2
Mɔɔ lɛ taa k'awɔɔ n zoo kɔɔda kʊ mɔɔ n'a barɛ awɔɔ tɔ ma,
kan Lawodisee zannɔ kɩ tɔ ma,
kan gʊɔɔ cir kʊ ŋ n mɔɔ yɩ a mɩm m fɩɩgaa rɔ wɔɔ kɩ tɔ ma bɩ dɔ.
2 Zoo bɩ ba mɔɔ nawʊm,
kʊ ŋ nɩ heer koodə yɩ,
kʊ ŋ lɛ n bɩr deem ŋʊarɛ nɔ ʊ,
kʊ ŋ nɩ sɩra dɔ fasɩ,
ŋnɩ heer koodə yɩ a nɔ ʊ.
Maam bɩ,
ŋ hɔ kʊ Woso a nyaakʊm da biisi bɩ dɔm.
Hɔ bɩ do bɩ,
Krista m.
3 A mɩŋŋa n ta mindɔrɛ hɔnyɩ haay woo… kan hɔdɔrɛ haay woo… kɩ m.
4 Naa hɩ mɔɔ nawʊm,
kʊ gɔsɩ bɩ bra bɩmba awɔɔ m meerbaa nyɩntɔɔ nɩ y.
5 Sɩra m,
mɔɔ ba b'ʊ kan awɔɔ kɩ y,
bɩ mɔɔ heer ɩ kan awɔɔ kɩ,
m nɩ m heer nyɔɔm k'awɔɔ nɩ jɩnɩm kan kʊ kɩ kɔɔkɔɔ a sɩra ka Krista ʊ nɔ ʊ bɩ tɔ ma.
Ʊ gɔɔta sɩrakarɛ hɔdɩndarɛ nɔ ʊ
6 Ncɩnaaʊ bɩ,
k'awɔɔ Krista Yeezuu si k'an yɩ a Zuuba bɩ,
k'a bɩr tam lɛɛ tee… kan kɩ a zɛkʊra nɔ ʊ.
7 K'a jɩm kɔɔkɔɔ a yaa ka a nɔ ʊ,
a a mɩsɩrbaa bɩ dɔ ra am cɛ hɔ bɩ m.
A nyasʊ a sɩrakarɛ bɩ m kɔɔkɔɔ,
amba n y'a dɩnda awɔɔ n bɩ m,
a bɩr yaa dam Woso m barka kan a heer kɩ haay.
8 K'a a dundo a zi,
kʊ gɔsɩ bɩ bra bɩmba a m,
gʊɔɔ hɔdɔrɛ yaarsɩ nɩ y.
Gʊɔɔ minkəm hɔdɔrɛ m,
durnya paŋŋazannɔ kʊ ŋ bɩr yɩm nɔ wɔɔ hɔ m,
a n a to Krista zi y.
9 Bala,
Woso k'an lʊnlɔ haay bɩ,
Krista maam sɔ a mɛsim nɔ ʊ.
10 K'awɔɔ a zɛ kʊ ra kan kɩ bɩ,
awɔɔ ɩ hɔ haay m,
a mɩŋŋa nɩ lɛɛzannɔ kan paŋŋazannɔ kʊ ŋ bɩr yɩm mɩm m nɔ wɔɔ burə ʊ.
11 K'awɔɔ a zɛ kʊ ra kan kɩ bɩ,
n y'awɔɔ gasʊ baŋŋʊ ʊ,
bɩ gʊɔɔ baŋŋʊgasʊrɛ bɩ bɛɛ y,
Krista y'awɔɔ gasʊ baŋŋʊ bɩ do ʊ,
awɔɔ yɔ k'a ʊ mɛsim k'an awɔɔ dam mimbʊnyaa barɛ ma bɩ wɔ ʊ bɩ m.
12 Batɛm kʊ n y'a ka awɔɔ ʊ bɩ,
awɔɔ bir n y'a ʊ kan Krista kɩ,
awɔɔ n a mɩm bɔ ʊ kan kɩ sɔ,
k'awɔɔ sɩra ka Woso paŋŋa k'a mɩm bɔ ʊ gəəno bire ʊ bɩ tɔ ma m.
13 Biisi bɩ,
gəəno n'awɔɔ m a mimbʊnyaarɔ wɔɔ tɔ ma,
k'awɔɔ ba zɩɩfʊrɔ do barla bɩ tɔ ma sɔ.
