Babɩlɔnnɩ darɛ bʊr heernyɔɔ m arzana ʊ
19
Bɩ jɛ ʊ bɩ,
mɔɔ gʊaa cir gʊta leer paŋŋazaa ma brama ʊ,
an n'a hɩrɛ,
a ʊ:
«K'a Woso da ʊ!
Bʊmbɔrɛ,
kan cirbəə kɩ,
paŋŋa gʊta kɩ bɩ,
wɔɔ Woso hɔɔ m.
2 A dʊdɔkarɛrɔ mɩŋŋa,
ŋnɩ tɩrga.
Bala,
a jaandər gʊta bɩ dʊdɔ ka,
k'a gʊɔɔ zar gʊta tara burə ʊ a jaandarɛ bɩ minto,
n bɩ dʊdɔ ka.
Woso hʊnhʊrlɛ ka ʊ an a zibəənyɩnɔ k'a ŋ zɩnzɛ rɔ wɔɔ zɩm bɔ ma.»
3 Ŋ n a ya,
ŋn'a hɩ,
ŋ ʊ:
«K'a Woso da ʊ!
Bɩ kʊ gʊta bɩ sɛ siŋŋə bam bɩr derm dɔɔraa k'a nyarɛ ba ʊ nɔ ʊ.»
4 Bɩ,
gʊɔɔgusinno buhɩra a yaa si rɔ wɔɔ kan hɔɔmɩsɩɩrɔ siro wɔɔ kɩ kukurə zɛ ŋnɩ Woso k'a nɩ nyɩntarɛ cirbəəduu ra bɩ da ʊ,
ŋn'a hɩrɛ,
ŋ ʊ:
«*Amina,
Aleluya!»*
Sinnyɛɛm lʊsarɛ cibsa hɔbɩrɛ
5 Leer n a to cirbəəduu bɩ ra,
an n'a hɩrɛ,
a ʊ:
«Awɔɔ haay k'an Woso zibəənyɩnɔ,
awɔɔ k'a nɩ nyi bam nɩ,
gʊɔɔ poorero kan gʊɔɔ gʊtɔɔ kɩ,
k'a wɔɔ Woso bɩ da ʊ!»
6 Mɔɔ m ya,
m a ma ɩ ʊ,
gʊaa cir gʊta leer m,
ɩ ʊ,
higʊta surle m,
ɩ ʊ,
bramahəənsire paŋŋazaa leer m.
Ŋ n'a hɩrɛ,
ŋ ʊ:
«K'a Woso da ʊ!
Bala,
Zuuba,
wɔɔ Woso paŋŋa k'a jire ba ʊ b'a cirbəə hɩnka.
7 Ʊ ʊ heer nyɔɔ k'ʊ saŋŋa ba,
k'ʊ ʊ lɛ bɔ ʊ,
bala,
sinnyɛɛm bɩ lʊsarɛ cibsa m.
A lʊ b'a banka,
8 ŋ zaa ka ʊ k'an huu fu k'a nɩ yɔm bɩ du a ma,
a fu n ta ʊ.»
Bala,
huu fu bɩ,
wosogʊɔɔ wɔɔ zibəə mɩŋŋɔɔ m.
9 Malɛɛka deem n a hɩ mɔɔ m,
a ʊ:
A gʊrsɩra ba!
Mimbirenyɩntazannɔ m gʊɔɔ kʊ ŋ yɩ ŋ bir sinnyɛɛm lʊsarɛ hɔbɩrɛ ma rɔ wɔɔ m.
A n a ya,
an a hɩ mɔɔ m,
a ʊ:
Woso mɩŋŋa leminno m.
10 Mɔɔ n kukurə zɛ a taa kʊ m a da ʊ,
an a hɩ mɔɔ m,
a ʊ:
Ɩ b'a ka ɩ naa ba y.
Ɩ zibəəkɔɔn m mɔɔ m,
ɩbɩɩ kan ɩ danyɩnɔ kʊ ŋ nɩ sɩra zi bam Yeezuu zuure nɔ ʊ rɔ wɔɔ kɩ.
