Dinyeel 9

Unimbɔti pōoǹ Noowa dipoondi

1 Unimbɔti bīiǹ Noowa nì u-jipɔmbi boon ní ki bí-bi yii: «Ní màal̀ kí bùtī kí gbí kitiŋ. 2 Kitiŋ pu waŋkuti kɔkɔ, nì kitiŋ pu peelii kɔkɔ, nì inoon kɔkɔ, nì tin kɔkɔ fù kitiŋ puee nì ijɔm kɔkɔ làá nīn fàŋkí-ni ní yɔ́kɔ́ yɔkɔ. Tiwan gbanti kɔkɔee, m dūu ŋá ni-ŋaan. 3 M tīī-ni tin kɔkɔ pée bí ki cáá kufoouee án nīn sá-ni tijin, kii m nín nìn tīī-ni timool tin kɔkɔ lòoǹ ibee puee. M dū kɔkɔ ki tīī-ni án nīn sá ni-jinti. 4 Ama ní taa ŋmɔ́ kuwaŋkuluu kun baa lāntì fatiku nyáńee nanti, kun puee kuwaŋkuluu fatikuu di yì ku-maŋfal^a. 5 Ní nīn nyí yii m làá dāá bàlifì ni-fatikuu un sá ni-maŋfalee pu. Upeel un kamaa yaa cúú unilee, m làá dāá bàlifì-u unil gbanti fatikuu pu. Míǹ ní unil un kamaa yaa kūū u-jutee, m làá dāá bàlifì-u u-juti gbanti maŋfal pu.

6 Unimbɔti náań unil ki nántiǹ u-ba ní,

míǹ puee un di yaa kūū unilee,

u-nijuti di làá kpɔ̀ u mun^b.

7 Ama nimbee, ní màal̀ kí bùtī kí gbí kitiŋ pu.»

8 Ní Unimbɔti gíti bí Noowa nì u-jipɔmbi yii: 9 «Mamee, man pōoǹ-ni dipoondi, nimbi nì ni-naantiibi 10 nì tin kɔkɔ bí ni-cee ki cáá kufoouee, an dàkà yii inoon nì tiwaŋkuti nì ipeel nì tin kɔkɔ pée nyáń meelan ki cáá kufoou ki bí kitiŋ puee. 11 Dipoondi din m pōoǹ-nee sɔ̀. Maa làá ti yàntī nnyiŋgbeen ń dāá kúntí tiwan tin kɔkɔ cáá kufoouee tiba kitiŋ pu.» 12 Ní Unimbɔti gíti kútì ki lī yii: «Kudaaŋŋu kun dàkà báà ŋma dipoondi din dɔ̄ man nì nimbi nì tin kɔkɔ cáá kufoou ki bí ni-ceeyee, nì inifunaan in dāa bí ki dòońee kansikinee sèé: 13 «M dū m-kuntinyindi ki làl̄ atagban pu án nīn sá kudaaŋŋu yii dipoondi dɔ̄ man nì kitiŋ kansikin. 14 M yaa láa pée yāntì utaa yíiń ní dikuntinyindi nyáń ki làl̄ atagban puee, 15 m làá dāá téetí dipoondi din dɔ̄ man nì ni nì tin kɔkɔ cáá kufoouee kansikinee pu. Di sá yii nnyiŋgbeen kaa ti bí kí dāá kúntí tin kɔkɔ cáá kufoouee. 16 Dikuntinyindee yaa nyáń ki làl̄ atagban pu m wál̀-dèe, ní ḿ téetí dipoondi din dɔ̄ kí nīn cá jaanjaan, man Unimbɔti nì tin kɔkɔ cáá kufoou ki bí kitiŋ puee kansikinee pu.» 17 Ní Unimbɔti bí Noowa yii: «Dikuntinyindi di sá dipoondi din dɔ̄ man nì tin kɔkɔ cáá kufoou ki bí kitiŋ puee kansikinee daaŋku.»

Noowa nì u-jipɔmbi bɔti

18 Noowa jipɔmbi bin nìn nyáń meela poonee di sá Seem nì Kaam nì Jaafeeti. Kaam di màl̄ Kanaan. 19 Noowa jipɔmbi bitee di màl̄ ki gbéeǹ kitiŋ.

20 Noowa kíĺ tikpaal dikpɔ̀l ní ki cóoǹ fiinyi. 21 Dalbee ní u nyùn̄ fiinyi subiliŋ daam ki gbí ní ki dɔ̄ u-tantiu poon dicancaŋgbeel. 22 Kaam un sá Kanaan baayee ká u-baa nín dɔ̄ dicancaŋgbeel puee, ní u nyáń ki tùkū Seem nì Jaafeeti. 23 Niinee ní Seem nì Jaafeeti kpàlīń tɔb bili, ki dū dibɔkutikpaandi ki páaǹ bi-gbigbipati pu ki túlifìń bi-boon ki cáań ki bīiǹ bi-baa pu. Baa fātì bi-nimbiin kí kpèè bi-baa, ní kaa nín wál̀ u-cooi. 24 Ndaam dāa cēetì Noowa pu u fīntèe ní ki béè u-bijoolkaaki nín ŋá-u miŋyee. 25 Niinee ní u bí yii:

«Mbusu ń kɔ́ Kanaan.

Iyumbu yumbuu

ní u làá nīn sá ki tīī u-mambi!»

26 Ní ki gíti bí yii:

«Tí nyɔ̄ŋkì ti-Dindaan un sá Seem Nimbɔtiuee!

Kanaan úǹ ń nīn sá Seem yumbuu!

27 Unimbɔti ń yàntī Jaafeeti

ń bùtī kí nīn kóò Seem tantibin,

Kanaan úǹ ń nīn sá bi-yumbuu!»

28 Nnyiŋgbeen boonee, Noowa gíti ŋá abin alaataa ata nì imuŋku ili nì abin saalaa ní. 29 Noowa biŋŋi kɔkɔ nìn kpáfì abin alaataa awa nì imuŋku ili nì abin saalaa, ní u nín kpíì.