HƖNKARƐ CI
Gasʊʊrɛ
1
Yeezuu Krista bɩ,
Woso y'a ka ʊ,
k'an hɔ k'a nɩ zɛm bɩ nyɩnta ʊ dɩɩtaa bɩ hɩnka a zibəənyɩnɔ m.
A malɛɛka a nyɔɔ k'an b'a hɩ a zibəənyɩ Zaan m.
2 A n nɩ Woso lemim bɩ hɩrɛ,
an Yeezuu Krista kasɛtɩ ka kan hɔ haay k'a a yɩ bɩ kɩ.
3 Mimbirenyɩntazaa m gʊaa k'a nɩ karɩnda bam,
kan gʊɔɔ kʊ ŋ n'a tʊr kam wosolɛsinnɩsora meerbaa ma rɔ wɔɔ kɩ,
ŋn'ɩ zum hɔ kʊ ŋ y'a gʊrsɩra ba b'ʊ.
Bala,
wakatɩ b'a zɔ.
Yaadarɛ kristagʊɔɔ kʊ ŋ nɩ Azii ʊ
4 Mɔɔ mɩŋŋa Zaan m nɩ gʊrsɩra naa do bam kristagʊɔɔ sokʊmarɔ saanhɩnarɔ kʊ ŋ nɩ Azii kʊ ʊ rɔ wɔɔ ma:
K'a barka kan laafɩɩ kɩ yɩ,
gʊaa k'an ta ʊ,
an nyɩnta ʊ,
an nɩ zɛm bɩ zi,
kan ɛspri saanhɩnarɔ kʊ ŋ n a duu jɩr ʊ rɔ wɔɔ kɩ zi,
5 kan Yeezuu Krista,
kasɛtɩzaa paan…,
k'a lɛɛ ka an a mɩm bɔ ʊ gəəno bire ʊ,
a m durnya cinno wɔɔ cir bɩ kɩ zi.
Bɔ nɩ wɔɔ ŋʊam,
an wɔɔ mimbʊnyaarɔ sʊrgɔ a ma m,
6 an a ka,
wɔɔ n ʊ ba a cirbəə mannɩbənno a Zɩ Woso zibəə minto.
A y'a ga lɛbɔʊrɛ m kan paŋŋa kɩ dɔmɩm k'a nyarɛ ba ʊ.
Amina!
7 Ba n nɩ,
a ɩ zɛm warkʊ nɔ ʊ,
bɩ gʊaa haay y'a yɩm,
baa gʊɔɔ kʊ ŋ y'a zɛ rɔ wɔɔ y'a yɩm sɔ.
Tara burə gʊɔɔ heerzarlɛ nyi karɛ a minto.
Ɩɩn…,
k'an yɩ maam!
8 Zuuba Woso a hɩ,
a ʊ:
Mɔɔ m lɛɛkarɛzaa,
mɔɔ m jɛzaa.
Mɔɔ n ta ʊ,
m nyɩnta ʊ,
m n nɩ nyɩntaŋ ʊ,
hɔ haay Zuuba.
Zaan Gʊaanyɩ bɩ makra yɩ
9 Mɔɔ mɩŋŋa Zaan,
awɔɔ danyɩ awɔɔ zukuuzaa,
fɩryɩrɛ,
cirbəə kan tʊntɔʊrɛ kɩ Yeezuu zuure nɔ ʊ,
nyɩnta mɔɔ ʊ,
m nɩ tara deem kʊ hi bɩr ma,
n n'a hɩm ma Patmɔs ʊ,
Woso lemim kan Krista kasɛtɩ karɛ kɩ minto.
10 *Sɛnt-Ɛspri zer mɔɔ ra Zuuba dɔmɩm deem hinni ʊ,
mɔɔ n leer paŋŋazaa ma m jɛ ʊ,
ɩ ʊ,
huure n n'a hɛm,
an n'a hɩrɛ,
a ʊ:
11 Hɔ k'ɩbɩɩ n'a yɩm bɩ gʊrsɩra ba ci ʊ,
ɩ nyɔɔ kristagʊɔɔ sokʊmarɔ saanhɩnarɔ wɔɔ ma:
Efɛɛzɩ ʊ,
Simɩrnɩ ʊ,
Pɛrgam ʊ,
Tɩyatɩɩr ʊ,
Sardɩ ʊ,
Filadɛlfii ʊ,
kan Lawodisee kɩ ʊ.
12 Mɔɔ n bɔ kʊ m dɩga gʊaa k'a nɩ meer bam kan mɔɔ kɩ bɩ ma.
Bɩ kʊ mɔɔ m wusigə bɩ,
mɔɔ sarma fɩtɩrɛrɔ yɩ saanhɩna.
13 Fɩtɩrɛrɔ wɔɔ bire ʊ bɩ,
mɔɔ gʊaa yɩ,
an bɔ kʊ ʊ ɩ ʊ,
Gʊaanyɩ m,
an huu jintə da a ra,
an sarma hɔsoaʊ so a cɩ ʊ.
14 A mim bɩ kan a minkə bɩ kɩ nyɩnta fu fɩtɩtɩ ɩ ʊ,
ser ka m,
gɛɛ lajaa m,
a mɩnyaarɔ wɔɔ nɩ yɩrɛ ʊ,
sɛwurə m.
15 A gannɔ bɔ kʊ ʊ kan zaan kʊ n y'a sʊr,
an nɩ yɔm bɩ kɩ.
A leer nɩ yɩrɛ ʊ hiro gʊtɔɔ susur m,
16 an nɩ monyaa saanhɩna m a bɩsɩ ʊ.
Kargʊ lɛ hɩɩya nɩ bɔrɛ a lɛ ʊ.
A meer nɩ yɔrɛ ɩ ʊ,
woso nɩ gum kan paŋŋa kɩ.
17 Kʊ mɔɔ yɩ bɩ,
mɔɔ m do a taa ɩ ʊ ga mɔɔ ʊ.
A n a bɩsɩ wɔ ka mɔɔ ra,
an a hɩ,
a ʊ:
Ɩ da bɩ bɔ ʊ y,
mɔɔ m lɛɛkarɛzaa,
mɔɔ m jɛzaa,
18 mɔɔ n mɩsɩr.
Mɔɔ nyɩnta,
m ga,
bɩ ba n nɩ,
mɔɔ mɩsɩr dɔmɩm k'a nyarɛ ba ʊ nɔ ʊ,
bɩ mɔɔ ɩ zɛ cɛlɛnyɩnɔ m kan gəənokʊ hɔɔ kɩ.
19 Hɔ k'ɩbɩɩ yɩ bɩ gʊrsɩra ba,
kan hɔ kan ta ʊ kɩ,
kan hɔ k'a nɩ zɛm bɩ bʊr bɩ kɩ.
20 Ba monyaa saanhɩnarɔ k'ɩbɩɩ ŋ yɩ mɔɔ bɩsɩ wɔ ʊ kan sarma fɩtɩrɛrɔ saanhɩnarɔ wɔɔ kɩ jɩ n na:
Monyaa saanhɩnarɔ wɔɔ,
kristagʊɔɔ sokʊmarɔ saanhɩnarɔ wɔɔ malɛɛkarɔ m.
Fɩtɩrɛrɔ saanhɩnarɔ wɔɔ kristagʊɔɔ sokʊmarɔ saanhɩnarɔ wɔɔ m.