Kʊsɩrɛ saanhɩna hɔ hʊrlɛ
8
Kʊ sinnyɛɛm bɩ kʊsɩrɛ saanhɩna hɔ bɩ hʊr bɩ,
lɛɛ zɛ sɩɩ… brama ʊ,
an ta,
an miniti bukərku ku.
2 Bɩ,
mɔɔ malɛɛka saanhɩnarɔ kʊ ŋ nɩ Woso taa rɔ wɔɔ yɩ.
Ŋ n huurero gʊtɔɔ ka ŋ ʊ saanhɩna.
3 Malɛɛka vanta n bʊr an bɩ jɩm mannɩjaa bɩ lɛ ʊ.
A n tidəər nyisi laaga kʊ n y'a ba sarma m bɩ sa a wɔ ʊ,
n n tidəərlo ka ʊ gʊta k'an a zɛ kʊ ra kan wosogʊɔɔ wɔɔ haay yaadarɛrɔ kɩ k'a nɩ ŋ ka Woso ʊ sarma mannɩjaa k'a nɩ cirbəəduu bɩ lɛ ʊ bɩ burə ʊ.
4 Tidəər siŋŋə bɩ n a to malɛɛka bɩ wɔ ʊ kan wosogʊɔɔ wɔɔ yaa darɛ kɩ,
an der an ta Woso taa.
5 Malɛɛka bɩ n tidəər nyisi mɔr bɩ sa,
an mannɩduu bɩ sɛ sa an a da ʊ,
an a han,
an a zo tara burə ʊ.
Bramahəənsirero,
leerlo kɩ,
brama nyakɩ kan taranyiŋŋəre kɩ nyɩnta ʊ.
Lɛɛkarɛ huurero sɔrdɩrɔ wɔɔ
6 Malɛɛka saanhɩnarɔ kʊ ŋ nɩ huurero saanhɩnarɔ wɔɔ m bɩ,
ŋ y'a banka ka ŋ hɛ.
7 Lɛɛkarɛzaa b'a huure bɩ hɛ:
Lajaa kan sɛ kɩ an a war kʊ ma kan ma kɩ sur tara burə ʊ.
Sɛ n tara burə zɛkumbir kaakʊ bɩ deem sa kan tara burə zɛkumbir kaakʊ bɩ deem gɔrɔ kɩ,
burbutur do haay kɩ.
8 Malɛɛka hɩɩya hɔ bɩ n a huure bɩ hɛ:
Hɔ m,
an bɔ kʊ ʊ kan ci gʊta kʊ sɛ a sa,
n n a nyɔɔta n a da higʊta ʊ kɩ.
Higʊta bɩ zɛkumbir kaakʊ bɩ deem a ba ma.
9 Higʊta bɩ hɔɔmɩsɩɩrɔ wɔɔ zɛkumbir kaakʊ bɩ deem nɔ n gɩnga,
kɔɔlʊʊ gʊta-gʊtarɔ wɔɔ zɛkumbir kaakʊ bɩ deem n a zar.
10 Malɛɛka kaakʊ hɔ bɩ n a huure bɩ hɛ:
Monyaa gandaa n a to brama an a da an nɩ bɩrɛ,
ɩ ʊ sɛwurə m.
A da a ʊ kɔyaarɔ zɛkumbir kaakʊ bɩ deem kan himinyaarɔ wɔɔ kɩ ra.
11 Monyaa bɩ do tɔ m «kʊsɩ-kʊsɩ».
Hiro wɔɔ zɛkumbir kaakʊ bɩ deem n a ba «kʊsɩ-kʊsɩ»,
gʊɔɔ n gɩnga gʊta hiro wɔɔ kʊ ŋ y'a ba kʊsɩ-kʊsɩ minto.
12 Malɛɛka si hɔ bɩ n a huure bɩ hɛ:
Wosogure zɛkumbir kaakʊ bɩ deem kan mom zɛkumbir kaakʊ bɩ deem kɩ,
monyaarɔ zɛkumbir kaakʊ bɩ deem kɩ n a ba monsigə.
Sinuu zɛkumbir kaakʊ bɩ deem n a ba monsigə,
gunuu maam sɔ.
13 Mɔɔ n dɩga,
m cɛda yɩ werle ma brama nɔyaa ʊ,
m a ma,
an n'a hɩm kan paŋŋa kɩ,
a ʊ:
«A yɩm kʊsɩ!
A yɩm kʊsɩ!
A yɩm kʊsɩ,
tara burə gʊɔɔ wɔɔ ma huurero kʊ malɛɛkarɔ kaakʊrɔ wɔɔ n nɩ zɛm k'a b'a hɛ bɩ minto.»