Bɩ,
kɛɛrɛ naa,
Woso awɔɔ mɩm bɔ ʊ kan Krista kɩ,
an wɔɔ mimbʊnyaarɔ haay sugur ka wɔɔ ʊ.
14 Biisi bɩ,
wɔɔ ɩ kʊrɔma nɔ ʊ,
kʊ wɔɔ n zu Woso lɛrɔ wɔɔ ʊ bɩ tɔ ma,
bɩ Krista bɩ,
a mim k'a nɩ wɔɔ yɩm wɔɔ kʊrɔmarɔ wɔɔ tɔ ma bɩ ciro wɔɔ zaar ba,
a wɔ a ʊ gɔdarkʊra ma.
15 A lɛɛzannɔ kan paŋŋazannɔ kʊ gʊɔɔ bɩr ŋ yɩm nɔ wɔɔ paŋŋa da,
an nyannɩ da ŋ ma garga ra,
kʊ gʊɔɔ n ŋ yɩ,
a bʊr ŋ la,
an ŋ gɩngaata a jɛ ʊ,
an yirbə si ŋ nɩ.
16 Ncɩnaaʊ bɩ,
a b'a to gɔsɩ n'awɔɔ dʊdɔ yar,
hɔbɩrɛ,
gɛɛ hɔmire,
gɛɛ cibsarɔ bɩrɛ mim ma,
gɛɛ mom daarɔ kan *sabaa dɔmɩnnɔ kɩ mim ma y.
17 Hɔɔ nɔɔn duro haay bɩ,
hɔɔ kʊ ŋ y'a ga m ŋnɩ bʊr lɔ wɔɔ ŋn'a hɩnkam,
hɔɔ paan…rɔ bɛɛ nɩ ŋ mɩ y.
Hɔ paan… bɩ,
Krista m.
18 A b'a to gɔsɩ n a ka a ter bʊmbɔrɛ bɩ ma y.
Gʊɔɔ kʊ ŋ n'a mɛ dam kɔrɛ ma,
ŋn'ɩ yaa dam malɛɛkarɔ m,
ŋn'ɩ hɔhɩnkarɛrɔ mim dɩndam can rɔ wɔɔ m.
Mɩŋŋabusurezannɔ nɩ ŋ mɩ vam,
a hɔɔn ŋ n'a darɛ am gʊɔɔ hɔ bɩ m.
19 Ŋ n gɔɔta n a kʊsɩ Krista ma y,
an bɔkarɛ,
bɩ m minzaa.
Krista tɔ ma m,
mɛ bɩ jilli nɩ tʊrlɛ yɩm,
an n'a kam mɛ bɩ n deem,
mɛ bɩ məsiro kan a kunəro kɩ tɔ ma,
an nɩ mam amba Woso lɛ n taa bɩ m.
20 K'awɔɔ gɩnga kan Krista kɩ bɩ,
durnya paŋŋazannɔ kʊ ŋ bɩr yɩm nɔ wɔɔ n a so awɔɔ ʊ dɔ y,
bɔ m kɛɛrɛ awɔɔ n'a mɩsɩrbaa bam ɩ ʊ,
durnya gʊɔɔ n'awɔɔ nɩ?
Bɔ m awɔɔ nɩ yɛrɛ gʊɔɔ n'awɔɔ dam lɛrɔ zuure ʊ?
21 N n'a hɩrɛ awɔɔ m,
ŋ ʊ:
Ɩ bɩ hɔ naa do sa y,
ɩ bɩ naa da ɩ lɛ ma y,
ɩ b'ɩ wɔ da naa do ma y.
22 Lɛrɔ nɔɔn duro haay gʊɔɔ hɔɔ m,
hɔɔ kʊ gʊɔɔ nɩ zi barɛ ŋ nɩ,
ŋnɩ nyam mim ŋn'a dɩndam.
23 Sɩra m,
kʊ gʊaa dɩga lɛrɔ nɔɔn duro ma,
b'a ʊ hɔɔntaʊrɛ hɔɔ m,
bala,
ŋ y'a hɩrɛ ŋ ʊ,
gʊɔɔ n yaa da,
ŋn'a mɩŋŋɔɔ zer,
ŋnɩ fɩr ka a mɩŋŋɔɔ ma,
an bɔkarɛ,
nawɔnnɔ haay naa,
ŋ bɩr a dam gʊaa han k'an bʊr a mɛsim lɛtaamarɔ ma y.