Ʊ ʊ yo ʊ, ʊ bɩr deem
Krista zɛkʊra nɔ ʊ
4
Hɔ kʊ mɔɔ ʊ kʊ m a yɛ awɔɔ han kɛɛrɛ bɩ,
ba n nɩ:
awɔɔ dɔ a ʊ,
mɔɔ du n y'a ʊ kʊ mɔɔ nɩ Krista zi bam bɩ tɔ ma.
K'a mɩsɩrbaa ba amba Woso mɩŋŋa lɛ n taa,
an awɔɔ bir ma bɩ m.
2 K'a bɩr a mɩŋŋɔɔ zerm tee…,
a bɩr bʊgʊ-bʊgʊ,
a bɩr bʊraama m,
k'a yɛ kʊ ma ŋʊarɛ nɔ ʊ.
3 K'a a yo ʊ,
a bɩr deem Sɛnt-Ɛspri zɛkʊra bɩ tɔ ma,
laafɩɩ kan kʊ kɩ nɔ ʊ.
4 Krista mɛ bɩ deem,
Sɛnt-Ɛspri bɩ deem,
taaheerlɛ hɔ kʊ Woso wɔɔ bir ma,
k'ʊ b'a yɩ bɩ deem sɔ.
5 Wɔɔ Zuuba bɩ deem,
sɩrakarɛ bɩ deem,
batɛm deem wɔɔ n'a sim,
6 Woso deem,
a m gʊaa haay Zɩ,
a y'a so hɔ haay ʊ,
an nɩ zi bam kan gʊaa haay kɩ,
an nɩ gʊaa haay heer ʊ.
7 Bɩ Woso barka ka wɔɔ gʊaa biyəə ʊ,
Krista n a jir a hɔɔnhɔ ma.
8 Naa do Wosoci b'a hɩ ma,
a ʊ:
K'a der mim ʊ bɩ,
a lɔnnɔ gaa an ta ŋ nɩ,
an gan wʊ gʊɔɔ ma.
9 N ʊ:
‹A der.›
Naa jɩ n bɔ nɩ?
Naa ʊ k'a hɩ,
a ʊ,
lɛɛ a ka an zer tara noom ʊ paan….
10 Gʊaa k'a zer bɩ,
a mɩŋŋa ɩ der brama laatʊ,
k'a nyɩnta hɔ haay nɔ ʊ,
a ka kʊ ŋ nɩ yɩ mɩŋŋa fasɩ.
11 A ɩ gan wʊ gʊɔɔ ma.
A a ka gɔsɩnnɔ n a ba a zibəəzannɔ,
an a ka gɔsɩnnɔ m wosolɛsinnɩsorazannɔ.
A n a ka nɔɔ m lemim nyɩnta padənno,
an nɔɔrɔ ba a gʊɔɔ dundonno,
hɔdɩndagʊɔɔnzannɔ m sɔ.
12 A ba a ʊ ncɩnaaʊ,
kʊ wosogʊɔɔ wɔɔ n a da ma ŋnɩ Woso zuure zibəə bɩ ba,
kʊ Krista mɛ bɩ m ta lɛɛ sɩrakarɛ nɔ ʊ.
13 Maam bɩ,
wɔɔ tam lɛɛ haay.
Ʊ sɩrakarɛ,
kan Woso Nyɩ bɩ dɔrɛ kʊ wɔɔ n ta m bɩ kɩ n yɩ deem.
Ʊ ma Woso zaa bɩ nɔ ʊ,
ʊ bɩ bɔ kʊ ʊ kan Krista mɩŋŋa kɩ fasɩ.
14 Ncɩnaaʊ bɩ,
wɔɔ bɩ nyɩntam nyɩnɔ dɔ,
ʊ ʊ mɩŋŋɔɔ to gʊɔɔ n bɩr ʊ yəŋŋəm jɩsa kan bɩsɩ kɩ a hɔdɩndarɛ haay nɩ y,
ŋʊaarzannɔ m,
bɩ ŋ bɩ wɔŋ ʊ dɔ ŋnɩ ŋʊaar ba wɔɔ m,
wɔɔ n fɔ y.
15 Bɩ,
kʊ wɔɔ ɩ sɩra hɩm ŋʊarɛ nɔ ʊ,
wɔɔ mam hɔ haay nɔ ʊ Woso zuure bɩ nɔ ʊ,
ʊ tolle ba ʊ ʊ ba amba Krista m,
a m minzaa.
16 A mɩŋŋa tɔ ma m,
mɛ bɩ vəŋŋəro wɔɔ jilli n kʊ nyasʊ ŋnɩ deem.
Gʊaa mɛ kunəro n'a kam mɛ bɩ vəŋŋəro wɔɔ nɩ kʊ nyasʊm,
mɛ bɩ n deem.
Maam bɩ,
kʊ mɛ bɩ vəŋŋə biyəə y'a zi bam,
bɩ n'a kam mɛ bɩ n bɩr tam lɛɛ tee… an bɩr mam ŋʊarɛ nɔ ʊ.
