Ci kʊ Pol a ba
EFƐƐZƖ ZANNƆ
ma
Pol ɩ yaa dam Efɛɛzɩ zannɔ m
1
Mɔɔ mɩŋŋa Pol nɩ ci bɩ barɛ awɔɔ ma.
Woso ɩ mɔɔ bɔ ʊ kʊ m yɩ Krista Yeezuu zibəəzaa.
Ci bɩ ba mɔɔ nawʊrɛ awɔɔ ma,
awɔɔ kʊ wosogʊɔɔ n'a mɩ,
[an nɩ Efɛɛzɩ ʊ,]
an nɩ yɛm Krista Yeezuu ma,
an nɩ zɛkʊra m kan kɩ rɔ wɔɔ.
2 A yɛ mɔɔ nawʊm kʊ wɔɔ Zɩ Woso kan Zuuba Yeezuu Krista kɩ n barka kan laafɩɩ kɩ ka awɔɔ ʊ.
Barka kʊ Woso a ka wɔɔ ʊ
Krista nɔ ʊ
3 Ʊ Woso barka da,
a m Zuuba Yeezuu Krista Zɩ.
A *Sɛnt-Ɛspri barka do haay ka wɔɔ ʊ arzana ʊ,
Krista zɛkʊra nɔ ʊ.
4 Woso lɛɛ ka an wɔɔ bɔ ʊ
Krista zɛkʊra nɔ ʊ,
bɩ ma bɩ,
a n durnya da y,
wɔɔ bɔ a ʊ maam k'ʊ yɩ a gʊɔɔ,
kʊ minsi bɩ nyɩnta wɔɔ gʊr zi a mɩm ʊ y.
5 K'a nɩ wɔɔ ŋʊam bɩ minto bɩ,
a a cɩnta hɔɔ tee…
kʊ wɔɔ n b'ʊ ba a nyɩnɔ
Yeezuu Krista tɔ ma,
naa a lɛ n taa a ŋʊarɛ bɩ tɔ ma.
6 Ʊ ʊ lɛ bɔ Woso ʊ,
a barka k'an ta lɛbɔʊrɛ m bɩ tɔ ma,
a ka an nawʊm wɔɔ ʊ vam,
kʊ wɔɔ nɩ zɛkʊra m kan a Nyɩ ŋʊarɛzaa bɩ kɩ bɩ tɔ ma.
7 Bala,
Krista ma bɩ tɔ ma bɩ,
Woso wɔɔ bʊmbɔ,
an wɔɔ mimbʊnyaarɔ sugur ka wɔɔ ʊ.
A barka bɩ gʊtabaa tɔ ma m.
8 A barka bɩ k'a ka wɔɔ ʊ gʊta bɩ minto bɩ,
a a ka wɔɔ nɩ mindɔrɛ m kan hɔɔn kɩ m.
9 A a ka wɔɔ n a hɔɔnhɔ k'a nyaakʊm da bɩ dɔ,
hɔ k'a cɩnta biisi tee… k'a ba Krista nɔ ʊ bɩ m.
10 Hɔ kʊ Woso a cɩnta k'a ba a nyambʊr dɔmɩm k'a bɔ ʊ bɩ ma bɩ,
a ɩ yɩrɛ ɩ ʊ,
hɔ k'a nɩ brama haay kan hɔ k'a nɩ tara burə ʊ haay kɩ bɩ,
an n'a som kʊ ma kʊ Krista deem taan… n yɩ ŋ soʊrezaa.
11 Hɔ woo… ba Woso n nawʊm a hɔɔnhɔ ma,
bɩ y'a ka an lɛɛ ka an wɔɔ bɔ ʊ,
amba a lɛ n taa bɩ m,
kʊ wɔɔ n yɩ a gʊɔɔ.
Kʊ wɔɔ nɩ zɛkʊra m kan Yeezuu Krista kɩ bɩ tɔ ma m.
Ncɩnaaʊ nɩ,
an wɔɔ hɔjirle ka wɔɔ ʊ.
