Woso wɔɔ mɩm bɔ ʊ Krista nɔ ʊ
2
Biisi bɩ,
gəəno n'awɔɔ m,
awɔɔ kʊrɔmarɔ kan a mimbʊnyaarɔ wɔɔ kɩ tɔ ma.
2 A mɩsɩrbaa bɩ ba awɔɔ nawʊm am durnya gʊɔɔ hɔ bɩ m.
A n nɩ zum paŋŋazannɔ kʊ ŋ nɩ warkʊ nɔ ʊ rɔ wɔɔ cir b'ʊ.
Cir bɩ do bɩ,
zinəro cir k'a nɩ zi bam kan gʊɔɔ kʊ ŋ nɩ bɩsɩ kam Woso ma kɩ bɩ m.
3 Wɔɔ haay,
wɔɔ nyɩnta ŋ barla sɔ,
ʊ nɩ hɔɔ bʊnyaarɔ kʊ wɔɔ mɛsim lɛ n taa rɔ wɔɔ bam.
Ʊ nɩ zure ʊ mɛsim lɛtaamarɔ bʊnyaarɔ wɔɔ ʊ,
kan ʊ hɔɔndarɛrɔ bʊnyaarɔ wɔɔ kɩ ʊ.
Kʊ wɔɔ n maam bɩ,
gʊɔɔ kʊ Woso nɔmaa n n'a kərgure ŋ la rɔ wɔɔ m wɔɔ m,
amba gʊɔɔ mɩsɩrɔ wɔɔ m.
4 Bɩ,
Woso cicirzɛrɛ bɩ gʊta maam-maam,
k'a nɩ wɔɔ ŋʊam gʊta bɩ tɔ ma.
5 Bɩ y'a ka,
gɩnga kʊ wɔɔ ʊ,
ʊ mimbʊnyaarɔ tɔ ma bɩ,
a mɩsɩrbaa ka wɔɔ ʊ Krista zɛkʊra tɔ ma.
Denter m,
Woso barka bɩ tɔ ma m,
awɔɔ n bʊmbɔrɛ yɩ.
6 Kʊ wɔɔ ʊ zɛ kʊ ra kan Krista Yeezuu kɩ bɩ,
Woso wɔɔ mɩm bɔ ʊ kan kɩ,
an wɔɔ nyɩnta kan kɩ arzana ʊ,
ʊ nɩ cirbəə bɩm kan kɩ.
7 A ba a ʊ wɔɔ m mɩŋŋa ncɩnaaʊ Krista Yeezuu nɔ ʊ,
k'a barka gʊtabaa hɩnka gʊɔɔ m,
wakatɩ haay k'a nɩ zɛm nɔ ʊ.
8 Bala,
Woso barka bɩ tɔ ma m,
awɔɔ n bʊmbɔrɛ yɩ sɩrakarɛ nɔ ʊ.
Awɔɔ mɩŋŋɔɔ minto bɛɛ y'a ka awɔɔ n bʊmbɔrɛ yɩ y,
Woso ganwʊrɛ m an a ka awɔɔ ʊ vam.
9 Awɔɔ zibəəro tɔ ma bɛɛ y,
ncɩnaaʊ bɩ,
gɔsɩ b'a dam ma an a lɛ bɔ a mɩŋŋa ʊ y.
10 Bala,
Woso ɩ wɔɔ da,
wɔɔ da a ʊ,
Krista Yeezuu zɛkʊra nɔ ʊ,
kʊ wɔɔ n'ʊ mɩsɩrbaa ba zibəəro mɩŋŋɔɔ barɛ nɔ ʊ gʊta,
Woso mɩŋŋa ɩ lɛɛ ka an zibəəro wɔɔ duro banka kʊ wɔɔ n bɩ ŋ ba.
Wɔɔ ʊ ba deem Krista zɛ bɩ tɔ ma
11 Naa tɔ ma bɩ,
k'a tɔ da a nɔ ʊ,
a ʊ:
awɔɔ,
kʊ zɩɩfʊrɔ bɛɛ n'awɔɔ m nɔ wɔɔ,
biisi bɩ,
awɔɔ zɩɩfʊrɔ wɔɔ n'a hɩrɛ a ma ŋ ʊ,
awɔɔ n gasʊ baŋŋʊ ʊ y.
Ŋ n'a hɩrɛ a mɩŋŋɔɔ ma ŋ ʊ,
a gasʊ baŋŋʊ ʊ,
kʊ ŋ nɩ makra n a mɛ ma bɩ tɔ ma.
12 Dɔmɩm kʊ ŋ nɩ naa hɩrɛ awɔɔ ma bɩ,
awɔɔ laatʊ Krista ma,
awɔɔ ba gʊɔɔ kʊ Woso ŋ bɔ ʊ rɔ wɔɔ barla y,
nyɩnta awɔɔ ʊ saanɔɔ.
