Lemim Sardɩ kristagʊɔɔ sokʊma
ma
3
Gʊrsɩra ba Sardɩ kristagʊɔɔ sokʊma malɛɛka bɩ ma ncɩnaaʊ:
Gʊaa k'a nɩ Woso ɛspri saanhɩnarɔ m kan monyaa saanhɩnarɔ kɩ bɩ nɩ meer naa do barɛ:
Mɔɔ ɩbɩɩ zibəəro dɔ,
ŋ y'a lɛ bɔrɛ ɩbɩɩ ʊ ŋ ʊ,
ɩ mɩsɩr,
bala gər n'ɩ mɩ.
2 Ɩ tɔ ʊ,
ɩ b'a ka an gɔɔta an n'a ŋʊam k'a ga bɩ n a nyambʊr y,
a mɩm bɔ ʊ.
Bala,
mɔɔ yɩ,
ɩbɩɩ zibəə bɩ mɩŋŋabaa bɩ gʊta mɔɔ Woso mɩm ʊ y.
3 Hɔ k'ɩbɩɩ yɩ,
ɩ ma sɔ bɩ tɔ da ɩ nɔ ʊ.
Nyasʊ m k'ɩ ɩ bɔ ɩ taam.
K'ɩbɩɩ n dundo ɩ zi,
mɔɔ zɛrɛ am koor hɔ bɩ m.
B'ɩbɩɩ bɩ wakatɩ kʊ mɔɔ n nɩ zɛm bɩ daata zɛ ɩbɩɩ ra bɩ dɔrɛ y.
4 Bɩ kan bɩ kɩ,
ɩbɩɩ gʊɔɔ gɔsɩnnɔ ɩ Sardɩ ʊ,
ŋ n dintim ka a huuro ma y.
Ŋ zum kʊ ʊ kan mɔɔ kɩ,
huu furo n a ma,
bala,
ŋ y'a ga m.
5 Damazaa bɩ,
huu fu dure a ma ncɩnaaʊ,
mɔɔ b'a tɔ bɔm mɩsɩrbaa ci b'ʊ y.
Mɔɔ y'a kasɛtɩ kam m Zɩ kan a malɛɛkarɔ kɩ taa,
mɔɔ ʊ,
mɔɔ gʊaa m.
6 Gʊaa k'a lɛ n taa,
k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.
Lemim Filadɛlfii kristagʊɔɔ sokʊma ma
7 Gʊrsɩra ba Filadɛlfii kristagʊɔɔ sokʊma malɛɛka bɩ ma ncɩnaaʊ:
Gʊaa mɩŋŋa,
sɩrazaa bɩ,
k'a nɩ Davɩd cɛlɛnyɩ m,
an a gʊm bɩ gɔsɩ b'a dam ma a n a ta y,
an n'a tam bɩ gɔsɩ b'a dam ma an a gʊ y bɩ nɩ meer barɛ,
a ʊ:
8 Mɔɔ ɩbɩɩ zibəəro dɔ:
Ba n nɩ,
mɔɔ cɛlɛ gʊ,
ɩ lɛɛ,
bɩ gɔsɩ b'a dam ma an a ta y.
Ɩbɩɩ paŋŋa bɩ bɩ gʊta y,
bɩ kan bɩ kɩ,
ɩbɩɩ gɔɔta ɩ zu mɔɔ lemim ʊ,
ɩbɩɩ n bɩsɩ ka mɔɔ tɔ ma y.
9 Sʊtaana sokʊmacɛ gʊɔɔ kʊ ŋ ʊ,
zɩɩfʊrɔ n'a mɩ rɔ wɔɔ,
ŋʊaar ŋn'a barɛ,
zɩɩfʊrɔ bɛɛ n ŋ mɩ y.
Mɔɔ y'a karɛ,
ŋnɩ bʊr,
ŋnɩ bɩ kukurə zɛ ɩbɩɩ taa,
bɩ ŋn'a dɔm ma ŋ ʊ,
mɔɔ ɩbɩɩ ŋʊa.
10 Bala,
ɩbɩɩ ɩ zum mɔɔ lemim ʊ kan tʊntɔʊrɛ kɩ,
mɔɔ dɔrɛ ɩbɩɩ ma sɔ fɩryɩrɛ k'a nɩ zɛm bɩ bʊr durnya jilli nɔ ʊ k'a bɩ durnyazannɔ makra ba bɩ dɔmɩm ʊ.
