Ʊ ʊ ka arzana hɔɔ ma
3
K'awɔɔ a mɩm bɔ ʊ kan Krista kɩ gəəno bire ʊ bɩ,
k'a ka hɔɔ kʊ mim ʊ hɔɔ m nɔ wɔɔ ma,
lɛɛ kʊ Krista n ta ʊ Woso bɩsɩ ra ʊ bɩ hɔɔ wɔɔ.
2 K'a bɩr a hɔɔn dam arzana hɔɔ ma,
a b'a hɔɔn da durnya hɔɔ ma y.
3 Bala,
awɔɔ gɩnga,
awɔɔ mɩsɩrbaa n'a nyaakʊm da Woso zi kan Krista kɩ.
4 Kʊ Krista n'awɔɔ mɩsɩrbaa bɩ,
k'a b'a hɩnka,
a y'awɔɔ hɩnkam sɔ kan a kɩ,
a nyɩnta a lɛbɔʊrɛ nɔ ʊ.
5 Ncɩnaaʊ bɩ,
k'a hɔ kʊ tara burə hɔ m an awɔɔ mɩsɩrbaa ʊ bɩ zɛ.
Hɔɔ wɔɔ duro ba n nɩ:
Jaandarɛ m,
lannɔ gɛɛ yaarɔ barɛ m,
lɛtaamarɔ bʊnyaarɔ kʊ ŋ n'a som gʊɔɔ ʊ m,
mɛsim hɔɔnhɔ kama m,
mɩnyɔɔ m,
mɩnyɔɔ bɩ,
*wosobaawɔnnɔ yaadarɛ do vanta m bɩ.
6 Hɔɔ nɔɔn duro nɩ zɛm Woso nɔmaa m gʊɔɔ [kʊ ŋ bɩr yɛm Woso ma rɔ wɔɔ] zi.
7 Naa awɔɔ n'a bam biisi a mɩsɩrbaa nɔ ʊ.
8 Kɛɛrɛ naa,
k'a a bɔ hɔɔ nɔɔn duro ʊ haay.
A bɩ nɔmaa ba y,
a b'a heer der y,
a bɩ bʊnyaabaa ba y,
a bɩ sʊnsɔ wʊ y,
a bɩ dintim meerbaarɔ ba y.
9 A bɩ ŋʊaar ba kʊ nɩ y,
bala,
awɔɔ a bɔ a mɩsɩrbaa gusire b'ʊ,
kan a zibəəro bʊnyaarɔ wɔɔ kɩ ʊ.
10 Mɩsɩrbaa daa awɔɔ n ta m kɛɛrɛ,
mɩsɩrbaa bɩ do,
a lʊr a nawʊm tee… an nɩ bɔm kʊ ʊ kan a darɛzaa bɩ kɩ.
Yɩ a nawʊrɛ ncɩnaaʊ awɔɔ n Woso bɩ dɔ fasɩ.
11 Ncɩnaaʊ bɩ,
jirəbɔrɛ ba ʊ dɔ,
zɩɩfʊrɔ bire ʊ kan do vantɔɔ gʊɔɔ kɩ y,
gʊɔɔ kʊ ŋ gasʊ baŋŋʊ ʊ kan gʊɔɔ kʊ ŋ n gasʊ baŋŋʊ ʊ kɩ bire ʊ y,
jirebɔrɛ bahɔdonno kan pooyaa gʊɔɔ kɩ bire ʊ sɔ y,
b'a ba lɔnnɔ kan soamɩŋŋaʊzannɔ kɩ bire ʊ y.
Bala,
Krista ɩ lɛ da haay,
an nɩ gʊɔɔ k'a so ŋ ʊ rɔ wɔɔ haay heer ʊ.
12 K'awɔɔ nɩ wosogʊɔɔ wɔɔ barla bɩ,
Woso y'awɔɔ ŋʊa,
an awɔɔ bɔ ʊ k'a a so awɔɔ ʊ.