Gʊaasɩbabaarɔ kʊ Woso ŋ da a gʊɔɔ wɔɔ ma,
an ler bɔ ŋnɩ bɩ,
awɔɔ n nyɩnta ŋ nɔ ʊ y.
Nyɩnta k'awɔɔ ʊ a n'a mɩsɩrbaa bɩ bam durnya nɔ ʊ bɩ,
awɔɔ ba taaheerlɛ nɩ,
b'awɔɔ n Woso dɔ sɔ y.
13 Kɛɛrɛ naa,
awɔɔ k'a nyɩnta laatʊ Woso ma bɩ,
Krista Yeezuu zɛkʊra bɩ nɔ ʊ,
awɔɔ a zɔ Woso ma,
Krista ma bɩ tɔ ma.
14 Bala,
Krista mɩŋŋa ɩ bʊr laafɩɩ m an ba ka wɔɔ ʊ,
a zɩɩfʊrɔ kan do vantɔɔ gʊɔɔ kɩ zɛ kʊ ra an ŋ ba do deem.
K'a yɛ an ga gɔdarkʊra ma bɩ tɔ ma bɩ,
a sɔkʊm k'a nɩ ŋ bire ʊ am pəŋŋə hɔ bɩ m,
an nɩ ŋ gʊngʊm kʊ ma bɩ zaar ba.
15 A zɩɩfʊrɔ lɛrɔ wɔɔ,
kan ŋ damarɔ kɩ,
ŋ sʊfɔrɔ kɩ ci zɛ,
k'a ka kʊ do hɩɩyɔɔ nɔɔm n a ba do deem taan… a mɩŋŋa zɛkʊra nɔ ʊ.
A ba a ʊ ncɩnaaʊ,
an ŋ zɛ kʊ ra laafɩɩ nɔ ʊ.
16 Krista sɔkʊm zaar ba,
ga k'a ʊ gɔdarkʊra ma bɩ dɔmɩm ʊ.
A zɛ bɩ tɔ ma bɩ,
a do hɩɩyɔɔ wɔɔ zɛ kʊ ra,
an ŋ ba mɛ deem,
an ŋ zɛ kʊ ra kan Woso kɩ.
17 Ncɩnaaʊ nɩ,
Krista n bʊr an laafɩɩ pa da awɔɔ m,
awɔɔ kʊ zɩɩfʊrɔ bɛɛ n'a mɩ,
an laatʊ Woso ma biisi rɔ wɔɔ.
Bʊr a ʊ sɔ k'a laafɩɩ bɩ pa da zɩɩfʊrɔ m,
brɔɔ kʊ ŋ nɩ jɩnjɛɛm Woso ma rɔ wɔɔ.
18 Krista mɩŋŋa barka tɔ ma m,
zɩɩfʊrɔ kan do vantɔɔ gʊɔɔ kɩ,
wɔɔ n'ʊ dam ma,
ʊ ʊ zɔ Woso ma Sɛnt-Ɛspri deem nɔ ʊ.
19 Bɩ y'a ka awɔɔ kʊ zɩɩfʊrɔ bɛɛ n'awɔɔ m nɔ wɔɔ,
saanɔɔ bɛɛ n'awɔɔ m dɔ,
bɩ lɛɛ laatʊrɛ gʊɔɔ bɛɛ n'awɔɔ m sɔ y.
Awɔɔ ɩ wosogʊɔɔ wɔɔ barla,
Woso hargʊɔɔ n'a mɩ.
20 Awɔɔ sɔ,
awɔɔ bɔ kʊ ʊ kan cɛ kʊ n n'a dɔm kɩ,
n n'a dɔm cɛjɩr kʊ kristazibəəzannɔ wɔɔ kan wosolɛsinnɩsorazannɔ wɔɔ kɩ n a cɩnta bɩ ra,
cɛ bɩ jɩr jaa wɩsɩ bɩ m Yeezuu Krista mɩŋŋa m.
21 A mɩŋŋa n'a kam cɛ bɩ jaarɔ wɔɔ nɩ kʊ nyasʊm kɔɔkɔɔ,
cɛ bɩ nɩ derm tee… an bɩ zɛm b'a ba Wosocɛ,
Zuuba zɛkʊra nɔ ʊ.
22 Zɛkʊra k'awɔɔ n ta m kan Yeezuu Krista kɩ b'a ka,
cɛ kʊ n n'a dɔm bɩ,
awɔɔ n sɔ,
k'a b'a ba cɛ kʊ Woso n a nɔ ʊ a Sɛnt-Ɛspri m.