11 Mɔɔ zɛm zɔɔ,
nyasʊ hɔ k'ɩbɩɩ ta m bɩ m kɔɔkɔɔ,
kʊ gɔsɩ b'ɩbɩɩ firgə bɩ yɔ ɩ nɩ y.
12 Damazaa bɩ,
mɔɔ y'a bam mɔɔ Zɩ Wosocɛ bɩ sagɔ,
a bɩ bɔm dɔ fɩɩga y.
Bɩ mɔɔ yɩ m Woso tɔ gʊrsɩra bam ma,
kan mɔɔ Woso kʊ tɔ kɩ,
Zerizalɛm daa k'a a to brama mɔɔ Woso zi an nɩ zerm bɩ kɩ,
kan mɔɔ tɔ daa bɩ kɩ.
13 Gʊaa k'a lɛ n taa,
k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.
Lemim Lawodisee kristagʊɔɔ sokʊma ma
14 Gʊrsɩra ba Lawodisee kristagʊɔɔ sokʊma malɛɛka bɩ ma ncɩnaaʊ:
Ba hɔ kʊ Amina,
kasɛtɩzaa paan…,
sɩrazaa,
an a zɛ kʊ ra kan Woso kɩ hɔ haay darɛ sɩŋŋɩda ʊ bɩ n'a hɩm na:
15 Mɔɔ ɩbɩɩ zibəəro dɔ.
Ɩbɩɩ bɩ nyɔɔrɛ,
b'ɩbɩɩ bɩ kaarɛ y.
A ŋʊa mɔɔ ʊ k'ɩbɩɩ n bɩr nyɔɔrɛ gɛɛ kaarɛ.
16 Bɩ k'ɩbɩɩ n zaarɔɔ,
ɩbɩɩ bɩ nyɔɔrɛ,
b'ɩbɩɩ bɩ kaarɛ bɩ,
mɔɔ y'ɩbɩɩ bɔrɛ m lɛ.
17 Bala,
ɩbɩɩ y'a hɩrɛ,
ɩ ʊ:
Hɔnyɩzaa n'ɩ mɩ,
mɔɔ m ba hɔnyɩzaa,
mɔɔ bɩr m kam hɔsɩ ma dɔ y,
bɩ k'ɩbɩɩ n a dɔ ɩ ʊ,
ɩ ɩ fɩr nɔ ʊ,
cicir nɔ ʊ,
ɩ m ŋʊazaa,
ɩ m bʊʊ,
ɩ m dɩgɩ bɩ.
18 Ɩbɩɩ dʊndɔ mɔɔ nawʊm k'ɩ sarma kʊ ŋ y'a sʊr bɩ si mɔɔ zi k'ɩ ba hɔnyɩzaa,
k'ɩ huuro furo si,
k'ɩ du ɩ ma,
k'ɩ nyannɩ nyaakʊm da m.
Ɩ hɔ si ɩ tɔ ɩ mɩm la k'ɩ ɩ da ma ɩ lɛɛ yɩ.
19 Gʊɔɔ haay kʊ mɔɔ ŋʊa rɔ wɔɔ,
mɔɔ nɩ ŋ bɔm zaa ʊ,
m nɩ ŋ hʊnhʊrm.
Ncɩnaaʊ bɩ,
ɩ tɔ ʊ,
k'ɩ ɩ bɔ ɩ taam!
20 Ba mɔɔ jɩm cɛlɛ ma,
m n'a zɛm na.
Kʊ gʊaa mɔɔ leer ma,
an cɛ bɩ lɛ gʊ,
mɔɔ gasʊm zi.
M hɔ bɩ kan kɩ,
an a bɩ kan mɔɔ kɩ.
21 Damazaa bɩ,
mɔɔ y'a karɛ,
an nyɩnta kan mɔɔ kɩ,
m cirbəəduu ra,
amba mɔɔ m da ma sɔ,
m ta m aa nyɩnta kan m Zɩ kɩ a cirbəəduu ra bɩ m.
22 Gʊaa k'a lɛ n taa,
k'an hɔ kʊ Sɛnt-Ɛspri n'a hɩm kristagʊɔɔ sokʊmarɔ wɔɔ m bɩ ma.