4
1 Maigpit ko ikang minamandaan Timoteo sa ngaran ka Diyos sagkud ni Cristo Jesus, na omaabot bilang hadi sagkud mig-osgar ka ngamin na tawo boway man o guraan. 2 Ipangadal mo a oosipun ka Diyos, magin anda ika sa ngamin na oras, napapanawon man o buku, itolid mo sira, pagsabiyan sagkud pakusugun, magtiyaga ika saigo sa pagtottoro. 3 Ta a panawon omaabot na a manga tawo diri na mig-irungug ka tamang katottoroan, ta diri sira nagsasawang mag-irungug ka manga bagong katottoroan. Alagad amo na nira kokoyogon a sadiring kagostowan, kaya migtipon sira sa dakul na manga paratottoro na migtottoro ka gosto sana nirang marungug. 4 Babayaan nira a kamatoran sagkud iirunggun a manga istoryang gibogibo sana sa tawo. 5 Alagad ika magin mapagpugul sa sadiri sa ngamin na sitwasyon, pagtiusan mo a manga kadipisilan, ipangadal a Maraay na Bareta sagkud gibowon a ngamin mong gigibowon bilang sirbidor ka Diyos.
6 Ta innabot na a panawon ka kagranan ko, arug sa usad na atang na dinadara na sa altar. 7 Nakilaban ako sa maraay, natapos ko na so dadalaganun ko, padagos akong nagin maimbod sa pagtobod. 8 Ngowan nag-uulat na kanaku a korona ka katanosan, na itatao kanaku ka Kagorangnan na matanos na Hokom sa dakulung alduw ka kanyang pagbabalik, buku sana kanaku kindi sadto ngamin na nagmamawut ka pagbalik niya.
Personal na Oosipun
9 Gibowon mo a pinakamagiginibo mo na makaiyan tolos sadi kanaku, 10 ta si Demas, holi sa pagkabuut sa manga bagay sadi kinaban, binayaan ako sagkud inniyan na sa Tesalonica. Si Cresente inniyan na man sa Galacia sagkud si Tito sa Dalmacia. 11 Si Lk. na sana a kaiba ko sadi. Ipag-iba mo man si Marcos ta dakulu a maitatabang niya sa manga ginigibo ko. 12 Si Tiquico pinaiyan ko na sadto Efeso. 13 Ka pag-iyan mo sadi, darawun mo so pang-alikbuy ko na natagak ki Carpo sadto Troas, pati so manga libro ko orog na so gibo sa anit.
14 Malangraut ko ginibo kanaku ni Alejandrong panday. A Kagorangnan a bomabalus kanya oyon sadto ginibo niya. 15 Magmaan ika kanya ta mala niya ka kontra ka ipinagtotottoro ta.
16 Uda basang inniba kanaku, ko ona kong pag-atobang sa korte, kindi binayaan nira ako ngamin. Patawarun logod sira ka Diyos. 17 Alagad diri ako pinabayaan ka Diyos, sagkud tinawan niya ako sa kusug, tanganing maipaayag ko saigo a Maraay na Bareta sa manga bukung Judio. Sagkud nakaligtas ako sa kagranan. 18 Ililigtas ako ka ka Kagorangnan sa ngamin na maraut sagkud dadarawun akong ligtas sa kanyang kahadian. Mapakanya logod a ngamin na kaomawan anggan pa man! Amen.
Oltimong Pangongomosta
19 Ikomosta mo ako sa mag-agom na Priscila sagkud Aquila sagkud sa pamilya ni Oniseforo. 20 Si Erasto natagak sa Corinto, sagkud itinagak ko si Trofimo sa Mileto ta nag-iilang. 21 Gibowon mo a pinakamagiginibo mo na makaiyan tolos sadi bago mag tag-agnuw. Kinokomosta ika nira Eubolo, Pudente, Lino, Claudia sagkud ka ngamin na kangoran sa pagtobod.
22 Mapakanimo logod a Kagorangnan, pati na a kanyang bendisyon.