Gʊaa nɛɛm zibəə mim
3
M danyɩnɔ,
a b'a ka ma k'a yɩ hɔdɩndagʊɔɔnzannɔ woo… y.
Awɔɔ dɔ a ʊ,
wɔɔ kʊ ʊ nɩ hɔ dɩndam gʊɔɔ m nɔ wɔɔ,
n wɔɔ dʊdɔ kam kʊsɩ an lɛ da.
2 Bala,
wɔɔ haay,
wɔɔ ɩ kʊrɔm ma.
Gʊaa k'a bɩr kʊrɔm ma a meerbaa nɔ ʊ bɩ,
gʊaa tɩrga m fasɩ,
a a da ma an bʊr a mɩŋŋa ma jilli.
3 Kʊ wɔɔ tɩr sarbɩr da sisiro lɛ ʊ kʊ ŋ nɩ zu wɔɔ ʊ bɩ,
wɔɔ y'ʊ so ŋ mɛ b'ʊ jilli sɔ ŋn'ɩ wɔɔ hɔɔnhɔ bam.
4 K'a dɩga kɔɔlʊʊ gʊtɔɔ wɔɔ ma sɔ,
kʊ ŋ bɩ to ŋnɩ gʊta maam-maam,
hɩnhɛr gʊtɔɔ nɩ ŋ nyɔɔtam bɩ,
ŋ hɔ poore n ta ʊ,
an a ka ŋn'ɩ tam lɛɛ haay k'a brarɛzaa bɩ lɛ n taa b'ʊ.
5 A maam sɔ kan gʊaa nɛɛm kɩ,
vəŋŋə poore m gʊaa mɛ ʊ,
an bɔkarɛ an n'a mɩŋŋa busum hɔɔ gʊtɔɔ barɛ mim nɔ ʊ.
Awɔɔ dɔ a ʊ,
sɛ poore a da ma,
an poo gʊta bɩ.
6 Gʊaa nɛɛm bɩ do m bɩ,
sɛ m sɔ,
an ta hɔ bʊnyaa haay m,
wɔɔ mɛ b'an ta ʊ,
an nɩ dintim kam wɔɔ mɩsɩrbaa ma jilli,
an nɩ sɛ dam wɔɔ ma haay,
sɛhar sɛ y'a so a mɩŋŋa ʊ.
7 Gʊɔɔ a da ma,
ŋn'ɩ hɔmɩsɩr haay tʊntɔrɛ,
poohɔɔ kan bɛnnɔ kɩ,
hɔɔmɩsɩɩrɔ kʊ ŋ n'a gaatam kan zɔnɔ kɩ,
ŋ wɔ ŋ ʊ denter.
8 Bɩ gɔsɩ b'a dam ma an nɛɛm tʊntɔ y.
Hɔ bʊnyaa m,
an nɩ lɛɛ sam,
gʊɔɔ meeyaa bɔʊrɛ nyɩsɩ y'a han.
9 Ʊ nɛɛm wɔɔ sa,
ʊ n'ʊ lɛ bɔm Zuuba ʊ,
ʊ Zɩ b'ʊ,
ʊ n'a sam sɔ,
ʊ nɩ lɛ kʊsɩ dam gʊɔɔ n'ʊ,
an bɔkarɛ Woso yɩ ŋ da ŋnɩ bɔ a mɩŋŋa rɛ.
10 M danyɩnɔ,
a n a ga m kʊ wɔɔ lɛ deem-deem bɩ n bɩr ler mɩŋŋa bɔm,
an bɩr a bʊnyaa bɔm sɔ y.
11 Hiyəə ba ʊ,
an nɩ bɔm hi nyɩnta m kan hi kʊsɩ kɩ nɩ y.
12 Sɔɔn b'a dam ma an tʊgɔ nyɩ da y,
gɛɛ dɩvɛn gɔ n sɔɔn nyɩ da y.
Yɛhiyəə b'a dam ma,
an bɔ hi nyɩnta nɩ y.
Mindɔrɛ k'a a to Woso zi
13 Gʊaa y'awɔɔ barla an mim dɔ ra?
K'an a hɩnka mɩsɩrbaa tɩrga nɔ ʊ,
bʊraama zibəə nɔ ʊ.
14 Bɩ,
kʊ jɩmbaa kan heer kʊsɩ kɩ,
lɛɛzaabaa kama kɩ y'awɔɔ heer han,
a b'a lɛ bɔ a mɩŋŋɔɔ ʊ y,
b'a bɩ sɩra gore bɔ ʊ a ŋʊaarlɔ nɩ y.
15 Bala,
mindɔrɛ naa do n a to Woso zi y,
durnya hɔ m,
a to a ʊ gʊɔɔ zi,
bɔ a ʊ Sʊtaana zi.
16 Sɩra nɔ ʊ,
lɛɛ kʊ jɩmbaa n ta ʊ,
gʊɔɔ n'a hɔɔn darɛ a mɩŋŋɔɔ ma con bɩ,
lɛɛ bɩ do ʊ bɩ,
hɔ haay woo… yɩm bʊrga,
ziro bʊnyaarɔ n nyɩnta ʊ sɔ.
17 Bɩ,
mindɔrɛ k'a a to Woso zi bɩ y'a hɔ,
a mɩŋŋa,
laafɩɩ kama m,
a bʊgʊ-bʊgʊ,
kʊmarɛ kama m,
cicirzɛrɛ m gʊta,
zi mɩŋŋa barɛ m gʊta,
jɩmbaa b'a nɔ ʊ,
bɩ zambʊ b'a nɔ ʊ sɔ y.
18 Gʊɔɔ kʊ ŋ n'a kam ma kʊ laafɩɩ n bɩr ta ʊ rɔ wɔɔ,
tɩrgabaa mɩsɩrbaa bɩ ba ŋ nawʊm laafɩɩ kama nɔ ʊ,
a nyɔɔdʊ bɩ,
tɩrgabaa mɩsɩrbaa ŋn'a yɩm.