Woso ɩbɩɩ ɩ ga m,
ɩ da ʊ,
bala,
Yeezuu kasɛtɩ bɩ nɩ wosolɛsinnɩsorazannɔ wɔɔ hɔɔn gum.
Gʊaa k'a da sisi fu ʊ
11 Kɛɛrɛ bɩ,
mɔɔ brama yɩ an a gʊ:
sisi fu n bɔ,
gʊaa k'a da ʊ bɩ tɔ m,
gʊaa paan… sɩrazaa,
dʊdɔ an n'a kam,
an nɩ zoo bam kan tɩrgabaa kɩ.
12 A mɩnyaa bɩ,
bɔ a kʊ ʊ kan sɛwurə kɩ.
A mim la bɩ,
cinno firgəro gʊta ta ma,
n n tɔ k'a deem y'a dɔ bɩ ba a mɛ ma.
13 A n huu gʊta kʊ n y'a gɔrmɩ ma ʊ du a ma b'a tɔ m:
‹Woso lemim›.
14 Brama yarbənno n da sisi furo ʊ,
ŋnɩ huu furo kʊ ŋ fu n ta ʊ rɔ du a ma,
ŋn'ɩ zure a jɛ ʊ.
15 Kargʊ lɛzaa nɩ bɔrɛ a lɛ ʊ k'a tararɔ zɛ m.
A y'a sore ŋ ʊ kʊsɩ-kʊsɩ,
b'a Woso k'a paŋŋa jire ba ʊ bɩ nɔmaa gʊta lom tara burə gʊɔɔ ra.
16 A huu gʊta burə kan a ganda burə kɩ ma,
n tɔ gʊrsɩra ba ŋ ma ncɩnaaʊ:
‹Cinno wɔɔ Cir,
zuubarɔ wɔɔ Zuuba›.
17 Mɔɔ malɛɛka deem yɩ,
an nɩ jɩnɩm wosogure nɔ ʊ.
A n zee da kan paŋŋa kɩ bɛnnɔ kʊ ŋ nɩ werm brama yaa ʊ rɔ wɔɔ m,
a ʊ:
«K'a bʊr,
a a zɛ kʊ ra hɔbɩrɛ gʊta kʊ Woso a ka awɔɔ ʊ bɩ tɔ ma.
18 K'a bʊr a cinno mɛsim sʊ,
kan yarbənno lɛɛzannɔ mɛsim kɩ,
paŋŋazannɔ mɛsim kɩ,
k'a sisiro sim sʊ kan gʊɔɔ kʊ ŋ nɩ darɛ ŋ ʊ rɔ wɔɔ mɛsim kɩ.
K'a gʊɔɔ haay mɛsim sʊ,
lɔnnɔ mɛsim kan soamɩŋŋaʊzannɔ mɛsim kɩ,
gʊɔɔ gʊtɔɔ kan gʊɔɔ poorero mɛsim kɩ.»
19 Bɩ,
mɔɔ hɔturma bɩ yɩ,
tararɔ cinno kan a yarbənno kɩ n a zɛ kʊ ra k'a yar ba kan gʊaa k'a da sisi b'ʊ bɩ kɩ,
a yarbənno kɩ.
20 N hɔturma bɩ nyasʊ kan hɔdɔrɛŋʊaarzaa bɩ kɩ.
A ɩ hoserlo ba hɔturma bɩ mɩm ʊ bɩ.
A ɩ hoserlo ba an bra ba gʊɔɔ kʊ ŋ hɔturma bɩ makra yɩ,
ŋn'a bɔkʊrɛ bɩ daŋ ʊ rɔ wɔɔ m.
N yɩ ŋ hɩɩya haay zar sɛ haarɛ gʊta kʊ kidibir sɛ nɩ bɩŋ ʊ b'ʊ hɩɩya haay mɩsɩr.
21 Kargʊ k'a nɩ bɔm gʊaa k'a da sisi ʊ bɩ lɛ ʊ bɩ bɔ ɩ gɔɔta rɔ wɔɔ zɩnzɛ,
bɛnnɔ haay nɩ ŋ sinno bɩ,
an ŋ ka.