Dɔɔraa tisi cirbəə bɩrɛ
20
Bɩ jɛ ʊ bɩ,
mɔɔ malɛɛka deem yɩ an a to brama an nɩ zerm.
A n nɩ yaa gandaa k'a nɔ tɛkka ba ʊ bɩ lɛ nyɩ m,
kan baŋŋa gandaa kɩ a wɔ ʊ.
2 A mɩnda gʊta bɩ nyasʊ,
mɩm gusire bɩ,
n n'a birm minkagʊaarazaa gɛɛ Sʊtaana bɩ,
a lɛ taa k'a hɩ,
a ʊ,
jɩm bɩ,
an a sur dɔɔraa tisi minto.
3 A n a nyɔɔ an a da yaa gandaa k'a nɔ tɛkka ba ʊ b'ʊ,
an a lɛ bɩ ta,
an a nyɩ da ʊ,
an a naasʊ,
k'a b'a da ma dʊntɔ,
an bra ba tararɔ wɔɔ nɩ y,
kʊ dɔɔraa tisi bɩ n ta an a ku.
Bɩ jɛ ʊ bɩ,
a a ga m,
kʊ n n wɔ saa ma dɔmɩm poore minto.
4 Bɩ jɛ ʊ bɩ,
mɔɔ cirbəəduuro yɩ.
Gʊɔɔ kʊ ŋ nɩ nyɩntarɛ ŋ la rɔ wɔɔ,
n paŋŋa ka ŋ ʊ kʊ ŋ nɩ gʊɔɔ dʊdɔ ka.
Mɔɔ gʊɔɔ kʊ n yɩ ŋ mim gʊngʊ ma Yeezuu kasɛtɩ karɛ kan Woso lemim kɩ minto rɔ wɔɔ nyiro yɩ sɔ,
kan gʊɔɔ kʊ ŋ n hɔturma bɩ gɛɛ a bɔkʊrɛ bɩ kɩ da ʊ,
bɩ ŋ n makra yɩ a tusə ma gɛɛ a wɔ kɩ ma rɔ wɔɔ nyiro kɩ sɔ.
Ŋ y'a mɩm bɔ ʊ,
ŋnɩ bɩ cirbəə bɩ dɔɔraa tisi nɔ ʊ kan Krista kɩ.
5 Gəəno gɔsɩnnɔ wɔɔ b'a bɔrɛ ŋnɩ bʊr mɩsɩrbaa nɔ ʊ kʊ dɔɔraa tisi bɩ n a ku y.
Lɛɛkarɛ mɩmbɔʊrɛ m bɩ.
6 Gʊɔɔ kʊ ŋ nɩ lɛɛkarɛ mɩmbɔʊrɛ bɩ nɔ ʊ rɔ wɔɔ,
mimbirenyɩntazannɔ m,
wosogʊɔɔ m sɔ.
Zɛ hɩɩya hɔ bɩ paŋŋa ba ŋ zi y.
Ŋ nyɩntam Woso kan Krista kɩ mannɩbənno.
Ŋ cirbəə bɩm kan kɩ dɔɔraa tisi bɩ nɔ ʊ.
Sʊtaana darɛ
7 Kʊ dɔɔraa tisi b'a ku,
n Sʊtaana bɔrɛ a dujɩ ʊ b'ʊ.
8 Bɩ,
a tarɛ an aa bra ba tararɔ kʊ ŋ nɩ durnya gʊrga siro wɔɔ ʊ rɔ wɔɔ m,
Gɔg kan Magɔg kɩ m.
A yɩ ŋ som kʊ ma yar bɩ barɛ minto.
Ŋ lɛ gʊtabaa do m higʊta nyɩntaayaa m.
9 Ba ŋ y'a kərgu durnya burə ʊ jilli,
ŋnɩ bɩr wosogʊɔɔ wɔɔ bɩncɛ bɩ ma kan kʊ kʊ Woso a ŋʊa bɩ kɩ ma na.
Bɩ,
sɛ a to brama,
an ŋ bɩ.
10 Bɩ,
minkagʊaarazaa k'a nɩ bra barɛ ŋ nɩ bɩ,
n y'a nyɔɔ,
n n a da sɛ haarɛ kʊ kidibir sɛ nɩ bɩŋ ʊ b'ʊ,
hɔturma bɩ kan hɔdɔrɛŋʊaarzaa bɩ kɩ zi.
Ŋ fɩr yɩm b'ʊ gʊta sinuu ʊ kan a gunuu ʊ kɩ,
dɔɔraa k'a nyarɛ ba ʊ nɔ ʊ.
Dʊdɔkarɛ
11 Bɩ jɛ ʊ bɩ,
mɔɔ cirbəəduu gʊta yɩ fu,
a zaa nɩ nyɩntam la.
Brama kan tara kɩ n nyaam a lɛɛ fɩɩgaa.
12 Mɔɔ gəəno yɩ sɔ,
gʊɔɔ gʊtɔɔ kan gʊɔɔ poorero kɩ,
ŋn'ɩ jɩnɩm cirbəəduu bɩ lɛ ʊ.
N n ciro gʊngʊ,
n n a ya,
n nɩ ci vanta gʊ:
mɩsɩrbaa ci bɩ.
N n gəəno wɔɔ dʊdɔ yar an a gakʊ ʊ ba kan ŋ zibəəro kɩ,
amba n y'a gʊrsɩra ba ciro wɔɔ nɔ ʊ bɩ m.
13 Higʊta,
zɛ kan gəənokʊ kɩ a gəəno bɔ a rɛ.
Ŋ gʊaa biyəə dʊdɔ ka an a gakʊ ʊ ba kan a zibəə kɩ.
14 Kɛɛrɛ bɩ,
n zɛ kan gəənokʊ kɩ nyɔɔta n nɩ ŋ da sɛ haarɛ b'ʊ.
Sɛ haarɛ bɩ do m zɛ hɩɩya hɔ bɩ.
15 Gʊaa kʊ n n'a tɔ yɩ mɩsɩrbaa ci b'ʊ bɩ,
bɩ n y'a nyɔɔta,
n n a da sɛ haarɛ b'ʊ.