Maarii tidəər nɔ Yeezuu gannɔ ma
12
*Pakkɩ cibsa k'a gɔɔta dɔmɩm sɔrdɩ bɩ,
Yeezuu ta Betanii ʊ,
kʊ kʊ Lazaar n ta ʊ b'ʊ.
Kʊ bɩ do a Lazaar mɩm bɔ ʊ bɩ.
2 N yirbəə hɔbɩrɛ ba b'ʊ,
n n a ka Yeezuu ʊ.
Martɩ nyɩnta an nɩ hɔbɩrɛ jirm,
bɩ ma bɩ,
Lazaar ɩ gʊɔɔ kʊ ŋ nɩ hɔbɩrɛ bɩm kan Yeezuu kɩ rɔ wɔɔ barla.
3 Maarii n tidəər nyɔɔ kʊ n y'a ba naar paan… m a lɛ n kʊsɩ bɩ sa gedre ʊ,
an a nɔ Yeezuu gannɔ ma,
an a minkə gaa an a nʊnnɔ ma,
tidəər ji bɩ n sʊr har bɩ ma haay.
4 Karɩndanyɩnɔ wɔɔ gʊaa deem Zidas Iskarɩyɔtɩ kʊ gʊaa k'a nɩ zɛm k'a bɩ Yeezuu nyasʊ a ka b'a hɩ,
a ʊ:
5 «Bɔ minto,
n n tidəər naa do sa,
n n a hɛɛ *deniyee zɔɔkarkʊ,
n n a ka cicirzannɔ ʊ?»
6 K'a hɩ ncɩnaaʊ bɩ,
a bɩr yɩrɛ ɩ ʊ,
a hɔɔn an n'a dam cicirzannɔ ma y.
Bala,
a mɩŋŋa koor m,
k'a y'a so busoo bɩ zibəə b'ʊ bɩ,
a ɩ hɔ kʊ n n'a cɩntam bɩ kʊnam.
7 Yeezuu n a hɩ,
a ʊ:
«K'a to!
Naa do ba an nawʊm mɔɔ birle dɔmɩm minto.
8 Cicirzannɔ wɔɔ ɩ kan awɔɔ kɩ dɔmɩm haay,
bɩ,
mɔɔ bɩ kan awɔɔ kɩ dɔmɩm haay y.»
9 Bɩ ma bɩ,
zɩɩfʊrɔ cir gʊta a ma,
ŋ ʊ,
Yeezuu bʊr b'ʊ.
Ŋ n bʊr zi,
bɩ ŋ n bʊr a minto bala y,
bʊr ŋ y'a ʊ k'a bɩ Lazaar k'a mɩm bɔ ʊ gəəno bire ʊ bɩ yɩ.
10 *Wosocɛmannɩbənno jɩtannɔ wɔɔ a cɩnta k'a Lazaar zɛ gər sɔ,
11 bala,
a minto y'a ka,
zɩɩfʊrɔ gʊɔɔ gʊta n'a gʊrɛ ŋ ma,
ŋn'ɩ Yeezuu mim sim.
Yeezuu ɩ gasʊm Zerizalɛm ʊ kan cirbəə kɩ
12 Dɔ k'a mɛ bɩ,
gʊɔɔ gʊta kʊ ŋ bʊr cibsa bɩ ma rɔ wɔɔ kʊ ŋ y'a ma,
ŋ ʊ,
Yeezuu ɩ zɛm Zerizalɛm ʊ bɩ,
13 ŋ bɛ gɔ lɛɛ yɩnyar,
ŋnɩ ta k'a yaa a zɛ ʊ,
ŋn'ɩ zee darɛ,
ŋ ʊ:
«*Hozaana!
Gʊaa k'a nɩ zɛm Woso tɔ ma,
*Israyɛl cir bɩ n barka yɩ.»
14 Yeezuu brapoo yɩ,
an da ʊ,
amba n y'a gʊrsɩra ba bɩ m:
15 *Siyɔn zannɔ,
a da bɩ bɔ ʊ y.
Ba awɔɔ cir nɩ zɛm n na.
Da a ʊ brapoo ʊ.
16 Karɩndanyɩnɔ wɔɔ n lɛɛ ka ŋnɩ hɔ k'a nɩ zɛm naa jɩ dɔ hɔɔ y.
Bɩ,
kʊ ŋ Yeezuu lɛbɔʊrɛ yɩ bɩ,
ŋ hɔ kʊ ŋ y'a gʊrsɩra ba a minto bɩ tɔ da a nɔ ʊ,
bɩ naa ba ŋ y'a ʊ a minto.
17 Bɩ,
gʊɔɔ kʊ ŋ nyɩnta kan Yeezuu kɩ dɔmɩm k'a Lazaar bir yaa ʊ an bɔ,
an a mɩm bɔ ʊ gəəno bire ʊ rɔ wɔɔ a kasɛtɩ ka.
18 Bɩ gʊɔɔ gʊta bʊr zi.
Kʊ ŋ y'a ma,
ŋ ʊ,
a hoser naa do ba bɩ minto y'a ka,
ŋnɩ bʊr k'a b'a zɛ ʊ.
19 *Farizɛɛnrɔ wɔɔ n'a hɩm kʊ m,
ŋ ʊ:
«Awɔɔ yɩ,
a dɔ a ʊ,
a b'a dam ma,
a hɔsɩ ba y.
K'a dɩga gʊɔɔ haay kʊ ŋ nɩ zure a jɛ ʊ!»
