitiliibee nìn sá binib alaataa ali nì saalaa nì bili ní. Bi nìn kàan̄-bi ki ŋmàn̄ bi-yiŋŋi ki ŋá ntimu mun poon bi nyánnée gbɔntin ní. Ubɔti Daafiidi nì Unimbɔti bɔnaatiliu Samiyeel di nìn dū ditundi gbanti ki ŋúbiǹ-bi bí nīn tūǹ kí nīn cáa cá jaanjaan. 23 Ní bi nì bi-naantiibi gbíntìi bí ki kpèé ti-Dindaan Diiku, ki cí ki-punyɔmmu.

24 Bipunyɔɔciitiliibi nìn bí ki cí mpunyɔmu naatil, an dàkà yii ŋgan pú nì ŋgiil pú nì ŋwìiń nyalaŋki pú nì ŋwìiń jeetilaŋki pú. 25 Bi-nabiyaamu mun nìn kóò ntimbilimunee nìn dòoń múlmul ki cīití kinyɔŋ kiba kiba. 26 Bipunyɔɔciitiliibi bikpilib naatil nìn pée bí niin ní. Bíǹ di sá Leefii yab bin cí Unimbɔti diiku dibiyaamu nì ku-gaajawantee. 27 Bi nìn màntīí tū kunimbɔtidii áli kutaa ń dāá wúntí, kun puee bi-tundi di nìn sá bí nīn cí-ku ní kí nīn pìitī ku-punyɔmmu kutaafaau kamaa.

28 Bipunyɔɔciitiliibi biba tundi di nìn sá bí nīn kpèé tiwan tin bi cáa ŋáań saraabee. Bi yaa nìn nyántì-tèe, bi nìn kàaǹ-tì ní ní bi yaa làá kɔ́ǹ-tèe, bí fàtīí kàaǹ-tì. 29 Bi-kansikin biba mun tundi di nìn sá bí nīn kpèé asambil ŋin kíǹee, nì circir wanti kɔkɔ, nì ŋyim nì ndamam nì ŋkpam nì talaalutuukaa nì talaaluyaaŋkaa. 30 Ama ní bisaraaŋaliibi di nìn bɔ́ntí tiwan tin bi ŋmàlintí ki cáa ŋáań talaalubee.

31 Leefii yab kansikinee, Saluum un sá Kooree maaliŋunee jipɔŋkpiliu Matatiya tundi di nìn sá ú nīn pūul̀ ŋkpɔnɔbiyaamu mun bi cáa ŋáań saraabee. 32 Leefii yab bin sá Keeyaati maaliŋunee biba tundi di nìn sá bí nīn pūul̀ kpɔnɔb bin bi cáa ŋáań Unimbɔti saraa ŋwiŋŋuŋfikaa kamaayee.

33 Leefii yab dicaŋŋi kpilib bin nìn sá bilaŋgaaliibee bíǹ nìn bí bíǹ bi-ba diiŋŋin ní. Baa nìn gíti cáá ditundi diba ki kútì, kun puee bíǹ nìn pée bí ditundin ŋwiimpu nì kunyeeu ní.

34 Leefii yab kpilib dee, ki nóó nì bi nín pēē pēē mmaal puee. Bi nìn kóò Jeerusaleem tiŋkin ní.

Saayuul dicaŋku yab

(Kpèè 1 Kroo 8.29-38)

35 Yeeyeel un náań Gabawɔn tiŋkee kóò Gabawɔn tiŋki gbantin ní, u nì u-nimpuu Maaka, 36 nì u-jipɔŋkpiliu Abidɔn nì u-jipɔmbi bin kíǹee, an dàkà yii Suur nì Kiisi nì Baal nì Neer nì Nadaab, 37 nì Geedɔɔr nì Ayiiyoo nì Seekariya nì Miikilooti. 38 Miikilooti di màl̄ Simeeyam. Ama bíǹ nìn kóò Jeerusaleem tiŋkin ní, bi nì bi-nabiyaamu.

39 Neer di màl̄ Kiisi, ní Kiisi màl̄ Saayuul, ní Saayuul màl̄ Joonatan nì Malkisuwa nì Abinadaab nì Eesbaal. 40 Joonatan jipɔɔn di sá Meeriibaal, ní Meeriibaal màl̄ Miika. 41 Miika jipɔmbi di sá Piitɔn nì Meeleeki nì Tareeya. 42 Ayaasi di màl̄ Yaara, ní Yaara màl̄ Aleemeeti nì Asimafeeti nì Simrii, ní Simrii màl̄ Moosa, 43 ní Moosa màl̄ Biineeya, ní Biineeya màl̄ Reefaya, ní Reefaya màl̄ Eelaasa, ní Eelaasa màl̄ Aseel. 44 Aseel màl̄ mbininjabiyaamu muluu ní. Bi-yiŋŋi di sá Asiirikam nì Bookiru nì Isimaayeel nì Seeyariya nì Oobadiya nì Anan. Aseel jipɔmbi dee.