Lemim Efɛɛzɩ kristagʊɔɔ sokʊma minto
2
Gʊrsɩra ba Efɛɛzɩ kristagʊɔɔ sokʊma malɛɛka bɩ ma ncɩnaaʊ:
Gʊaa k'an ta monyaa saanhɩnarɔ wɔɔ m a bɩsɩ ʊ,
an nɩ tam sarma fɩtɩrɛ saanhɩnarɔ bire ʊ,
2 bɩ y'a hɩ,
a ʊ:
Mɔɔ ɩbɩɩ kɔrɛ kan ɩ tʊntɔʊrɛ kɩ dɔ,
ɩbɩɩ bɩr yɛm gʊɔɔ bʊnyaarɔ ma y.
Ɩbɩɩ gʊɔɔ kʊ ŋ n'a hɩrɛ a ma kristazibəəzannɔ,
bɩ kristazibəəzannɔ bɛɛ nɩ ŋ mɩ rɔ wɔɔ ka lɛɛ.
Ɩbɩɩ bɩ ŋ dɔ ŋʊaarzannɔ.
3 Tʊntɔʊrɛ ta ɩbɩɩ ʊ:
ɩbɩɩ fɩr yɩ mɔɔ tɔ ma,
b'ɩbɩɩ n ɩ bɔ ɩ jɛ nɩ y.
4 Bɩ mim kʊ mɔɔ n ta m kan ɩbɩɩ kɩ bɩ,
ɩbɩɩ wɔ saa ɩ lɛɛkarɛ ŋʊarɛ kan mɔɔ kɩ bɩ ma.
5 Bɩncɛ k'ɩbɩɩ nyɩnta ʊ,
ɩ ɩ bɔ ʊ bɩ tɔ da ɩ nɔ ʊ.
Ɩ ɩ bɔ ɩ taam k'ɩ biisi zibəəro wɔɔ bɔɔta.
Kʊ n bɛɛ nɩ,
mɔɔ zɛrɛ ɩbɩɩ zi.
Bɩ k'ɩbɩɩ n ɩ bɔ ɩ taam,
mɔɔ y'ɩbɩɩ fɩtɩrɛ bɩ sarɛ a bɩncɛ ʊ.
6 Hɔ niŋŋə k'ɩbɩɩ n ta m bɩ,
ɩbɩɩ nyi sɔ Nikola gʊɔɔ wɔɔ zibəəro m,
amba mɔɔ hɔ bɩ m.
7 Gʊaa k'a lɛ n taa,
k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.
Damazaa bɩ,
mɔɔ mɩsɩrbaa gɔ k'a nɩ arzana ʊ nyɩ kaŋ ʊ an a bɩ.
Lemim Simɩrnɩ kristagʊɔɔ sokʊma ma
8 Gʊrsɩra ba Simɩrnɩ kristagʊɔɔ sokʊma malɛɛka bɩ ma ncɩnaaʊ:
A m lɛɛkarɛzaa,
a m jɛzaa.
A nyɩnta an ga,
an a bɔ an bʊr mɩsɩrbaa nɔ ʊ,
bɩ n nɩ meer naa do barɛ:
9 Mɔɔ ɩbɩɩ fɩryɩrɛ dɔ kan ɩ ŋʊa kɩ.
Bɩ arzakazaa n'ɩbɩɩ m,
mɔɔ gʊɔɔ kʊ ŋ ʊ zɩɩfʊrɔ n'a mɩ,
ŋnɩ bɔkarɛ zɩɩfʊrɔ bɛɛ nɩ ŋ mɩ rɔ wɔɔ tɔzarlɛ zibəə kʊ ŋ nɩ ta m bɩ dɔ,
Sʊtaana sokʊmacɛ nɩ ŋ mɩ.
10 Ɩ bɩ nyi ba hɔ k'a n'a kam k'ɩ fɩr yɩ bɩ ma y.
Sʊtaana y'ɩbɩɩ gʊɔɔ gɔsɩnnɔ dum lɔnnɔcɛ ʊ,
k'a a gɩnga awɔɔ ma,
b'awɔɔ fɩr yɩm dɔmɩm bu.
Jɩm kɔɔkɔɔ k'an ta an ɩ zɛ ku.
Mɔɔ mɩsɩrbaa firgə karɛ ɩ ʊ.
11 Gʊaa k'a lɛ n taa,
k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.
Damazaa bɩ bɩ fɩr yɩm zɛ hɩɩya hɔ ma fɩɩga y.
Lemim Pɛrgam kristagʊɔɔ sokʊma ma
12 Gʊrsɩra ba Pɛrgam kristagʊɔɔ sokʊma malɛɛka bɩ ma ncɩnaaʊ:
A n nɩ kargʊ lɛ hɩɩyazaa m bɩ nɩ meer naa do barɛ:
13 Mɔɔ bɩncɛ k'ɩbɩɩ n ta ʊ bɩ dɔ.
Sʊtaana cirbəəduu bɩncɛ m.
Ɩbɩɩ gɔɔta ɩ nɩ nyasʊm mɔɔ tɔ m,
ɩbɩɩ n sɩra ka mɔɔ ʊ to y,
baa dɔmɩm niŋŋə kʊ ŋ mɔɔ kasɛtɩzaa paan… Antipas zɛ ʊ gər awɔɔ zi bɩncɛ kʊ Sʊtaana n ta ʊ b'ʊ.