Bɩ tɔ ma bɩ,
k'a bɩr kʊ ŋʊarɛ m,
a bɩr mɩŋŋabaa bam kʊ m,
a bɩr mɩŋŋazerle m,
kan bʊgʊ-bʊgʊdabaa kɩ m,
bʊraama kɩ m.
13 K'a bɩr yɛm kʊ ma,
bɩ kʊ gʊaa ɩ mim m kan a mim kɩ,
k'a sugur ka kʊ ʊ.
Amba Zuuba sugur ka awɔɔ ʊ bɩ,
k'a ba maam sɔ.
14 A n cem woo… bɩ,
k'a bɩr ŋʊarɛ m,
bala,
ŋʊarɛ nɩ hɔ haay nam kʊ ʊ paan….
15 K'a ka kʊ heer laafɩɩ kʊ Krista n'a kam bɩ n a so awɔɔ heerlɔ wɔɔ ʊ.
Awɔɔ bir Woso ʊ naa tɔ ma,
k'awɔɔ n yɩ deem.
K'a bɩr yaa dam Woso m barka.
16 K'a Krista lemim bɩ da a heer ʊ jilli.
K'a bɩr hɔ dɩndam kʊ m,
a bɩr kʊ bɔm zaa ʊ,
hɔɔntaʊrɛ m.
K'a bɩr laa lɔm,
laarɔ ciro wɔɔ nɔ ʊ,
kan mim ma laarɔ wɔɔ kɩ,
laa kʊ *Sɛnt-Ɛspri a da a heer ʊ haay kɩ.
A laa bɩ lɔ ncɩnaaʊ,
a Woso barka da kan a heer kɩ haay.
17 Kʊ bɔ awɔɔ n'a bam,
gɛɛ kʊ bɔ awɔɔ n'a hɩm,
k'a ba Zuuba Yeezuu tɔ ma,
a bɩr Woso barka dam a tɔ ma.
Kristagʊɔɔ mɩsɩrbaa kan kʊ kɩ
18 Lannɔ wɔɔ,
k'a yɛ a zino wɔɔ ma,
amba a ga m Zuuba zuure nɔ ʊ bɩ m.
19 Zino wɔɔ,
k'a a lannɔ wɔɔ ŋʊa,
a bɩ nyaa ba kan ŋ kɩ y.
20 Nyɩnɔ wɔɔ,
k'a a zɩrɔ wɔɔ lɛ si hɔ haay nɔ ʊ,
hɔ kʊ Zuuba n'a ŋʊarɛ awɔɔ gʊr zi bɩ n naa.
21 Awɔɔ k'a m zɩrɔ wɔɔ,
a b'a nyɩnɔ wɔɔ da nɔmaa ma y,
ŋ heer y'a a zar.
22 Lɔnnɔ wɔɔ,
k'a zu a soʊrezannɔ wɔɔ lɛ ʊ,
hɔ haay nɔ ʊ.
A bɩ ŋ zi ba dundo kʊ ŋ nawʊrɛ a zi tɔ ma,
kʊ ŋ n'a lɛ bɔ a ʊ y.
Bɩ,
k'a ŋ zi ba kan a heer kɩ haay,
k'awɔɔ nɩ Zuuba gore daŋ ʊ bɩ tɔ ma.
23 Kʊ bɔ zi awɔɔ n'a bam,
k'a ba kan a heer kɩ haay,
ɩ ʊ,
Zuuba zi awɔɔ n'a bam,
gʊɔɔ hɔ bɛɛ y.
24 Awɔɔ dɔ a ʊ,
Zuuba nɩ ganwʊrɛ awɔɔ ma,
awɔɔ hɔ k'a cɩnta a gʊɔɔ m arzana ʊ bɩ yɩm.
Awɔɔ Minzaa bɩ n Krista m,
a zi awɔɔ n'a bam.
25 Gʊaa k'a n'a bʊnyaa bam bɩ,
Zuuba y'a zi bʊnyaa bɩ yawʊra bam nɩ,
a bɩr gʊɔɔ jirə bɔrɛ y.