6
1 Kaipowan na igalang ka manga oripun na paratobod a kandang among, tanganing uda masabing maraut kontra sa ngaran ka Diyos sagkud sa kanatung manga katottoroan. 2 A manga oripun na agko among na paratobod diri kinakaipowan na magtomang, ta sira manga paratobod man. Kindi, kaipowan na pakarayun nira a pagsirbi kanda, ta a nakikinabang ka pagsirbi nira manga paratobod na kandang nabubutan. Amo adi a kaipowan mong itottoro sagkud ipagibo kanda.
A Pagkabuut sa Kwarta
3 A siisay man na tawo na nagtotottoro sa ibang katottoroan sagkud bukung oyon sa matood na oosipun ka kanatung Kagorangnan na si Jesu Cristo, sagkud a katottoroan manungud ka pagkoyog sa Diyos 4 maablada sagkud uda naiintindiyan. Ogali na niya a magparapakidiskotir sagkud magparapanngatongato manungud sa ono man na bagay, na amo a pinagpoponan ka pagkaori, pagkakasogot, pagpapakaraut, pananawut, 5 sagkud pagparapakidiskotir sa manga tawong maraut a kaisipan na diri nakabibisto ka kamatoranan, sagkud inuuna nira na a kabanalan paagi sa pagpapayaman.
6 Sabagay a tawo na namomoway sa kabanalan sagkud tattaong makontento daug pa a mayaman. 7 Ta uda kita dorodarang onoman pag-abot sadi kinaban. Uda man kita madadara paggalin ta sadi kinaban. 8 Kaya makontento na kita kin agko kita kinakaun sagkud binabado. 9 A tawong nagmamawut na yomaman naoolog sa pagkakasala sagkud nasisiud ka manga uda kamutangan na gibo na pwedeng makakulug kanya sagkud magdara sa karatan sagkud kapaamakan. 10 Ta a pagkabuut sa kwarta amo a pinagpoponan ka ngamin na karatan. Agko nagkapirang tawo holi sa pagkabuut sa kwarta binayaan so kandang pagtobod sagkud nagtao adi kanda sa dakulung kamunduan.
Tinogon ni Pablo si Timoteo
11 Alagad ika na nagsisirbi sa Diyos, magmaan sa ngamin na bagay na adi. Ingowaun mong mamoway sa katanosan, kabanalan, pagtobod, pagkabuut, pakatius sagkud kabuutan. 12 Gibowon mo a ngamin mong magiginibo sa pakikipaglaban alang-alang sa pagtobod tanganing makoko mo a boway na uda kasagkuran, ta sa boway na adi ika binaoy ka Diyos ko ipaayag mo sa atobangan ko dakul na tawo na testigo ka kanimong pagtobod ki Cristo Jesus. 13 Maigpit ko ikang minamandaan sa atobangan ka Diyos na nagtatao ka boway sa ngamin, sagkud ni Cristo Jesus nagpatonay ka kamatoranan sa atobangan ni Poncio Pilato: 14 Koyogon mo a manga iminamanda kanimo na uda katatsaran anggan sa omabot a kanatung Kagorangnan na si Jesu Cristo. 15 Sa tamang panawon iaayag si Cristo galin sa langit ka dakulu sagkud makapangyariyan na Diyos, a Hadi ka manga hadi sagkud Kagorangnan ka manga kagorangnan. 16 Ta iya sana a uda kagranan sagkud naboboway sa diri maraporapoan na liwanag. Sa kanya a kaomawan sagkud kapangyariyan na uda kasagkuran! Amen.
17 Pagsabiyan mo a manga mayayaman sadi kinaban na diri sira magin mapagpalangkaw, diri magsarig sa kayamanan na uda man kasigoradowan, kindi sa Diyos na nagtao kanatu ka ngamin na bagay na kanatung ikaoogma. 18 Tottoroan mo sirang gomibo sa maraay, magpakayaman sa maraay na gibo, magin matinao sagkud matinabang. 19 Sa paaging adi, makatitipon sira sa kayamanan para sa kandang sadiri bilang masarig na pondasyon para sa omoabot na panawon, tanganing magkaagko ka tonay na boway.
20 Timoteo, maanan mo a manga bagay na ipinagkatiwala kanimo. Likayan mo a manga orosipan na uda kamutangan na inuuna ka iba na kadonongan, alagad kontra sa tamang katottoroan. 21 Holi ka arug kan na pagdodonongdonongan nira, nauda logod sira sa pagtobod.
Mapakaninyo logod a bendisyon ka Diyos.