Samiyeel Peepeekaa 5

Unimbɔti dakaau bí Fiiliistii yab cee

1 Fiiliistii yab nìn fōō Unimbɔti dakaau. Bi nìn yōoǹ-u Eebeen-Eeseer ki cáa cūnnì Asidoodi tiŋkin. 2 Bi yōoǹ-u ki cáa kɔ́ǹ bi-waal Daagɔn diikun ki nákáǹ-dì. 3 Kutaa wúntì kutaafaau pɔ̀lpɔl Asidoodi yab kpēēyee, diwaal Daagɔn lítì dicincibil ki dɔ̄ kitiŋ Unimbɔti dakaau nimbiin, ní bi yōoǹ-dì ki gíiǹ ki yóoǹ di-paaŋŋu. 4 Kù tí wúntì kutaafaau pɔ̀lpɔl bi kpēēyee, Daagɔn tí lítì dicincibil ki dɔ̄ kitiŋ Unimbɔti dakaau nimbiin. Diyil nìn cúu tūkutì ní iŋal liitil kɔ́fì ki dɔ̄ nsan pú. An nìn pée kíǹ dimuundi ní ki dɔ̄. 5 An pu ní áli ki dāa sāā díǹ nee, diwaal Daagɔn tandambi nì bin kɔkɔ cá ki kóò kuwaadiin Asidoodi tiŋkinee taal kaa tà kuwaadii punyɔkɔpu kí kɔ́.

6 Ti-Dindaan nìn kɔ́ǹ Asidoodi yab agìŋ́kpaan poon. U nìn kɔ́ǹ-bi dinyoondin, ki yāntì ncaapa cúú-bi, ki kpáaǹ bin nìn kóò ntimu mun māntìi tú-bee. 7 Asidoodi yab nín ká tin bíi jītí bi-puee, ní bi bí yii: «Isirayeel yab Nimbɔtiu dakaau kaa máaǹ kí yūĺ ti-cee doo. Isirayeel Nimbɔtiu dàkā ti nì ti-waal Daagɔn u-pɔŋŋu.»

8 Ní bi tú bi yíiń Fiiliistii yab bɔtiibi bi dɔ́miń ki kpáfì bi-cee, ní bi bālifì-bi yii: «Ti làá ŋá Isirayeel Nimbɔtiu dakaau nee mana?» Ní bíǹ kíí-bi yii: «Yòom̄maan-u kí cáá cùnnì Gaati tiŋkin.» Niinee ní bi yōoǹ Isirayeel yab Nimbɔtiu dakaau ki cáa yóoǹ Gaati tiŋkin. 9 Bi nín cáá Unimbɔti dakaau ki yóoǹ kitiŋ gbantinee, Unimbɔti nìn dáaĺ kitiŋ gbanti nib tafal, ki yāntì dinyoondi kɔ́-bi. U nìn dáaĺ bikpaambi nì ŋwaamu kɔkɔ tafal, ki yāntì ncaapa cútì-bi. 10 Niinee ní bi yōoǹ Unimbɔti dakaau ki cūnnì Eekrɔn tiŋkin. Ama bi nín cáá Unimbɔti dakaau ki bàn̄ niinee ní Eekrɔn yab kíĺ ki bíi gbáà ibiil yii: «Bi cáań Isirayeel yab Nimbɔtiu dakaau ti-cee doo kí kpɔ̀ ti nì ti-nibul!»

11 Ní bi mun yíiń Fiiliistii yab bɔtiibi kɔkɔ ki kpáfì ki bí-bi yii: «Ní fàtīí gíiǹ Isirayeel yab Nimbɔtiu dakaau u-tiŋkin, laakin u nìn bée, ú taa kpɔ̀ ti nì ti-nibul.» Di sá ŋkúm faanti nìn cúú Eekrɔn yab kɔkɔ, kun puee Unimbɔti nìn dàkā-bi u-pɔnŋu. 12 Bin ŋkúm kaa nìn kūūyee, ncaapa nìn cúú-bi, ní bi gbáń kunimbaau biilii áli an tin bàn̄ kutagbɔŋu.