Ʊ bɩ durnya hɔ ŋʊa y
4
A a ba lɔ awɔɔ bɩr kʊ marɛ,
an nɩ nyaa bam kan kʊ kɩ tee…?
K'awɔɔ lɛtaamarɔ bʊnyaarɔ nɩ zoo bam awɔɔ heerlɔ wɔɔ ʊ bɩ tɔ ma m.
2 Awɔɔ lɛ taa hɔɔ niŋŋoo ma,
b'awɔɔ bɩr ŋ yɩrɛ y,
bɩ tɔ ma bɩ,
awɔɔ y'a kam ma k'a gər zɛ,
awɔɔ ɩ jɩm bam bɩ hɔsɩ bɩr kʊyɩrɛ awɔɔ nɩ y,
bɩ n a ka awɔɔ nɩ zoo bam an nɩ nyaa bam kan kʊ kɩ.
Awɔɔ bɩr hɔsɩ yɛm Woso han y,
bɩ y'a ka awɔɔ ba hɔ k'awɔɔ lɛ n taa bɩ nɩ y.
3 Awɔɔ y'a yɛm b'awɔɔ bɩr a yɩrɛ y,
k'awɔɔ bɩr a yɛm han mɩŋŋa bɩ tɔ ma,
bala,
a yɛ awɔɔ nawʊm k'a sa,
a a hɔɔnhɔ ba m.
4 Taalɛrazannɔ bɛɛ n'awɔɔ nɩ y!
Awɔɔ n a dɔ a ʊ,
k'ɩ ɩ durnya jɛ ʊ,
Woso jɩm n'ɩ mɩ ra?
Gʊaa k'a lɛ n taa durnya ma bɩ,
a ba a nawʊm Woso jɩm.
5 A hɔɔn awɔɔ n'a darɛ a ʊ,
hɔ kʊ Wosoci b'a hɩ bɩ vam m na?
A a hɩ a ʊ,
Woso ɩ jɩm bam k'a a Ɛspri ka wɔɔ ʊ,
an nɩ kan wɔɔ kɩ bɩ tɔ ma.
6 Bɩ,
a y'a barka kam wɔɔ ʊ gʊta,
bɩ tɔ ma m Wosoci bɩ n a hɩ a ʊ,
Woso y'a gum mɩŋŋabusurezannɔ ma,
b'a ɩ barka kam mɩŋŋazerlezannɔ ʊ.
7 Naa tɔ ma bɩ,
k'a mɩŋŋɔɔ zer a yɛ Woso ma.
K'a a gu Sʊtaana ma,
a y'a sire an a gʊ awɔɔ ma laatʊ.
8 K'a zɔ Woso ma,
a y'a zɔrɛ awɔɔ ma sɔ.
Awɔɔ k'an kʊrɔmazannɔ,
k'a zi bʊnyaa barɛ to!
K'a heer hu bɔ hɔɔn hɩɩya-hɩɩya zannɔ ra!
9 K'a heer zaar ba a kʊrɔmarɔ wɔɔ tɔ ma!
K'a zɛ heerzar ba a nyi ka!
K'a yaawʊrɛ to a nyi ka,
k'a a heernyɔɔ bɩ to,
a a heer zar!
10 K'a a mɩŋŋɔɔ zer Zuuba taa,
k'an awɔɔ busu.
Ʊ b'ʊ muno dʊdɔ ka y
11 M danyɩnɔ,
a ba bʊnyaa hɩ kʊ ma y.
Gʊaa k'an a bʊnyaa hɩrɛ a mim ma,
gɛɛ an a dʊdɔ karɛ,
a bʊnyaa an n'a hɩm Woso lɛ ma,
an nɩ Woso lɛ bɩ dʊdɔ kam.
Bɩ,
k'ɩbɩɩ ɩ Woso lɛ bɩ dʊdɔ kam,
ɩ ba ɩ ʊ,
a dʊdɔkər,
a zuurezaa bɛɛ n'ɩ mɩ dɔ y.
12 A n bɔkarɛ,
Woso y'a deem taan… nɩ lɛ bɩ kam,
a y'a deem taan… m dʊdɔkər sɔ.
A n n'a dam ma an gʊɔɔ bʊmbɔ,
an n'a dam ma an ŋ zaar ba sɔ.
Nka n'ɩbɩɩ m,
ɩ n'ɩ mim dʊdɔ karɛ?
A bɩ yɩ mɩŋŋabusurezannɔ y
13 K'a tʊr ka mɔɔ ma kɛɛrɛ,
awɔɔ k'a n'a hɩrɛ a ʊ:
«Her,
gɛɛ booti m,
wɔɔ tam kʊ na ʊ gɛɛ kʊ na ʊ,
ʊ gɔɔta b'ʊ dɔɔraa deem,
ʊ ter ba ʊ busoo yɩ,»
14 awɔɔ n a dɔ k'awɔɔ mɩsɩrbaa bɩ yɩm lɔ booti nɩ y,
bala,
awɔɔ bɔ kʊ ʊ kan sɛbtur kɩ,
k'a bɔ b'a nyaam lɛɛm.
15 A ga awɔɔ ʊ m,
a hɩ a ʊ:
«Kʊ Zuuba yɛ,
wɔɔ mɩsɩrbaa barɛ,
ʊ na ba kan na kɩ.»
16 A n bɔkarɛ a lɛ awɔɔ n'a bɔrɛ a mɩŋŋɔɔ ʊ a dɩndarɛ nɔ ʊ.
Lɛbɔaʊ naa do lɔɔ bʊnyaa.
17 Gʊaa k'a hɔ k'a ga barɛ m dɔ,
b'a n a ba y,
a zaa mimbʊnyaa ba.