Dikàandi Gbɔŋku 35

Leefii naakookun yab timmu

1 Ti-Dindaan sòon̄ nì Mooyiisi Moowaab tantakal din pìlīǹ Jɔɔdan ki túĺ Jeeriikoo tiŋkee ki bí-u yii: 2 «Tùkù Isirayeel yab yii bí lēē bi-tinjaŋŋi poon ntimu kí tīī Leefii yab bí nīn kóò^a. Bí dū ntimuee kpaanceetii mun kí tīī-bi. 3 Bí nīn cáá ntimu ki kóò, ní ntimu gbanti kpaanceetii ń nīn sá ki tīī bi-naai nì bi-wanti nì bi-waŋkuti tin kíǹee kɔkɔ. 4 Ntimu mun ni làá tīī-bee kpaanceetii waaŋŋu ń nīn sá meetab alaataa aŋmoo kí màntīí tū kitiŋ gundi. 5 Ní ŋmàntī kitiŋ boon ŋwìiń nyalaŋki pú meetab kutuku, ŋgiil pú meetab kutuku, ŋgan pú meetab kutuku ní ŋwìiń jeetilaŋki pú meetab kutuku, ní kitiŋ ń nīn bí kansikin. Ikpaanceeti nín máaǹ kí nīn bí pu kí màntīí tū kitiŋee dee. 6 Ni yaa láa tīī Leefii yab ntimuee, ní dāá lēē ntimu muluu kí kūtì, mú nīn sá laakin ní ubɔ yaa kaa nyí ki kūū unil, ú sāǹ kí kɔ́ kí ŋmátée^b. Ní dāá kūtì-bi ntimu imuŋku ili nì muli. 7 Ntimu mun ni làá tīī-bee kɔkɔ dāa kpáfí ntimu imuŋku ili nì munii ní, mu nì mu-kpaanceetii. 8 Ni yaa làá lēē Isirayeel tinjaŋŋi poon ntimu kí tīī Leefii yabee, ní lēē bin timmu wīikée cee tikpil, ní kí lēē bin yɔmu kaa wīikée cee fiii. Kunaakoou kamaa ń lēē ku-timmu kí nóó nì ku-tinjandi din ku fōōyee nín sá puee kí tīī Leefii yab.»

Kitiŋ kin poon unikpɔl sáń kí kɔ́ee

9 Ti-Dindaan sòon̄ nì Mooyiisi 10 ú tùkù Isirayeel yab yii: «Ni yaa láa dūtì Jɔɔdan buŋŋu ki bàn̄ ki kɔ́ Kanaan tiŋkinee, 11 ní dāá lēē ntimu mubɔ, ubɔ yaa kaa nyí ki kūū unilee, ú sāǹ kí kɔ́^c. 12 Ntimuee di dāa sá un kūū unilee balilaŋki ní un nabiki bi kūūyee^d ń taa ŋmā kí kpɔ̀-u kí tɔ̀ ipɔntoon samaa kaa láá sòon̄ u-bɔti. 13 Ní dāá lēē ntimu muluu mun poon ní binib làá nīn sáń ki kóòyee. 14 Ní dāá lēē ntimu muta Jɔɔdan buŋgbandi lapu pu, ní kí lēē ntimu muta Kanaan tiŋkin. Ntimu gbantee ń nīn sá ni-balilaŋki. 15 Ntimu muluuyee làá nīn sá kibalilaŋ ki tīī Isirayeel yab nì binicambi bin kóò bi-ceeyee nì bisaŋkinliibi bin túutì bi-puee. Bi-kansikinee un kaa nyí ki kūū unilee ń sāǹ kí kɔ́ niin.