12 Naa ba a ʊ,
kʊ gʊɔɔ n a lɛ bɔ a gʊtabaa ʊ wɔɔ tɔ ma,
wɔɔ kʊ wɔɔ lɛɛ ka ʊ Krista ta ʊ heer lɛ rɔ wɔɔ.
13 A do n naa sɔ kan awɔɔ kɩ.
Krista nɔ ʊ,
awɔɔ sɩra lemim bɩ ma,
lemim nyɩnta k'a n'awɔɔ bʊmbɔm bɩ m.
Awɔɔ n sɩra ka Krista ʊ,
a m bɩ Woso n Sɛnt-Ɛspri k'a ler bɔ bɩ ka awɔɔ ʊ.
14 Sɛnt-Ɛspri bɩ ka a ʊ wɔɔ ʊ,
k'a hɩnka a ʊ,
a hɔ haay,
k'a ler bɔ bɩ kam wɔɔ ʊ,
wɔɔ hɔɔ wɔɔ duro yɩm,
dɔmɩm kʊ wɔɔ n bɩ bɔlɛm yɩŋ ʊ fasɩ b'ʊ.
Naa tɔ ma bɩ,
ʊ ʊ lɛ bɔ Woso gʊtabaa ʊ.
Pol yaadarɛ
15 Naa tɔ ma m,
kʊ mɔɔ sɩra k'awɔɔ ka Zuuba Yeezuu ʊ bɩ mim ma bɩ,
m a ma sɔ,
n ʊ,
awɔɔ ɩ wosogʊɔɔ wɔɔ haay ŋʊam bɩ,
16 kʊ mɔɔ ɩ yaa dam Woso m awɔɔ tɔ ma,
bɩ mɔɔ n'a barka dam awɔɔ minto dɔmɩm haay.
17 A yɛ mɔɔ nawʊm wɔɔ Zuuba Yeezuu Krista Woso bɩ han,
wɔɔ Zɩ k'a nɩ lɛbɔʊrɛ m gʊta bɩ,
k'an mindɔrɛ ka awɔɔ ʊ,
k'awɔɔ n a da ma a bɩr Woso dɔm,
k'a b'a dɔ paan….
18 A yɛ mɔɔ nawʊm han sɔ,
k'a n'awɔɔ hɔɔn gu a lɛɛgure bɩ m,
k'awɔɔ n a da ma a taaheerlɛ k'awɔɔ bir ma bɩ dɔ,
k'awɔɔ n a da ma a hɔnyɩ k'an a lɛbɔʊrɛ nɔ ʊ bɩ dɔ sɔ,
hɔjirle hɔnyɩ k'awɔɔ nɩ zɛm b'a yɩ kan a gʊɔɔ wɔɔ kɩ bɩ m.
19 A yɛ mɔɔ nawʊm sɔ,
k'a n a ka k'awɔɔ n a paŋŋa gʊta k'a zi bam wɔɔ tɔ ma bɩ dɔ,
wɔɔ kʊ sɩrakarɛzannɔ m wɔɔ m nɔ wɔɔ.
K'awɔɔ n a paŋŋa bɩ gʊtabaa k'a cem haay dɔ.
20 Paŋŋa bɩ do Woso zi ba m an a hɩnka,
Yeezuu Krista mɩm k'a a bɔ ʊ bɩ dɔmɩm ʊ,
an a ka an nyɩnta a bɩsɩ ra arzana ʊ.
21 A n a ka Yeezuu nɩ paŋŋazannɔ do haay burə ʊ,
lɛɛzannɔ do haay,
lɛɛsoʊrezannɔ haay,
cirbəə do haay kɩ burə ʊ.
A a ka an nɩ hɔ k'an ta ʊ her durnya naa ʊ gɛɛ booti m haay burə ʊ.
22 A a ka Krista n a so hɔ haay ʊ.
A a ka an nɩ hɔ haay burə ʊ,
an a ka an a ba a gʊɔɔ wɔɔ sokʊma minzaa.
23 Kristagʊɔɔ sokʊma bɩ m Krista mɛ.
A mɩŋŋa n'a mɩsɩrbaa barɛ a gʊr zi jilli,
Woso mɩŋŋa n'ɩ mɩsɩrbaa bam Krista mɩŋŋa gʊr zi jilli sɔ.