Ʊ bɩ gʊɔɔ jirə bɔ y
2
M danyɩnɔ,
wɔɔ Zuuba Yeezuu Krista n nɩ lɛbɔʊrɛ m gʊta,
awɔɔ n sɩra ka ʊ.
Naa tɔ ma bɩ,
a n a ga m k'awɔɔ n gʊɔɔ jirə bɔ y.
2 Ʊ makra sa,
a a da ma,
gʊɔɔ hɩɩyɔɔ n bɩ gasʊ awɔɔ sokʊma nɔ ʊ,
deem n huu mɩŋŋa du a ma an sarma tolleŋŋarɔ dɩnda a nyʊkʊnnɔ ma,
deem n bɩr ŋʊazaa an huu yaarsɩrɔ du a ma.
3 K'awɔɔ gʊaa k'a huu wɩsɩrɔ du a ma bɩ nyaasɩ ka mɩŋŋa,
a bɔkarɛ a hɩ m a ʊ:
«Ɩbɩɩ,
bʊr ɩ nyɩnta bɩncɛ mɩŋŋa naa do ʊ»,
a bɔkarɛ a hɩ ŋʊazaa bɩ m,
a ʊ:
«Ɩbɩɩ,
jɩm brama» gɛɛ,
a hɩ m,
a ʊ:
«Bʊr ɩ nyɩnta tara ʊ naa ʊ,
mɔɔ gam taa».
4 K'awɔɔ ba ncɩnaaʊ,
jirə bɛɛ awɔɔ bɔ a barla ra?
Bɩ,
naa k'awɔɔ n'a bam naa,
a ba bɛɛ awɔɔ ʊ dʊdɔkənno hɔɔndarɛ bʊnyaarɔ m na?
5 M danyɩnɔ ŋʊarɛ nɔ ʊ,
k'a tʊr ka mɩŋŋa!
Woso gʊɔɔ kʊ ŋʊazannɔ m durnya naa do ʊ rɔ wɔɔ bɔ ʊ,
kʊ ŋ nɩ hɔnta paan… kʊ sɩrakarɛ m bɩ yɩ,
kʊ ŋ nɩ Woso cirbəə bɩ yɩ,
Woso ɩ cirbəə bɩ do ler bɔ gʊɔɔ kʊ ŋ n'a ŋʊam nɔ wɔɔ m.
6 B'awɔɔ,
awɔɔ ɩ ŋʊazannɔ gore bɔŋ ʊ.
A n bɔkarɛ,
hɔntazannɔ wɔɔ nɩ fɩr karɛ awɔɔ ma,
ŋn'ɩ tarɛ awɔɔ m dʊdɔkənno taa.
7 Ŋ mɩŋŋɔɔ nɩ tɔ mɩŋŋa kʊ Woso a ka awɔɔ ma bɩ sʊnsɔ wʊm.
8 N y'a da Wosoci b'ʊ,
n ʊ:
«Ɩ ɩ mim ŋʊa amba ɩ mɩŋŋa m»,
Woso cirbəə bɩ mɩsɩrbaa zaa n naa do.
K'awɔɔ ɩ zuŋ ʊ,
awɔɔ y'a bam mɩŋŋa.
9 Bɩ,
k'awɔɔ ɩ gʊɔɔ jirə bɔrɛ,
mimbʊnyaa awɔɔ n'a bam bɩ,
b'awɔɔ ɩ kʊrɔma nɔ ʊ,
bala awɔɔ n zu Woso lɛ b'ʊ y.
10 Bala,
kʊ gʊaa ɩ zum lɛrɔ wɔɔ ʊ haay,
k'a bɩ bɔ deem la m,
bɔ a ʊ ŋ haay la m.
11 Bala,
Woso y'a hɩ,
a ʊ:
«Ɩ bɩ jaan da y,»
a a ya an a hɩ sɔ,
a ʊ:
«Ɩ bɩ gʊaa meeyaa bɔ ʊ y.»