14 Bɩ mɔɔ ɩ mim m kan ɩbɩɩ kɩ.
Gʊɔɔ gɔsɩnnɔ y'awɔɔ bire ʊ,
ŋnɩ yɛ Balam* mim ma.
A ɩ dʊndɔrɛ bʊnyaa ka Balak ʊ k'an Israyɛl nyɩnɔ nyʊnnyɔɔta kʊ ŋ nɩ *wosobaawɔnnɔ mannɩ sim sʊ kan jaandarɛ do haay kɩ.
15 Ɩbɩɩ zi sɔ bɩ,
gʊɔɔ gɔsɩnnɔ ta ʊ,
ŋnɩ yɛ Nikola gʊɔɔ hɔdɩndarɛ ma.
16 Bɩ minto bɩ,
ɩ bɔ ɩ taam,
kʊ n bɛɛ mɔɔ zɛrɛ ɩbɩɩ zi dɩɩtaa,
m bɩ yar ba kan ŋ kɩ,
m lɛ kargʊ bɩ m.
17 Gʊaa k'a lɛ n taa,
k'an hɔ kʊ Sɛnt-Ɛspri n'a hɩm sokʊmarɔ wɔɔ m bɩ ma.
Damazaa bɩ,
mɔɔ *mann k'a nyaakʊm da kaŋ ʊ,
m jaa fu kʊ n tɔdaa gʊrsɩra ba ma bɩ ka ʊ.
Gɔsɩ n tɔ bɩ do dɔ kʊ gʊaa k'a a si bɩ bɛɛ y.
Lemim Tiyatɩɩr kristagʊɔɔ sokʊma ma
18 Gʊrsɩra ba Tɩyatɩɩr kristagʊɔɔ sokʊma malɛɛka bɩ ma ncɩnaaʊ:
Woso Nyɩ k'a mɩnyaarɔ bɔ kʊ ʊ kan sɛwurə kɩ,
a gannɔ m bɔ kʊ ʊ kan zaantɔzaa kɩ bɩ nɩ meer naa do barɛ:
19 Mɔɔ ɩbɩɩ zibəəro,
ɩbɩɩ ŋʊarɛ,
ɩ sɩrakarɛ,
ɩ zibəə kan ɩ tʊntɔʊrɛ kɩ dɔ.
Ɩ zibəəro k'ɩbɩɩ ŋ ba jɛ ʊ rɔ wɔɔ lɛ da biisi hɔɔ wɔɔ ra.
20 Bɩ,
mɔɔ heer bɩ nyɩnta kan ɩbɩɩ kɩ y.
Ɩbɩɩ k'ɩ yɛ Zezabɛl ma.
Lʊ naa do n'a hɩrɛ a ma wosolɛsinnɩsorazaa,
an nɩ mɔɔ zibəənyɩnɔ nyʊnnyɔɔm,
an nɩ hɔ dɩndarɛ ŋ nɩ kʊ ŋ nɩ jaan da,
kʊ ŋ nɩ wosobaawɔnnɔ mannɩ sim sʊ.
21 Mɔɔ toore ka ʊ k'an a bɔ a taam,
b'a lɛ baa k'a a bɔ taam a jaandarɛ nɔ ʊ y.
22 Dɩga!
Mɔɔ y'a karɛ an wʊta yaaba m,
an fɩr yɩ,
a muno jaandənno wɔɔ maam sɔ,
kʊ ŋ n a bɔ a taam a zibəəro wɔɔ nɔ ʊ y.
23 Mɔɔ y'a nyɩnɔ wɔɔ zɩnzɛm.
Bɩ kristagʊɔɔ sokʊmarɔ wɔɔ haay y'a dɔrɛ ŋ ʊ:
mɔɔ m gʊaa k'a gʊaa haay lɛtaama dɔ kan a heer kɩ.
Bɩ mɔɔ y'awɔɔ gʊaa biyəə hɔ kaŋ ʊ,
an a ga kʊ ʊ kan a zaa zibəə kɩ.
24 B'awɔɔ gʊɔɔ k'a nɩ Tɩyatɩɩr ʊ,
a gɔɔta a n yɛ hɔdɩndarɛ naa do ma bɩ,
awɔɔ n yɛ hɔ kʊ n'a hɩm ma Sʊtaana minno kʊ ŋ y'a nyaakʊm da rɔ wɔɔ ma y,
awɔɔ n a ka ma k'a ŋ dɔ y.
Maam bɩ mɔɔ bɩ m yarɛ m mɔr gorezaa ka awɔɔ m la y.
25 Bɩ,
k'a nyasʊ hɔ k'awɔɔ n ta m bɩ m bala kɔɔkɔɔ,
k'an ta an mɔɔ zɛrɛ dɔmɩm ku.
26-28 Damazaa bɩ,
gʊaa k'a nyasʊ mɔɔ zibəə bɩ m an ta an a nyarɛ ku,
mɔɔ paŋŋa kʊ mɔɔ mɩŋŋa a yɩ m Zɩ zi bɩ kaŋ ʊ:
Mɔɔ y'a karɛ an a so do gʊta ʊ,
a y'a sore ŋ ʊ kʊsɩ-kʊsɩ,
a yɩ ŋ zɔrɛ amba nɩ gedro zɔm bɩ m.
Mɔɔ dɔmɩrɛ monyaa kaŋ ʊ.
29 Gʊaa k'a lɛ n taa,
k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.