Mɩsɩrbaa daa kʊ Krista a ka wɔɔ ʊ
17 Hɔ kʊ mɔɔ n'a hɩrɛ awɔɔ m,
m n'a yɛrɛ awɔɔ han Zuuba tɔ ma bɩ ba n nɩ:
A b'a ya a mɩsɩrbaa bɩ ba am gʊɔɔ kʊ ŋ n Woso dɔ rɔ wɔɔ hɔ bɩ nɩ y,
zu ŋ nawʊrɛ a hɔɔndarɛrɔ ʊ,
ŋ bɩ hɔsɩ yɩm naa barɛ nɔ ʊ y.
18 Monsigə y'a so ŋ hɔɔn ʊ,
ŋ laatʊ mɩsɩrbaa kʊ Woso n'a kam bɩ ma.
Bala,
ŋ n hɔsɩ dɔ y,
kʊ ŋ y'a heer ta bɩ tɔ ma.
19 Nyannɩ bɩr ŋ zɛm fɩɩga y,
a da ŋ y'a ʊ jaandarɛ lɛ ʊ,
ŋnɩ dintim mɩsɩrbaa do haay bam,
b'a nyannɩ ba ŋ nɩ y.
20 B'awɔɔ,
mɩsɩrbaa naa do bɛɛ Krista a dɩnda awɔɔ nɩ y.
21 A mɩŋŋa mim n y'a dɩnda awɔɔ m bɩ,
kʊ kristagʊɔɔ n'awɔɔ m bɩ,
n nɩ sɩra k'a nɩ Yeezuu nɔ ʊ bɩ dɩnda awɔɔ m.
22 Naa minto bɩ,
awɔɔ a ga m,
a a biisi mɩsɩrbaa bɩ to,
a a bɔ a mɛsim k'a lɛtaamarɔ bʊnyaarɔ nɩ bra bɩmbarɛ awɔɔ m k'awɔɔ zaar ba b'ʊ.
23 K'a lʊrlɛ yɩ a heer kan a hɔɔn kɩ ʊ.
24 K'a mɩsɩrbaa daa kʊ Woso a ka awɔɔ ʊ bɩ ba.
Woso ɩ mɩsɩrbaa bɩ do da an bɔ a mɩŋŋa rɛ,
bɩ y'a ka mɩsɩrbaa bɩ do n tɩrga,
an Woso nɔ yɩ,
an sɩra sɔ.
25 Naa tɔ ma bɩ,
a b'a ya,
a ŋʊaar ba y.
Gʊaa biyəə n sɩra hɩ a mim m,
bala mɛ deem vəŋŋoo n wɔɔ m.
26 K'awɔɔ nɔ ma ʊ,
a b'a ka a mimbʊnyaa ba y.
A b'a nɔmaa bɩ to a nɔ ʊ gum n da nɩ y.
27 A bɩ zaa ka Sʊtaana ʊ,
an bʊr a ra y.
28 Gʊaa k'a nɩ koor bam biisi bɩ,
an a wɔ bɔ koorbaa b'ʊ k'an zi ba an a lɛɛmaa hɔ yɩ,
maam bɩ,
a y'a dam ma an hɔ yɩ,
an n'a dam gʊaa k'a lɛ n taa daahan ma han.
29 Meerbaa bʊnyaa sɩ n a ga m an bɔ awɔɔ lɛ ʊ y,
k'a meerbaa k'a n'a dam gʊɔɔ han,
ŋnɩ ta lɛɛ sɩrakarɛ nɔ ʊ bɩ ba.
K'a meerbaa mɩŋŋa ba,
k'an a da gʊɔɔ kʊ ŋ n'a tʊr karɛ awɔɔ ma rɔ wɔɔ han.
30 A b'a ka a Sɛnt-Ɛspri heer zɛ ma y,
Woso bɩ,
a ka a ʊ awɔɔ ʊ,
k'a a jɩ da wɔɔ ʊ,
bɩ n'a hɩnkarɛ a ʊ,
Woso y'a so awɔɔ ʊ,
an n'a hɩnkam sɔ a ʊ,
dɔmɩm ɩ zɛm Woso n bɩ wɔɔ yɔm fasɩ-fasɩ.
31 A b'a to mim n bɩr a heer ʊ kan gʊaa kɩ y,
a bɩ yɩ heerbusuzannɔ y,
a bɩ nɔmaa ba y.
A bɩ yɩ hany-hany zannɔ y,
a bɩ sʊnsɔ wʊ y,
k'a zi bʊnyaabarɛ do haay to.
32 Bɩ,
k'a bɩr mɩŋŋa kan kʊ kɩ,
a bɩr kʊ ŋʊam gʊta,
a bɩr sugur kam kʊ ʊ,
amba Woso sugur ka awɔɔ ʊ Krista nɔ ʊ bɩ m.