Joosuwa Gbɔŋku 5

1 Amɔɔr yab bin kóò Jɔɔdan buŋŋu ŋwìiń jeetilaŋki púee bɔtiibi, nì Kanaan yab bin kóò ki pìlīǹ tiŋkuee bɔtiibi nìn gbìl̄ yii ti-Dindaan yāntì Jɔɔdan buŋŋu nyim fóotì Isirayeel yab kɔkɔ ŋúń ki dūtì. Niinee bi-pɔbiliŋ bíil̀, ní Isirayeel yab puee, bi nyùn̄ ŋkpatim.

Bi gíí Isirayeel yab bininjab kɔkɔ Giilgaal

2 Ŋyunti gbantee ní ti-Dindaan tùkū Joosuwa yii: «Kpítí ntaŋkpajimu kí gíí Isirayeel yab bininjab bin dáá sá binipɔmbee akpancan.» 3 Ní Joosuwa kpítì ntaŋkpajimu ki gíí Isirayeel yab bininjab bin dáá sá binipɔmbee kɔkɔ akpancan. Kí yòon̄ yaadal ní bi kíǹ ki yíì niin yii Giibeeyaati Aralɔti^a. 4 Kun yì-tì ní Joosuwa dāa gífí Isirayeel binipɔmbee sèé. Isirayeel nibul nín nìn nyánní Eejipiti tiŋkinee, bininjab bin kɔkɔ nìn bàn̄ kí cù kujaauee nìn kpíì nsanni, kuteeun. 5 Bin nìn yíkìń Eejipiti tiŋkinee kɔkɔ nìn pée gíí ní, ama ní mbininjabiyaamu mun bi dāa màl̄ nsanni kuteeunee, múǹ kaa gíí. 6 Di sá yii Isirayeel yab nìn gbíntì kuteeun ki bí ki yìiǹ míǹ ki tin sāā abin imuŋku ili, ní bi-kansikin bin nìn nyáń Eejipiti tiŋkin ki nìn bàn̄ kí cù kujaauee kɔkɔ dāa kpíì. Kun yì-tì bi nìn kpíì mimmee di sá yii baa nìn pílifì ti-Dindaan nyɔkɔ, ní ti-Dindaan nìn pūtì yii waa làá yàntī bí ká kitiŋ kin poon nnaabiim nì tisiil còol̀^b u nìn pōoǹ bi-naanjab yii u làá dūú tīī-tee. 7 Bi-jipɔmbi di yíkì ki fōō bi-yil. Bi-jipɔmbi gbanti ní Joosuwa nìn gíí akpancan, kun puee baa nìn gíiń-bi nsanni. 8 Bi gíí-bi míǹ ki dóòyee ní samaa kɔkɔ gbíntì dinaapaal pu niin ki kāl̀ áli ibuun dāa kpíì. 9 Ní ti-Dindaan bí Joosuwa yii: «Díǹ wiiŋŋu nee, m cúú Eejipiti tiŋki cooi in nìn bí ni-puee ki lēē.» An di yì-tì ní bi pú mpaan gbanti diyindi yii Giilgaal^c, ní bi dáá gbíntìi yíì-ŋu míǹ ki dāa sāā díǹ.

Dilákatil jiŋaaliu upeepeekaa un bi jíń Kanaaŋyee

10 Isirayeel yab nìn kāl̀ Giilgaal niin, Jeeriikoo tantakalin ní ki jíń Dilákatil jiŋaaliu uŋmal poon ŋwiin ŋubɔ kpá saalku dal kujoou. 11 Kutaa wúntèe ní bi kíĺ kitiŋ gbanti jinti dijil. Bi nìn púĺ kpɔnɔb bin baa ŋá ŋkpɔnɔnyɔkɔee nì bilee fiŋyi ki ŋmɔ́. 12 Ŋwiin ŋun bi jíń an jintee ní maana gbēeǹ kaa ti nyēeń kutaa pu ki lítiń. Dibindi gbanti ní Isirayeel yab kíĺ ki bíi jīǹ tijin tin lòoǹ Kanaan tiŋki puee^d.

Joosuwa nì ti-Dindaan janjakitil kpiliu

13 Dalba Joosuwa nìn bí Jeeriikoo tiŋki caŋin. U dāa pée yáatèe ní ki ká uninja ubɔ yú u-nyɔkɔpu, ki ŋúb́ njicál u-ŋaan. Joosuwa cōom̀ ki cūtì u-cee ní ki bālifì-u yii: «Sii sá ti-yɔu ubɔ naaa, a sá ti-nannanliu ubɔ ní?» 14 Ní unaaciinee kíí Joosuwa yii: «Aayee, maa sá bi-kansikin báà ubɔ! Man di sá ti-Dindaan janjakitil kpiliu. Kɔŋkɔnnee ní m bāań!» Niinee ní Joosuwa tātìi dōoǹ dicincibil ki jáam̀-u ní ki bí-u yii: «M-dindaan, ba ní a là yii man a-tɔntɔnliu ń ŋá ní?» 15 Ní ti-Dindaan janjakitil kpiliuee bí Joosuwa yii: «Cúú a-naatakaŋ kí tákatí, kun puee laakin a yú nee sá circir paaŋŋu pu ní^e.» Ní Joosuwa ŋá min ní u tùkū-u yii ú ŋée.