Malɛɛka kan ci poore kɩ
10
Bɩ jɛ ʊ bɩ,
mɔɔ malɛɛka paŋŋazaa deem yɩ,
an a to brama,
an nɩ zerm,
warkʊ n a kurə ɩ ʊ,
huu m.
Brama hɔwasɩʊʊrɛ n a bɩr a mim ma,
a meer nɩ yɩrɛ ɩ ʊ wosogure m.
A gannɔ nɩ yɩrɛ ɩ ʊ sɛ y'a zaa da.
2 Ci poore n'a wɔ ʊ,
an gʊ.
A n a bɩsɩ gam tɔ higʊta ra,
an a jɩsa gam tɔ tara ra.
3 A n zee gʊta da,
an bɔ kʊ ʊ kan poozaa baadarɛ kɩ.
K'a zee bɩ da kan paŋŋa kɩ bɩ,
bramahəənsire saanhɩnarɔ wɔɔ baa da.
4 Kʊ bramahəənsire saanhɩnarɔ wɔɔ baa da bɩ,
mɔɔ nyɩnta kʊ m a gʊrsɩra ba,
mɔɔ leer ma an a to brama,
an n'a hɩm mɔɔ m,
a ʊ:
Bramahəənsire saanhɩnarɔ wɔɔ leer nyaakʊm da,
ɩ bɩ ŋ da ci ʊ y.
5 Malɛɛka kʊ mɔɔ nyɩnta m a yɩ,
an nɩ jɩnɩm higʊta kan tara kɩ burə ʊ bɩ,
a a bɩsɩ wɔ busu brama,
an a wer si
6 k'an bɔ m mɩsɩr dɔɔraa nyarɛ ba ʊ bɩ nɔ ʊ,
an brama da kan tara kɩ kan hɔɔ haay kʊ ŋ nɩ ŋ nɔ ʊ rɔ wɔɔ kɩ,
an higʊta da kan hɔ k'a n'a nɔ ʊ bɩ kɩ m,
a ʊ:
Dɔmɩm darɛ ba ʊ dɔ y.
7 Dɔmɩm kʊ malɛɛka saanhɩna hɔ bɩ n n'a huure bɩ hɛŋ ʊ bɩ,
Woso mim k'a nyaakʊm da bɩ kʊ yɩrɛ,
amba a hɩ a zibəənyɩnɔ lɛsinnɩsorazannɔ padarɛ m bɩ m.
8 Leer kʊ mɔɔ ma an a to brama b'a ya an a hɩ mɔɔ m,
a ʊ:
Ta,
ɩ ci kʊ n y'a gʊ malɛɛka k'a nɩ jɩnɩm higʊta burə ʊ kan tara kɩ wɔ ʊ bɩ si.
9 Mɔɔ nɩ m zɔ malɛɛka bɩ ma,
m a yɛ han k'an ci poore bɩ ka m ʊ.
A n a hɩ mɔɔ m,
a ʊ:
A si,
ɩ sʊ.
A nyɩntam kʊsɩ-kʊsɩ ɩbɩɩ nɔ ʊ.
Bɩ,
a nyɩntarɛ am zɔɔn hɔ bɩ m ɩbɩɩ lɛ ʊ.
10 Mɔɔ n ci poore bɩ si malɛɛka bɩ wɔ ʊ,
m a sʊ.
Mɔɔ lɛ ʊ bɩ a nyɩnta am zɔɔn hɔ bɩ m.
Bɩ kʊ mɔɔ sʊ bɩ,
mɔɔ nɔ a ba kʊsɩ-kʊsɩ.
11 N n a hɩ mɔɔ m,
n ʊ:
A a ga m k'ɩbɩɩ n ɩ ya,
ɩ Woso lɛ si ɩ so ra kʊrɔ gʊta minto,
tararɔ gʊta minto,
lemim gʊta kan cinno gʊta kɩ minto.