Bɩ kʊ gʊaa n jaan da y,
an bɔkarɛ an gər zɛ,
bɩsɩ a a ka lɛrɔ wɔɔ ma.
12 Kʊ meer awɔɔ n'a bam,
kʊ zi awɔɔ n'a bam,
k'a dɔ a ʊ,
lɛ k'a nɩ soamɩŋŋaʊ kam bɩ,
Woso n nɩ zɛm b'a sa an awɔɔ dʊdɔ ka m.
13 Bala,
gʊaa k'a n a mim cicir zɛ bɩ,
Woso b'a cicir zɛm dʊdɔkarɛ nɔ ʊ y,
bɩ kʊ gʊaa y'a muno cicir zɛm,
a bɩ nyi bam dʊdɔkarɛ nɩ y.
Sɩrakarɛ paan… mim
14 M danyɩnɔ,
kʊ gʊaa ʊ,
a sɩra ka Woso ʊ,
an bɔkarɛ a bɩr sɩrakarɛ zibəəro sɩ barɛ y,
sɩrakarɛ k'a ʊ,
a ta m bɩ y'a dam ma an a bʊmbɔ ra?
15 A a da ma kristagʊaa n ta ʊ yar gɛɛ lʊ,
ŋ b'a huuro m k'a du a ma,
bɩ ŋ ba hɔsɩ m k'a bɩ y.
16 K'awɔɔ gʊaa deem a hɩ ŋ nɩ,
a ʊ:
«K'a doo laafɩɩ,
a huu du a ma,
k'a hɔ bɩ mɩŋŋa.»
B'awɔɔ n hɔ k'a jɩra ŋ ma bɩ ka ŋ ʊ y,
meerbaa naa do nyɔɔdʊ ta ʊ ra?
17 Ncɩnaaʊ sɔ bɩ,
sɩrakarɛ k'a bɩr zi bam bɩ,
hɔgər m fasɩ.
18 A a da ma gʊaa n a hɩ,
a ʊ,
ɩbɩɩ ɩ sɩrakarɛ m,
mɔɔ nɩ zibəəro m.
Mɔɔ y'a hɩrɛ a zaa m,
m ʊ,
ɩ sɩrakarɛ bɩ hɩnka m m,
zibəəbarɛ war nɔ ʊ,
kʊ m m zibəəro wɔɔ barɛ hɩnka a ɩ m,
k'ɩ dɔ ɩ ʊ,
mɔɔ ɩ sɩrakarɛ m.
19 Ɩbɩɩ sɩra ka ɩ ʊ,
Woso deem taan… n ta ʊ,
ɩ y'a bam mɩŋŋa,
bɩ,
zinəro naa dɔ sɔ,
ŋn'ɩ nyi bam.
20 Yarma ra,
a dɔ ɩ ʊ,
sɩrakarɛ k'a bɩr zi bam bɩ vam.
21 Wɔɔ yaaba Abraham bɩ,
a zibəəro tɔ ma bɛɛ y'a ka Woso n a ba tɩrga ra,
k'a yɛ k'a mannɩ ba a nyɩ Izakkɩ m bɩ bɛɛ ra?
22 Ɩbɩɩ dɔ kɛɛrɛ ɩ ʊ,
Abraham sɩrakarɛ bɩ,
zu a ʊ kʊ ʊ kan a zibəəro kɩ,
a zibəəro wɔɔ y'a ka a sɩrakarɛ bɩ n yɩ paan….
23 Ncɩnaaʊ m,
hɔ kʊ Wosoci b'a hɩ bɩ n kʊ yɩ,
a a hɩ,
a ʊ:
«Abraham sɩra ka Woso ʊ,
am naa,
Woso n dɩga a gʊaa tɩrga.»
Woso n a bir a gʊaasɩba sɔ.
24 Awɔɔ dɔ kɛɛrɛ a ʊ,
Woso bɩ,
gʊaa ba a nawʊm tɩrga a zibəəro tɔ ma,
a sɩrakarɛ y'a deem tɔ ma bɛɛ y.