Gʊɔɔ kʊ ŋ sɩra ka biisi rɔ wɔɔ zibəəro
11
Sɩrakarɛ bɩ,
kasɛtɩ m gʊaa n ta m a heer ʊ,
a ʊ,
a hɔ k'a ta a heer lɛ bɩ yɩm,
an a dɔ paan… a heer ʊ a ʊ,
hɔ k'a bɩr yɩm mɩm m bɩ ta ʊ denter.
2 Gʊɔɔ kʊ ŋ nyɩnta biisi rɔ wɔɔ,
ŋ sɩrakarɛ y'a ka Woso nɔ ŋ yɩ ŋ la.
3 Sɩrakarɛ y'a ka wɔɔ n a dɔ ʊ ʊ,
Woso ɩ durnya da a lemim m.
Ncɩnaaʊ bɩ,
hɔ k'a nɩ yɩm mɩm m haay naa,
a to a ʊ hɔ kʊ mɩm bɩr a yɩm nɔ ʊ.
4 Abɛl sɩrakarɛ y'a ka an mannɩ k'a mɩŋŋabaa cem Kayɛn hɔ han ba an a ka Woso ʊ.
A sɩra bɩ karɛ y'a ka Woso n a hɩ a ʊ,
a tɩrga a mɩm ʊ,
bala,
Woso mɩŋŋa yɛ a ganwʊrɛrɔ wɔɔ ma.
Abɛl ga,
bɩ,
a sɩrakarɛ tɔ ma bɩ,
a gɔɔta an nɩ meer bam.
5 Enɔk sɩrakarɛ y'a ka Woso n a busu a zi,
b'a n ga y.
Gʊɔɔ n a ka ma bɩ ŋ n a yɩ y,
kʊ Woso a busu a zi bɩ tɔ ma.
Wosoci bɩ y'a hɩrɛ a ʊ,
kʊ Woso n bɔkarɛ an Enɔk busu a zi bɩ,
Woso nɔ yɩ ra.
6 Woso nɔ b'a dam ma an yɩ gɔsɩ ra,
k'a zaa n sɩra ka y.
Bala,
gʊaa k'a n'a zɔm Woso ma b'a ga m an sɩra ka a ʊ Woso ta ʊ,
an sɩra ka sɔ a ʊ,
Woso gan wʊm gʊɔɔ kʊ ŋ n a kam ma k'a a dɔ rɔ wɔɔ ma.
7 Sɩrakarɛ y'a ka Nowee n zu hɔ kʊ Woso a hɩ m b'ʊ.
Minno kʊ ŋ nɩ zɛm bɩ ba rɔ wɔɔ a lɛɛ ka an a hɩ m.
Nowee n hɔɔ wɔɔ duro yɩ a mɩm nɩ y,
b'a gu an zu hɔ kʊ Woso a hɩ b'ʊ.
A kɔɔlʊʊ gʊta ba an gasʊ ʊ kan a hargʊɔɔ kɩ,
ŋnɩ bɔlɛm yɩ.
Yɩ a ʊ ncɩnaaʊ,
an a hɩnka a ʊ,
a zamaana gʊɔɔ wɔɔ bʊnyaa,
a sɩra bɩ karɛ tɔ ma,
Woso n dɩga a gʊaa tɩrga.
8 Woso k'a Abraham bir bɩ,
sɩrakarɛ y'a ka,
an yɛ Woso ma,
an ta tara kʊ Woso n'a kaŋ ʊ k'an yɩ a hɔjirle bɩ ra.
A n a hʊr a kʊ b'ʊ,
b'a n a dɔ kʊ ta a nawʊm ka y.
9 A sɩra bɩ karɛ y'a ka an nyɩnta kʊ kʊ Woso a ler bɔ m b'ʊ,
am saana hɔ bɩ m.
Nyɩnta a ʊ pɛɛracɛrɔ ʊ,
Izakkɩ kan Zakɔɔb kɩ nyɩnta pɛɛracɛrɔ wɔɔ ʊ sɔ.
Lerbɔrɛ deem-deem bɩ Woso a bɔ brɔɔ m.
