Fitilab yóontam bɔti
8
1 Ti-Dindaan bí Mooyiisi 2 ń tùkù Aarɔn yii: «A yaa làá yóoń fitilab circir kɔŋkooŋŋunee, á yàntī bi-walifiŋu ń nīn ŋmíntí fitilab bilulee tɔ́kɔŋkaati nimbiin pú.» 3 Ní Aarɔn ŋá kii ti-Dindaan nín tùkū Mooyiisi yii ú ŋá puee. U nìn dū fitilabee ki yóoǹ min ní án làá nīn ŋmíntí fitilab tɔ́kɔŋkaati nimbiin púee. 4 Bi nìn dū sindaariya ní ki mɔ́ɔ́ fitilab tɔ́kɔŋkaati, kí yòon̄ taapu ki cáá sāā ikpiin. Bi nìn mɔ́ɔ́ fitilab tɔ́kɔŋkaati kii ti-Dindaan nín nìn dàkā Mooyiisi yii ú mɔ́ɔ́-bi puee ní.Bi dū Leefii yab ki sú Unimbɔti
5 Ti-Dindaan bí Mooyiisi yii: 6 «Á gàntī Leefii yab Isirayeel yab kansikin kí bɔ́ntí-bi bí nīn bí circir. 7 A nín làá ŋá-bi pu ní bí nīn kíǹ ki bí circiree sɔ̀. Á dū nnyim min bi cáa fíntí ki lèekī ikpitee kí yɔ̄kɔfì bi-pu, kí yàntī bí kòol̀ bi-wunti pu kuti kɔkɔ ní kí fíntí bi-wampeeŋkaati. Bi yaa ŋá mimmee, bi kpántì circir dee. 8 Boonee ní bí cáań unaja nì ŋyim min bi búuń ŋkpaminee, ní sii a-ba ń yòon̄ unajaliliiti un sá bí dūú ŋá ikpiti pɔ̄tam saraauee. 9 Á yàntī Leefii yab ń sútiń kí yūĺ circir kɔŋkooŋŋu nyɔkɔpu, ní kí yíiń Isirayeel samaau kɔkɔ kí kpāfì. 10 Á yàntī Leefii yab ń sútiń kí yūĺ m-nimbiin ní Isirayeel yab ń dū bi-ŋalii kí páań bi-pu. 11 Ní Aarɔn ń dū-bi kí sú-mi kii saraa ní Isirayeel yab ŋá ki tīī-mee, ní bí nīn kíǹ ki sá bin bi gāntì bí nīn tūǹ man tundee. 12 Leefii yab ń dū bi-ŋalii kí páań inajaayee yiliŋ pu ní á dū unaja ubɔ kí ŋá ikpiti pɔ̄tam saraau kí tīī-mi, ní kí dū un kíǹee kí ŋá saraawɔkaa. Míǹ boonee ní Aarɔn ń ŋá dikoobil din u máaǹ kí ŋée Leefii yab pu ní bí ká bi-kpitii pɔ̄tam. 13 Míǹ boonee ní á yàntī Leefii yab ń yūĺ Aarɔn nì u-jipɔmbi nimbiin, ní á dū-bi kí sú-mi. 14 Mimmee a gāntì Leefii yab Isirayeel yab kansikin dee, bí nīn kíǹ ki sá man yab. 15 Kí yòon̄ ŋyunti gbantee ní Leefii yab ŋūǹ kí kɔ́ dikpafindi tantiu poon kí nín tūǹ bi-tuuŋŋi.
«Míǹ ní an sá á dī kí ŋá Leefii yab circir ní kí dū-bi kí sú-mi. 16 Di sá yii Isirayeel yab kansikinee, bíǹ ní bi dūu sú-mi kɔkɔ. Ní ḿ fōō-bi Isirayeel yab biseebiyaamu nninjabiyaamu kɔkɔ yil pu. 17 Di sá yii Isirayeel yab biseebiyaamu nninjabiyaamu kɔkɔ ki kpáaǹ bi-waŋkuti biseebiyaamu njamu kɔkɔee, man di yì. Kí yòon̄ daliŋkin m kūū Eejipiti tiŋkin mbiseebiyaamu nninjabiyaamuee ní m dū Isirayeel yab biseebiyaamu ki sú m-baa. 18 M yōoǹ Leefii yab ní ki dūu kpántì Isirayeel yab biseebiyaamu nninjabiyaamu. 19 M lēē-bi Isirayeel yab kansikin ki dū-bi ki tīī Aarɔn nì u-jipɔmbi. Bi làá nīn bí dikpafindi tantiu poon ki tūǹ ditundi ki tìì Isirayeel yab bin kíǹee, ní kí nīn ŋáań Isirayeel yab pu akoobil nín sá puee bí ká bi-kpitii pɔ̄tam. Mimmee Isirayeel yab kaa ti sútí kí pìl̄ circir kɔŋkooŋŋu ní kaa nín kpíì.»
20 Mooyiisi nì Aarɔn nì Isirayeel yab kɔkɔ nìn ŋá Leefii yab pu kii ti-Dindaan nín nìn tīī Mooyiisi mara ú ŋá puee deedee. 21 Leefii yab nìn ŋá tin kɔkɔ pée sá bí ŋá kí kpántí circiree, ki fíntì bi-wampeeŋkaati. Boonee ní Aarɔn dū-bi ki sú ti-Dindaan, ní ki ŋá akoobil nín sá puee bí kpántí circir. 22 Míǹ boon ní Leefii yab kíĺ bi-tuuŋŋi dikpafindi tantiun. Aarɔn nì u-jipɔmbi di nìn kpòotī-bi atuun gbanti poon. Ti-Dindaan nín nìn tīī Mooyiisi mara yii bí ŋá Leefii yab puee, míǹ deedee ní bi nìn ŋá.
23 Ti-Dindaan gíti bí Mooyiisi yii: 24 «Leefii yab ń nīn cáá abin mmuŋku nì aŋmoo ní kí nín kíĺ ditundi dikpafindi tantiun. 25 Bi yaa tin bàn̄ abin imuŋku ili nì saalaayee, bí gbèen̄ kí taa ti tɔ̄ ditundi. 26 Bi dāa ŋūǹ kí tūtuǹ bi-nabiyaamu circir kɔŋkooŋŋu poon atuun, ama baa dāa sá bin bi tìì atuun aba bí tɔ̄ee. Án nín sá á bɔ́ntí atuun min kí tīī Leefii yabee dee.»