16 «Ubɔ yaa dū tikúti wanti ki fáá ki kūū unilee, u sá unikpɔl ní, bí kpɔ̀ udaan. 17 U yaa dū ditaŋkpal din ŋūǹ kí kpɔ̀ unilee ki yá u-juti ní u kpíìyee, udaan sá unikpɔl, bí kpɔ̀ u mun. 18 U yaa tí dū ndɔ ŋun ŋūǹ kí kpɔ̀ unilee ki tɔ́ u-juti ní u kpíìyee, udaan sá unikpɔl, bí kpɔ̀ u mun. 19 Unil un bi kūūyee nabiki kin máaǹ kí tɔ̀ ipɔntoonee di máaǹ kí kpɔ̀ unikpɔlee kí tɔ̀ ipɔntoon. Laakin ní u yaa pée ká-uee, u ŋūǹ kí kpɔ̀-u. 20 Án yaa sá nì kináŋ ní ubɔ téé u-juti mpɔn ní u lítì ki kpíì, àá u díkí-u tiba pu ní ki dū tiba ki fáá-u ní u kpíìyee, 21 án yaa ti sá nì kudɔ̀ŋu ní u fáá-u ní u kpíìyee, un kūū u-jutee máaǹ ŋkúm, u sá unikpɔl ní. Un u kūūyee nabiki kin máaǹ kí tɔ̀ ipɔntoonee yaa pée ká-u laakiŋyee, ú kpɔ̀-u kí tɔ̀ ipɔntoon.

22 «Ama án yaa sá yìkíl̄ yikil, waa ná-u, kudɔ̀ŋu kubɔ mun kpá bi-kansikin ní u téé udaan àá u dū tiba ki yá-u ní an dūu kpántì ŋkúmee, 23 àá ditaŋkpal din ŋūǹ kí kpɔ̀ unilee ní u tɔ́, ama ní kaa nyí yii ubɔ bí laakin u tɔ́ ditaŋkpalee ní an cúú ubɔ ní udaan kpíì. An yaa kaa sá yii u ná-u àá u là kí ŋá-u tikpitil tibee, 24 samaa ń kpāfì kí dī mara nee pu kí sòoǹ kí ŋāŋkì un kūū unil kaa nyée nì un làá tɔ̀ ipɔntoonee kansikin. 25 Samaa ń fīī un kɔ́ tibɔtinee un làá tɔ̀ ipɔntoonee ŋaan, ní kí gíiǹ-u kitiŋ kin poon bin kūū binibee sáń ki kóòyee.

«Ú nīn bí niin kí nīn cí usaraaŋakpil un bi lēē ki dū ŋkpam ki sītì u-puee yaa láa kpíìyee. 26 Ama unikpɔlee yaa nyáń kitiŋ kin bi lēē bí nīn sáń ki kóòyee poon, 27 ní un làá tɔ̀ ipɔntoonee ká-u laaba, kaa sá kitiŋ kin bi sáń ki kóòyee poon ní ki kūū-uee, waa ŋá ikpiti. 28 An sá unikpɔlee ń gbíntí kí nīn kā kitiŋ kin poon u sáǹ ki kɔ́ee kí nīn cí usaraaŋakpil kúm. Úǹ kúm boonee, u ŋūǹ kí gítiń u-tiŋkin.

29 «Tibɔti nee ń nīn sá dibɔkpaal ki tīī ni nì ni-biyaamu, laakin kamaa ni yaa bàn̄ ki làá nīn kóòyee.

30 «Báà nnikpaakoon yaa pée yāntì ki sá ŋuŋyee, ní ká biseeradambi ń nīn wīikí kí wàatī kí nín kpɔ̀ unikpɔl. Ní taa kpɔ̀ ubɔ unibaanti seerau pu^e. 31 Ní taa fōō kunimbiŋmiiu kubɔ un kūū unil ki máaǹ ŋkúmee cee kí gíiǹ-u kí líí, ní kpɔ̀-u. 32 Ní taa tí fōō u-cee animbil kí dàkà-u nsan ú sāǹ kí cùú kɔ́ kitiŋ kin poon binikpɔliibi sáń ki kóòyee, àá kí yàntī ú gítiń kí nīn kóò u-tiŋkin ŋyunti ŋun ní usaraaŋakpil kaa láá kpíìyee.

33 «Ní taa láa kɔ́ǹ kitiŋ kin poon ni làá dāá nīn kóòyee tijɔkɔndi. Di sá yii fatiku di kɔ̄ntí kitiŋ tijɔkɔndi. Tiba kaa ŋūǹ kí fíntí un bi kūūyee fatikuu, see un kūū-uee fatikuu baba di ŋūǹ kí fíntí. 34 Ní taa láa kɔ́ǹ kitiŋ kin poon ni làá dāá nīn kóòyee tijɔkɔndi, kun puee m kóò ki-poon ní. Di sá yii man di sá ni-Dindaan, ní ki kóò Isirayeel yab kansikin.»