10 Bala,
Abraham bɩ,
dɔ a nawʊm kʊ k'a jɩr paŋŋa n ta ʊ bɩ ma,
k'a nyɩnta ʊ.
Woso mɩŋŋa n kʊ bɩ do dɔrɛzaa.
11 Abraham sɩrakarɛ y'a ka an wɔ ʊ an nyɩ yɩ,
bɩ ma bɩ,
a gusi an cem nyɩyɩrɛ dɔmɩm han,
a lʊ Saara maam sɔ.
Bɩ,
a a gu an sɩra ka a ʊ,
Woso hɔ k'a ler bɔ a m bɩ bam.
12 Yɩ a ʊ ncɩnaaʊ,
gʊaa deem taan… naa tɔ ma,
baa k'a gusi an a zɔ zɛ ma bɩ,
yaŋŋɔɔ n nyɩnta ʊ gʊta,
am monyaarɔ hɔ bɩ m,
am nyɩntaayaa k'a nɩ higʊta lɛ ra bɩ m.
13 Gʊɔɔ nɔɔn duro haay,
gɩnga ŋ y'a ʊ sɩrakarɛ nɔ ʊ.
Ŋ n hɔɔ kʊ Woso a ler bɔ ŋ nɩ bɩ yɩ y,
bɩ,
ŋ y'a to ŋnɩ hɔɔ wɔɔ duro yɩ laatʊ,
ŋn'a heer nyɔɔ ŋ tɔ ma,
ŋn'a hɩ ŋ ʊ,
saanɔɔ n'a mɩ,
bɩ zaakʊrɛzannɔ n'a mɩ sɔ tara burə ʊ naa ʊ.
14 Gʊɔɔ kʊ ŋ nɩ meer barɛ ncɩnaaʊ rɔ wɔɔ,
a hɩnka ŋ nawʊrɛ ŋ ʊ,
a ka a nawʊrɛ a mɩŋŋɔɔ kʊ ma.
15 Kʊ kʊrɔ kʊ ŋ y'a bɔ ʊ rɔ wɔɔ kʊrkʊr n ta ŋ nɩ,
ŋ toore yɩrɛ ŋn'a bɔ ŋnɩ ta ŋ ʊ.
16 Bɩ,
ncɩnaaʊ bɛɛ y,
a ka ŋ nawʊm kʊ k'an mɩŋŋa an lɛ da ma,
arzana ŋn'a kam ma.
Naa tɔ ma nɩ,
nyannɩ bɩr Woso zɛm kʊ n ŋ bir a gʊɔɔ y,
bala,
a kʊ banka,
kʊ ŋ nɩ bɩ nyɩnta ʊ.
17 Abraham sɩrakarɛ y'a ka an yɛ k'a Izakkɩ zɛ Woso m mannɩ,
dɔmɩm kʊ Woso a ka lɛɛ k'a dɩga ma bɩ ma.
Woso mɩŋŋa ɩ ler bɔ Abraham m k'a nyɩ ka ʊ,
an bɔkarɛ Abraham yɛ zɔɔ-zɔɔ k'a nyɩ deem taan… bɩ ka ʊ mannɩ.
18 Woso nyɩnta an a hɩ m,
a ʊ:
Izakkɩ n nɩ yaŋŋɔɔ kʊ mɔɔ ŋ ler bɔ ɩbɩɩ m nɔ wɔɔ yɩm.
19 A dɔ Abraham ʊ a heer ʊ a ʊ,
Woso ɩ paŋŋa m k'a Izakkɩ mɩm bɔ ʊ,
denter sɔ,
Woso a ya an Izakkɩ ka Abraham ʊ ɩ ʊ,
a mɩm a a bɔ ʊ.
20 Sɩrakarɛ tɔ ma m,
Izakkɩ n Zakɔɔb kan Eso kɩ barka da ʊ ŋ booti mim nɔ ʊ.
21 Sɩrakarɛ tɔ ma m sɔ,
Zakɔɔb zɛ k'a b'a zɔ bɩ,
a Zozɛf nyɩnɔ wɔɔ barka da ʊ.
