4
Awɔɔ,
kʊ lɔnnɔ soʊrezannɔ n'awɔɔ n nɔ wɔɔ,
k'a tɩrgabaa kan sɩra kɩ zi ba kan a lɔnnɔ wɔɔ kɩ,
a dɔ a ʊ,
awɔɔ mɩŋŋɔɔ sɔ,
awɔɔ soʊrezaa ta ʊ,
an nɩ arzana ʊ.
Dʊndɔrɔ kan meerbaa nyambʊrlɛ kɩ
2 K'a bɩr yaa dam tee… a b'a zu a ʊ y,
k'a bɩr Woso barka dam.
3 K'a yaa da wɔɔ tɔ ma sɔ,
kʊ Woso n a ka k'ʊ toore mɩŋŋa yɩ,
ʊ a lemim bɩ pa da gʊɔɔ m.
K'ʊ Krista mim k'a n dɔ biisi bɩ pa da,
bɩ tɔ ma m mɔɔ nɩ lɔnnɔcɛ ʊ.
4 Kʊ m a pa da kʊ n a jɩ ma paan…,
amba mɔɔ m ga m,
m a ba bɩ m.
5 K'a dundo a mɩsɩrbaa barɛ zi gʊɔɔ kʊ kristagʊɔɔ bɛɛ n ŋ mɩ rɔ wɔɔ bire ʊ.
K'a a tɔ ʊ kan hɔ k'a a ga barɛ m kɩ wakatɩ haay.
6 K'a ka k'a meerbaa n bɩr mɩŋŋa,
yɛ n bɩr ta ma.
Kʊ laakarɔ gʊɔɔ n'a darɛ a han,
k'a nyɩbɔʊrɛ dɔ a bɔ ŋ nʊ,
amba a ga m bɩ m.
Leersore
7 Kʊ mɔɔ mim bɩncɛ nɩ,
wɔɔ danyɩ ŋʊarɛzaa Tisikkɩ zɛm b'a dɩnda awɔɔ m haay.
Zuuba zi a n'a bam taalɛra m,
mɔɔ zibəəkɔɔn m Zuuba zibəə bɩ nɔ ʊ.
8 A nyɔɔ mɔɔ nawʊrɛ awɔɔ ma tɔkkɛ k'an bɩ wɔɔ mim dɩnda awɔɔ m,
an awɔɔ heer yo.
9 Wɔɔ danyɩ Onezim,
awɔɔ gʊaa deem m,
a zɛm kan Tisikkɩ kɩ sɔ.
Taalɛrazaa m,
wɔɔ n'a ŋʊam.
Ŋ nɩ hɔ k'a nɩ naa ʊ haay dɩndarɛ awɔɔ m.
10 Aristarkɩ k'a nɩ kan mɔɔ kɩ lɔnnɔcɛ ʊ naa ʊ b'ɩ yaa darɛ awɔɔ m.
Barnabas danyɩ Markɩ b'ɩ yaa darɛ a m sɔ.
Mɔɔ lɛɛ ka m a hɩ awɔɔ m m ʊ,
k'a lee ku awɔɔ zi b'ʊ k'a si mɩŋŋa,
k'a ba maam denter.
11 Yeezuu kʊ n so ra n n'a birm Zistus b'ɩ yaa darɛ a m.
Gʊɔɔ kaakʊrɔ nɔɔm y'a minto n zɩɩfʊrɔ,
ŋn'ɩ zi bam kan mɔɔ kɩ Woso cirbəə bɩ tɔ ma.
Zɩɩfʊrɔ kʊ ŋ sɩra ka Yeezuu ʊ rɔ wɔɔ barla,
ŋ yɩ mɔɔ heer wʊtam gʊta.
12 Awɔɔ kʊrɔ gʊaa Epafras ɩ yaa darɛ a m.
Krista Yeezuu zibəənyɩ m an nɩ zoo bam awɔɔ tɔ ma yaadarɛ nɔ ʊ.
K'awɔɔ n jɩm kɔɔkɔɔ,
a ma Woso zaa bɩ ra,
K'a Woso hɔɔnhɔ haay dɔ a ba.
13 Mɔɔ sɩra bɩ,
m a dɔ m ʊ,
a ɩ kɔm gʊta awɔɔ tɔ ma,
kan Lawodisee zannɔ kɩ,
Hierapolis zannɔ kɩ tɔ ma sɔ.
14 Wɔɔ gʊaasɩba Likki k'a m lɔɔtɔr bɩ,
kan Demas k'ɩ yaa darɛ a m.
15 K'a yaa da wɔɔ danyɩnɔ kʊ ŋ nɩ Lawodisee ʊ rɔ wɔɔ m,
kan Nɩnfa kɩ m,
kan kristagʊɔɔ kʊ ŋ n'a som kʊ ma a har ʊ rɔ wɔɔ m.
16 K'awɔɔ mɔɔ ci bɩ karɩnda ba,
k'a ka Lawodisee kristagʊɔɔ sokʊma b'ʊ,
kʊ ŋ n'a karɩnda ba sɔ.
K'awɔɔ n ci k'a n'a tom Lawodisee ʊ bɩ karɩnda ba sɔ.
17 K'a hɩ Arsip m a ʊ,
an dundo a zi kan zibəə kʊ Zuuba a ka ʊ bɩ kɩ,
an a tɔ ʊ an zi bɩ ba mɩŋŋa.
18 Mɔɔ mɩŋŋa Pol nɩ leersore yaa bɩ darɛ gʊrsɩra nyambʊrlɛ m zim,
a ba n nɩ:
K'a tɔ da a nɔ ʊ,
a dɔ a ʊ,
lɔnnɔcɛ mɔɔ n ta ʊ.
Bɩ kʊ Woso barka n bɩr kan a kɩ.