Zibəə kʊ Woso Pol da ʊ
3
Naa tɔ ma m mɔɔ nɩ yaa darɛ awɔɔ tɔ ma.
Mɔɔ mɩŋŋa Pol,
awɔɔ kʊ do vantɔɔ gʊɔɔ n'a mɩ rɔ wɔɔ,
mɔɔ du n y'a ʊ Krista tɔ ma awɔɔ daahan minto.
2 Zibəə kʊ Woso mɔɔ da ʊ a barka tɔ ma,
kʊ mɔɔ n a ba m m da awɔɔ han k'a hɔɔnhɔ n kʊ yɩ awɔɔ gʊr zi bɩ,
awɔɔ zibəə bɩ do mim ma mɩŋŋa.
3 Gɩnga kʊ Woso n ta m an a nyaakʊm da bɩ,
a a hɩnka mɔɔ m kʊ mɔɔ n a dɔ.
A mim mɔɔ dɩnda awɔɔ m ci bɩ nɔ ʊ poore m cem bɩ.
4 K'awɔɔ ci kʊ mɔɔ ba awɔɔ ma naa karɩnda ba,
awɔɔ y'a dɔrɛ a ʊ,
mɔɔ Krista mim k'a nyaakʊm da bɩ dɔ mɩŋŋa.
5 Biisi bɩ,
Woso n Krista mim k'a nyaakʊm da bɩ hɩnka gɔsɩ nɩ y,
bɩ kɛɛrɛ naa,
Woso mim bɩ do hɩnka a zibəəzannɔ m,
kan a lɛsinnɩsorazannɔ wɔɔ kɩ m Sɛnt-Ɛspri m.
6 Krista mim k'a nyaakʊm da Woso n a hɩnka bɩ ba n nɩ:
A ɩ yɩrɛ ɩ ʊ,
do vantɔɔ gʊɔɔ kʊ ŋ y'a zɛ kʊ ra kan Krista kɩ lemim nyɩnta bɩ tɔ ma bɩ,
brɔɔ hɔjirle kʊ Woso a cɩnta zɩɩfʊrɔ wɔɔ m bɩ yɩm sɔ kan ŋ kɩ.
Ŋ y'a ba hɔdeem kan zɩɩfʊrɔ wɔɔ kɩ,
ler kʊ Woso a bɔ Krista nɔ ʊ bɩ,
ŋ woo… hɔ m.
7 Woso barka bɩ tɔ ma m,
mɔɔ n ganwʊrɛ yɩ,
m m ba lemim nyɩnta bɩ zibəənyɩ,
Woso y'a paŋŋa zi ba an yɩ mɔɔ ma ncɩnaaʊ.
8 Mɔɔ m wosogʊɔɔ wɔɔ poorero wɔɔ poore,
baa kan naa kɩ haay,
Woso gan wʊ mɔɔ ma.
Kʊ mɔɔ m hɔɔ mɩŋŋɔɔ kʊ ŋ nɩ Krista nɔ ʊ,
bɩ ŋ tɛkka ba ʊ rɔ wɔɔ pa da do vantɔɔ gʊɔɔ wɔɔ m.
9 Kʊ m a ka,
kʊ gʊɔɔ m hɔ kʊ Woso a nyaakʊm da biisi bɩ kʊ yɩrɛ zaa dɔ.
Woso mɩŋŋa ɩ hɔ haay da,
a ɩ hɔ naa do nyaakʊm da sɔ biisi tee….
10 Woso bɩ,
naa do ba a ʊ,
kʊ paŋŋazannɔ kan paŋŋasoʊrezannɔ haay kʊ ŋ nɩ brama rɔ wɔɔ kɩ n Woso mindɔrɛ k'a zaa n hɔka bɩ dɔ kɛɛrɛ kristagʊɔɔ sokʊma bɩ tɔ ma.
11 Naa ba Woso ʊ,
bala,
a a cɩnta hɔɔ laatʊ,
bɩ ma bɩ durnya ba ʊ y,
k'a hɔɔnhɔ naa do ba wɔɔ Zuuba Yeezuu Krista nɔ ʊ.
12 Kʊ wɔɔ ʊ zɛ kʊ ra kan Krista kɩ ʊ sɩra ka ʊ bɩ,
wɔɔ ɩ lɛ m k'ʊ zɔ Woso ma kan heerkoodəbaa kɩ.
13 Naa tɔ ma bɩ,
a yɛ mɔɔ nawʊrɛ awɔɔ han k'a b'a heer zar kʊ mɔɔ nɩ fɩryɩrɛ nɔ ʊ awɔɔ minto bɩ tɔ ma y.
Mɔɔ fɩr bɩ yɩrɛ bɩ,
a ka a nawʊm awɔɔ m lɛbɔʊrɛ yɩ.
Krista ŋʊarɛ dɔrɛ
14 Naa tɔ ma m,
mɔɔ nɩ kukurə zɛm Zɩ Woso taa.
15 A mɩŋŋa har haay a to zi brama kan tara burə ʊ kɩ.
16 A yɛ mɔɔ nawʊm han,
a lɛbɔʊrɛ gʊtabaa tɔ ma bɩ,
k'a n'awɔɔ paŋŋa da ra Sɛnt-Ɛspri m,
k'a a da ma a bɩr paŋŋa m a heer nɔ ʊ.
17 K'an a ka sɔ,
kʊ Krista n nyɩnta awɔɔ heer ʊ sɩrakarɛ nɔ ʊ.
A yɛ mɔɔ nawʊm sɔ,
k'awɔɔ m məsi da a jɩm kɔɔkɔɔ kʊ ŋʊarɛ nɔ ʊ.
18 Maam bɩ,
awɔɔ wɔŋ ʊ kan wosogʊɔɔ wɔɔ kɩ haay,
a Krista ŋʊarɛ gʊtabaa kan a jintəbaa kɩ,
a hɛ kɩ,
kan a nɔyaa kɩ jɩ dɔ.
19 A yɛ mɔɔ nawʊm k'awɔɔ n a ŋʊarɛ bɩ dɔ,
baa kʊ gɔsɩ b'a dam ma an a dɔ haay bɩ kɩ bɩ,
k'awɔɔ n a dɔ,
kʊ Woso mɩsɩrbaa jilli n'awɔɔ heer han.