A n yo a bənkə ma an zerga,
an a lɛ bɔ Woso ʊ.
22 Sɩrakarɛ y'a ka,
Zozɛf n Israyɛl gʊɔɔ wɔɔ kʊ ŋ nɩ zɛm bɩ bɔ Eziptɩ ʊ bɩ mim hɩ,
bɩ ma bɩ,
a garɛ a zɔ.
A n a hɩ ŋ nɩ kʊ ŋ n'a yaarɔ gʊr,
ŋnɩ bɔ ŋ nɩ bɔrɛ bɩ ma.
23 Sɩrakarɛ tɔ ma m,
Moyiisi zɩrɔ wɔɔ n a nyaakʊm da a yɩrɛ dɔmɩm ʊ,
mom bam kaakʊ.
Dɩga kʊ ŋ y'a ʊ nyɩ bɩ gʊɛrɛ ma bɩ y'a ka,
ŋ n nyi ba cir bɩ lɛ k'a ka bɩ bɩsɩ ka ma nɩ y.
24 Sɩrakarɛ y'a ka Moyiisi k'a b'a ba gʊaa burgu bɩ,
a n yɛ kʊ ŋ n'a bir Farawɔn nyɩmbʊɛɛrɛ nyɩ y.
25 A yɛ k'a fɩr yɩ kan Woso dogʊɔɔ wɔɔ kɩ,
an a gu mim bʊnyaa heernyɔɔ k'a nɩ cenim bɩ ma.
26 A dɔ a ʊ a heer ʊ,
a ʊ,
k'ɩ fɩr yɩ amba Krista nɩ,
a nyɔɔdʊ ta ʊ an lɛ da Eziptɩ hɔnta haay yɩrɛ m.
Bala,
dɩga a nawʊm ganwʊrɛ kʊ Woso n nɩ zɛm b'a ka a gʊɔɔ ʊ bɩ ma.
27 Sɩrakarɛ tɔ ma m,
Moyiisi n a hʊr Eziptɩ kʊ b'ʊ,
a n nyi ba cir bɩ nɔmaa nɩ y,
an jɩm kɔɔkɔɔ,
amba gʊaa k'a nɩ Woso kʊ gɔsɩ b'a dam ma an a yɩ a mɩm m bɩ yɩm.
28 Sɩrakarɛ y'a ka an pakkɩ hɔbɩrɛ bɩ ba,
an a hɩ gʊɔɔ wɔɔ m kʊ ŋ nɩ ma zaasʊ a hallɛrɔ,
kan a sɩgarɔ kɩ ma,
kʊ zɛ malɛɛka bɩ bɩ Israyɛl lɛɛkarɛ nyɩnɔ wɔɔ zɩnzɛ y.
29 Sɩrakarɛ y'a ka Israyɛl gʊɔɔ wɔɔ n bra higʊta piinə bɩ ma,
a tara n gər.
Bɩ,
Eziptɩ gʊɔɔ wɔɔ kʊ ŋ ʊ k'a bra ma sɔ bɩ,
hi bɩ nɩ ŋ bɩ.
30 Sɩrakarɛ tɔ ma m,
Zeriko pəŋŋəro wɔɔ n a dɩnda,
Israyɛl gʊɔɔ wɔɔ kʊ ŋ bɩr ma dɔmɩm saanhɩna bɩ tɔ ma.
31 Sɩrakarɛ tɔ ma m,
Rahab n ga kan bɩsɩkawosomazannɔ wɔɔ kɩ y,
a yɛ an dundolɛɛzizannɔ wɔɔ si a har ʊ an a mɩŋŋa ba ŋ nɩ.
32 M ya m bɔ hɩ?
Toore ba ʊ mɔɔ nɩ Zedenyɔɔ mim dɩndarɛ y,
kan Barakkɩ hɔ kɩ,
Samsɔn kɩ,
Zɛfte kɩ,
Davɩd kɩ,
Sanwɛl kɩ wosolɛsinnɩsorazannɔ wɔɔ hɔ kɩ y.
