9
Malɛɛka soor hɔ bɩ n a huure bɩ hɛ:
Mɔɔ n monyaa yɩ,
an a to brama ʊ,
an b'a da.
N n yaa gandaa k'a nɔ tɛkka ba ʊ bɩ cɛlɛnyɩ ka ʊ.
2 A n yaa gandaa k'a nɔ tɛkka ba ʊ bɩ lɛ gʊ,
siŋŋə n bɔ ʊ,
ɩ ʊ,
sɛ gandaa siŋŋə m.
Siŋŋə bɩ n a ka woso kan hɩnhɛr kɩ n a ba kundə.
3 Bɩsɩnɔ n bɔ siŋŋə bɩ do nɔ ʊ,
ŋn'a kərgu tara burə ra.
N n paŋŋa ka ŋ ʊ,
am tara burə bɔɔrɔrɔ hɔ bɩ m.
4 N n lɛ ka ŋ ʊ:
Kʊ ŋ bɩ hɔsɩ ba tara burə bur nɩ,
bɩ ŋ bɩ hɔsɩ ba gɔ m,
gɛɛ hɔ k'a nɩ lɛɛ dam tara burə ʊ bɩ nɩ y.
Bɩ kʊ ŋ n nyaa ba kan gʊɔɔ kʊ Woso makra ba ŋ tusə ʊ rɔ wɔɔ kɩ bala.
5 N zaa ka ŋ ʊ kʊ ŋ n fɩr ka gʊɔɔ wɔɔ ma mom soor tɔr,
bɩ kʊ ŋ bɩ ŋ zɩnzɛ y.
Bɩ fɩr kʊ ŋ n'a kam gʊɔɔ ma bɩ bɔ kʊ ʊ kan bɔɔrɔ k'a nɩ gʊaa hanm bɩ kɩ.
6 Dɔmɩnnɔ wɔɔ duro ʊ bɩ,
gʊɔɔ zɛ birm,
bɩ ŋ b'a yɩrɛ y.
Ŋ y'a ŋʊam k'a gɩnga,
bɩ zɛ bɩ y'a sire ŋ lɛɛ.
7 Bɩsɩnɔ wɔɔ duro bɔ ŋ y'a ʊ kʊ ʊ kan sisiro kʊ ŋ mɔr da ŋ ma k'a ta ŋ nɩ yar ʊ rɔ wɔɔ kɩ.
Ŋ minno wɔɔ ra bɩ,
a k'an naa ɩ ʊ,
sarma firgəro m.
Ŋ meerlɔ wɔɔ n bɔ kʊ ʊ kan gʊɔɔ hɔɔ kɩ.
8 Ŋ minkəro n bɔ kʊ ʊ kan lannɔ hɔɔ kɩ,
ŋ sɔrɔ n bɔ kʊ ʊ kan poozaa sɔrɔ kɩ.
9 Ŋ cɩrɔ wɔɔ k'an naa ɩ ʊ,
pɔyaa goŋŋoro ŋ yɩ ŋ ka a ma,
ŋ zarɔ wɔɔ bʊgʊr bɩ n bɔ kʊ ʊ kan sisiro tɛrkʊrɔ kʊ ŋ bra si ŋn'ɩ tam yar ʊ rɔ wɔɔ bʊgʊr kɩ.
10 Ŋ monno wɔɔ n bɔ kʊ ʊ kan bɔɔrɔrɔ monno kɩ,
ŋ karɔ n ta ʊ.
Ŋ monno wɔɔ ŋ paŋŋa bɩ n ta ʊ,
k'a fɩr ka gʊɔɔ ma mom soor tɔr.
11 Ŋ cir bɩ m yaa gandaa k'a nɔ tɛkka ba ʊ malɛɛka kʊ n n'a birm *ebree lemim m «Abadɔn»,
n n'a birm grɛkkɩ m «Apoliyɔn» bɩ m.
12 Lɛɛkarɛ kʊsɩ bɩ cem:
Ba kʊsɩ vantɔɔ hɩɩyɔɔ n nɩ zɛm k'a b'a nya ʊ na.
13 Malɛɛka sɔrdɩ hɔ bɩ n a huure bɩ hɛ:
Bɩ,
mɔɔ leer ma an a to sarma mannɩjaa kɔɔn siro k'a nɩ Woso lɛɛ bɩ zeezi.
14 A n n'a hɩm malɛɛka sɔrdɩ hɔ k'a nɩ huure bɩ m bɩ m,
a ʊ:
«Bar zɛ malɛɛkarɔ siro kʊ ŋ yɩ ŋ sur Efratɩ kɔ gʊta burə ʊ rɔ wɔɔ ma.»
15 N n bar zɛ malɛɛkarɔ siro kʊ ŋ y'a banka ŋn'ɩ dɔm wakatɩ,
dɔmɩm,
mom kan dɔɔraa kɩ minto,
k'a bɩ zamaa zɛkumbir kaakʊ deem zɛ rɔ wɔɔ ma.
16 Bɩ,
mɔɔ sisiro zannɔ wɔɔ lɛ ma:
Ŋ miliyɔn zɔɔhɩra.
17 Siirozannɔ kʊ ŋ y'a hɩnka mɔɔ m makra bɩ nɔ ʊ rɔ wɔɔ ba n nɩ:
Goŋŋoro ŋ yɩ ŋ ka a ma,
ŋnɩ bɔ kʊ ʊ kan sɛ kɩ,
bʊramɛ kɩ,
kidibirmɛ kɩ.
Sisiro wɔɔ minno wɔɔ n bɔ kʊ ʊ kan poozannɔ minno kɩ,
sɛ n nɩ bɔrɛ ŋ lɛ ʊ kan siŋŋə kɩ,
kidibir kɩ.
18 Kʊsɩ kaakʊrɔ nɔɔm,
sɛ,
siŋŋə kan kidibir kʊ ŋ nɩ bɔrɛ ŋ lɛrɔ ʊ,
gʊɔɔ zɛkumbir kaakʊ deem zɛ.
19 Bala,
sisiro wɔɔ paŋŋa bɩ,
ŋ lɛrɔ an ta ʊ kan ŋ monno kɩ sɔ.
Kʊ sɩra nɩ,
ŋ monno wɔɔ bɔ ŋ y'a ʊ kʊ ʊ kan mɩnnɔ kɩ,
ŋ minno n tɩnta ʊ,
bɩ n'a karɛ ŋn'a dam ma,
ŋn'ɩ fɩr kam gʊɔɔ ma.
20 Kʊ gʊɔɔ kʊ ŋ gɔɔtarɔ wɔɔ nɩ,
gʊɔɔ kʊ ŋ n gɩnga fɩryɩrɛrɔ nɔɔn duro nɔ ʊ rɔ wɔɔ,
ŋ n a bɔ a taam ŋn'a wɔbʊmbɔ a zibəəro wɔɔ ʊ y.
Ŋ gɔɔta,
ŋn'ɩ zinəro,
*wosobaawɔnnɔ kʊ ŋ yɩ ŋ ba sarma m gɛɛ wanzur m,
gɛɛ zaan m,
gɛɛ jaa m,
gɛɛ gɔ m,
kʊ ŋ b'a dam ma,
ŋnɩ lɛɛ yɩ,
ŋnɩ mim ma,
ŋnɩ ta rɔ wɔɔ daŋ ʊ y.
21 Ŋ n a bɔ a taam ŋn'a wɔbʊmbɔ a gərzɛrɛ,
a wɔkurero,
a jaandarɛ kan a kombaarɔ wɔɔ kɩ ʊ y.