Dinyeel 11

Babeel difɔkɔku bɔti

1 Dooooyee, kitiŋ kɔkɔ pu nib sooŋyi nìn sá ibaanti ní anyɔɔbun nìn sá abaanti ní bi sòoǹ. 2 Ní bi dāa yíkì ki túĺ ŋwìiń nyalaŋki pú, ki tin bàn̄ ki ká kitiŋ kin bi yíì Siinaaree laaba tèen̄ ní bi gbíntì niin ki kāl̀. 3 Niin ní bi bí ní ki lī tɔb yii: «Ti-yab, ní càmaan tí gíí brikisib kí wúb́!» Míǹ ní brikisib nìn kpántì-bi ataŋkpee, ní aŋɔ kpántì ntancookikaam. 4 Bi nìn gíti lī yii: «Ní càmaan tí náań kitiŋ, kí mā kudifɔkɔu kubɔ. Tí ŋámaan míǹ kí nyā diyindi kí taa yàl̄ ti-ba ti-ba kitiŋ kɔkɔ pu.»

5 Ní ti-Dindaan sīntìń kí kpèè kitiŋ nì kudifɔkɔu kun binib bí ki māāyee. 6 Ní ki bí yii: «Kpèèmaan! Binib nee sá unibaanti ní ki sòoǹ isoombaanti. Bi nín kíĺ ditundi din nee, tiba kpá kí lìkin̄-bi bí gbèen̄ tin bi bóob́ yii bi làá ŋée. 7 An puee tí cù kí ŋmàlim̀ bi-sooŋyi fìkil fikil ń kɔ́, bí taa ti nín̄ gbìl̀ tɔb liŋfii.» 8 Míǹ ní ti-Dindaan ŋá ní ki yāaǹ-bi, ní bi yàl̄ ki gbí kitiŋ kɔkɔ pu, ní bi-tiŋki gbanti náantam gbíntì. 9 An pu ní bi pú kitiŋ gbanti diyindi yii Babeel, kun puee niin ní ti-Dindaan kpántì binib sooŋyi bí taa ti nín̄ gbìliǹ tɔb, ní ki yāaǹ binib bi yàl̄ ki gbí kitiŋ kɔkɔ pu.

Seem naantiibi bɔti

10 Seem naantiibi bɔti sɔ̀. Nnyiŋgbeen jítì abin ali boonee, ní Seem màl̄ Aripakisaadi. Ŋyunti gbantee, u nìn cáá abin dilaataal. 11 Aripakisaadi màaltam boonee, Seem gíti ŋá abin alaataa aŋmoo ní. U nìn gíti màl̄ mbininjabiyaamu nì nnimpubiyaamu ki kútì.

12 Aripakisaadi nìn cáá abin mmuŋku nì saalaa nì aŋmoo ní ki màl̄ Seera. 13 Seera màaltam boonee, Aripakisaadi gíti ŋá abin alaataa anaa nì abin ata ní. U nìn gíti màl̄ mbininjabiyaamu nì nnimpubiyaamu ki kútì.

14 Seera nìn cáá abin mmuŋku nì saalaa ní ki màl̄ Eebeer. 15 Eebeer màaltam boonee, Seera gíti ŋá abin alaataa anaa nì abin ata ní. U nìn gíti màl̄ mbininjabiyaamu nì nnimpubiyaamu ki kútì.

16 Eebeer nìn cáá abin mmuŋku nì saalaa nì anaa ní ki màl̄ Peeleegi. 17 Peeleegi màaltam boonee, Eebeer gíti ŋá abin alaataa anaa nì abin mmuŋku nì saalaa ní. U nìn gíti màl̄ mbininjabiyaamu nì nnimpubiyaamu ki kútì.

18 Peeleegi nìn cáá abin mmuŋku nì saalaa ní ki màl̄ Reewu. 19 Reewu màaltam boonee, Peeleegi gíti ŋá abin alaataa ali nì abin awa ní. U nìn gíti màl̄ mbininjabiyaamu nì nnimpubiyaamu ki kútì.

20 Reewu nìn cáá abin mmuŋku nì saalaa nì ali ní ki màl̄ Seerugi. 21 Seerugi màaltam boonee, Reewu gíti ŋá abin alaataa ali nì abin aluli ní. U nìn gíti màl̄ mbininjabiyaamu nì nnimpubiyaamu ki kútì.

22 Seerugi nìn cáá abin mmuŋku nì saalaa ní ki màl̄ Naakɔɔr. 23 Naakɔɔr màaltam boonee, Seerugi gíti ŋá abin alaataa ali ní. U nìn gíti màl̄ mbininjabiyaamu nì nnimpubiyaamu ki kútì.

24 Naakɔɔr nìn cáá abin mmuŋku nì awa ní ki màl̄ Teeraki. 25 Teeraki màaltam boonee, Naakɔɔr gíti ŋá abin dilaataal nì diba kpá mmuŋku ní. U nìn gíti màl̄ mbininjabiyaamu nì nnimpubiyaamu ki kútì.

26 Teeraki nìn cáá abin imuŋku ita nì saalaa ní ki màl̄ Abram nì Naakɔɔr nì Aran.

27 Teeraki biyaamu bɔti sɔ̀. Teeraki màl̄ Abram nì Naakɔɔr nì Aran, ní Aran màl̄ Looti. 28 Aran baa Teeraki dáá kā ní Aran kpíì Uur, Kaaldee tiŋki kin poon bi màl̄-uee. 29 Ní Abram nì Naakɔɔr cáá binimpoobi. Abram nimpuu ní bi yíì Saarayi, ní Naakɔɔr nimpuu sá Aran bisal Miilka. Aran biyaamu di sá Miilka nì Yisika. 30 Saarayi úǹ nìn sá uŋmaŋŋmanti ní, waa nìn cáá kibiki.

31 Ní Teeraki yōoǹ u-jipɔɔn Abram nì u-naantiiu Looti, Aran jipɔɔn nì u-coopu Saarayi, Abram nimpuu. Bi-kɔkɔ yíkì Uur, Kaaldee tiŋkin ki nín cá Kanaan tiŋkin. Bi bàn̄ Kaaran tiŋkinee ní ki gbíntì niin. 32 Teeraki ŋá abin alaataa ali nì abin aŋmoo ní ki kpíì Kaaran tiŋkin.