33 Ŋ sɩrakarɛ tɔ ma,
ŋ wɔ ʊ,
ŋnɩ yar ba ŋn'a so kʊrɔ ʊ,
ŋnɩ tɩrgabaa zi ba,
ŋnɩ hɔ kʊ Woso a ler bɔ ŋ nɩ yɩ.
Ŋ n'a ka poozannɔ n wɔ ʊ,
ŋnɩ ŋ bɩ y.
34 Ŋ sɩrakarɛ tɔ ma,
ŋ sɛrɔ gʊtɔɔ lihi,
gʊɔɔ n a ŋʊa k'a ŋ zɩnzɛ hɛnnɔ m,
ŋnɩ bɔ lɛ m.
Ŋ nyɩnta paŋŋawar nɔ ʊ,
ŋnɩ bɩ paŋŋa yɩ,
ŋ nyɩnta yarbənno wɩsɩrɔ,
ŋnɩ bʊr kʊrɔ vantɔɔ yarbənno ra,
brɔɔ n a si.
35 Lannɔ niŋŋoo sɩrakarɛ tɔ ma,
ŋ gʊɔɔ kʊ ŋ gɩngarɔ a mɩm bɔ ʊ.
Gʊɔɔ gɔsɩnnɔ fɩr yɩ,
ŋnɩ gɩnga sɩrakarɛ tɔ ma,
ŋ n yɛ ŋn'a bɔ a taa m k'a bɩ ga y,
a ba ŋ y'a ʊ ncɩnaaʊ,
k'a wɔ ʊ,
a mɩmbɔʊrɛ k'an mɩŋŋa an lɛ da yɩ.
36 Sɩrakarɛ tɔ ma m,
gʊɔɔ gɔsɩnnɔ n yɛ gʊɔɔ n yaa wʊ ŋ ma,
ŋnɩ ŋ zɛ mawʊr m,
ŋnɩ nɔɔrɔ kʊsɩ baŋŋarɔ m,
ŋnɩ ŋ du.
37 Ŋ gɔsɩnnɔ bɩmba jaarɔ m,
ŋnɩ ŋ meeyaa bɔ ʊ,
ŋnɩ gɔsɩnnɔ zɛ kumbir sii m,
gɛɛ ŋnɩ zɛ kargʊ m.
Sɩrakarɛ tɔ ma m nɔɔrɔ n kʊrɔ cɛ ma,
ŋn'a dam lɛɛ zi,
seero ci gɛɛ biiro ciro ɩ nyɩnta ŋ huuro,
ŋnɩ ŋʊazaabaa nɔ ʊ,
gʊɔɔ nɩ nyannɩ darɛ ŋ ma,
ŋn'ɩ fɩr karɛ ŋ ma.
38 A n bɔkarɛ gʊɔɔ wɩsɩrɔ m Woso mɩm ʊ,
durnya naa do gʊɔɔ wɔɔ n a ga m kʊ gʊɔɔ nɔɔn duro n nyɩnta kan ŋ kɩ y.
Ŋ sɩrakarɛ tɔ ma m,
ŋ ba lɛɛ nɩ y,
ŋn'ɩ poo sam kan ciro gaa kɩ,
ŋn'ɩ wʊtam yaarɔ ʊ kan ciro yaarɔ kɩ ʊ.
39 Gʊɔɔ nɔɔn duro haay,
Woso nɔ nyɔɔ ŋ la ŋ sɩrakarɛ tɔ ma.
A n bɔkarɛ ŋ n hɔ kʊ Woso a ler bɔ ŋ nɩ bɩ yɩ y.
40 Bala,
Woso hɔ mɩŋŋa k'a lɛ da hɔ kʊ ŋ n'a hɔɔn dam ma bɩ cɩnta k'a b'a ba wɔɔ m,
a ŋʊa a ʊ k'a ka kʊ gʊɔɔ nɔɔn duro kan wɔɔ kɩ,
k'ʊ b'ʊ dakʊ ʊ,
ʊ yɩ amba Woso n lɛ n taa kʊ wɔɔ n yɩ bɩ m fasɩ.