Grɛkkɩrɔ y'a kam Yeezuu ma
20 Cibsa k'a n ta ʊ bɩ minto,
grɛkkɩrɔ gɔsɩnnɔ der k'a Woso da ʊ.
21 Ŋ n a hɩ Galilee kʊ Bɛtsayɩdaa gʊaa Filipi m,
ŋ ʊ:
«Wɔɔ harzaa,
wɔɔ lɛ n taa k'ʊ Yeezuu yɩ.»
22 Filipi n ta,
an aa hɩ Andɩr m,
ŋn'a zɛ kʊ ra,
ŋn'a hɩ Yeezuu m.
23 Yeezuu n a nyɩ bɔ ŋ nʊ,
a ʊ:
«Wakatɩ a ku kʊ *Gʊaanyɩ bɩ n lɛbɔʊrɛ yɩ.
24 Sɩra paan… mɔɔ n'a hɩrɛ awɔɔ m:
kʊ hɔyaa a zo tara ʊ,
a n ga y,
gɔɔta an nawʊrɛ a deem.
Bɩ,
k'a ga,
nyɩ an n'a dam gʊta.
25 Gʊaa k'a a mɩsɩrbaa ŋʊa,
a b'a yɩrɛ y.
Bɩ,
gʊaa k'a kaanm a mɩsɩrbaa m durnya naa do nɔ ʊ,
a mɩsɩrbaa yɩm *mɩsɩrbaa k'a nyarɛ ba ʊ bɩ nɔ ʊ.
26 Kʊ gʊaa lɛ taa k'a mɔɔ zi ba k'an zu mɔɔ ʊ,
bɩncɛ kʊ mɔɔ n ta ʊ bɩ,
mɔɔ zibəənyɩ bɩ nyɩntam b'ʊ sɔ.
Gʊaa k'a mɔɔ zi ba,
Zɩ y'a daŋ ʊ.
27 Naa ma bɩ,
mɔɔ heer a zɛ kʊ ma,
bɩ,
kʊ m a hɩ mɔɔ ʊ lɔ?
Kʊ m a hɩ,
mɔɔ ʊ:
M Zɩ,
mɔɔ bʊmbɔ wakatɩ naa do ma gɛɛ?
Bɩ,
wakatɩ naa do minto y'a ka,
mɔɔ n bʊr.
28 Zɩ,
ɩ lɛ bɔ ɩ tɔ ʊ.»
Leer n a to brama,
an a hɩ,
a ʊ:
«Mɔɔ n lɛ bɔ ʊ,
bɩ mɔɔ yɩ m yarɛ,
m m lɛ bɔ ʊ.»
29 Gʊɔɔ kʊ ŋ nyɩnta b'ʊ,
ŋnɩ leer bɩ ma rɔ wɔɔ y'a hɩrɛ,
ŋ ʊ,
brama ɩ həən si.
Gɔsɩnnɔ ʊ,
malɛɛka ɩ meer ba kan kɩ.
30 Yeezuu n a hɩ,
a ʊ:
«Leer naa do n bɔ mɔɔ minto y,
bɔ a ʊ,
awɔɔ minto.
31 Durnya naa do dʊdɔ karɛ n naa kɛɛrɛ,
bɩ,
n lam durnya naa do cir bɩ ra,
an bɔ garga ra.
32 Bɩ kʊ n mɔɔ busu brama durnya burə ʊ,
mɔɔ gʊɔɔ haay gaarɛ m zi.»
33 Meerbaarɔ nɔɔn duro ba Yeezuu ʊ,
k'a a zɛ zaa hɩnka.
34 Gʊɔɔ wɔɔ n a nyɩ bɔ nʊ,
ŋ ʊ:
«*Lɛrɔ ci b'a dɩnda wɔɔ m,
a ʊ:
*Krista gɔɔtam dɔmɩm k'a nyarɛ ba ʊ bɩ nɔ ʊ.
Ɩbɩɩ ba lɔ,
ɩ n'a hɩrɛ,
ɩ ʊ,
n Gʊaanyɩ bɩ busum brama?
Gʊaanyɩ naa do,
nka nɩ?»
35 Yeezuu n a hɩ ŋ nɩ,
a ʊ:
«Lɛɛgure gɔɔta awɔɔ minto dɔmɩm poore nɔ ʊ.
Bala,
lɛɛgure k'a gɔɔta an ta ʊ bɩ,
k'a ta a nɔ ʊ,
a b'a ka monsigə bɩ n zɛ awɔɔ ra y.
Bala,
gʊaa k'a nɩ tam monsigə ʊ bɩ n a dɔ kʊ ta an nawʊm ka y.
36 Kʊ lɛɛgure bɩ gɔɔta an ta ʊ bɩ,
k'a sɩra ka lɛɛgure b'ʊ,
k'a a ba lɛɛgure nyɩnɔ.»
Yeezuu k'a meer ba kan ŋ kɩ ncɩnaaʊ bɩ,
a a hʊr an a nyaakʊm da ŋ lɛɛ.
Gʊɔɔ gʊta n sɩra ka Yeezuu ʊ y
37 Baa kan hoserlo k'a ŋ ba ŋ mɩm ʊ rɔ wɔɔ kɩ haay,
ŋ n sɩra ka ʊ y,
38 kʊ hɔ kʊ *wosolɛsinnɩsorazaa Ezayii a hɩ n bɩ n kʊ yɩ:
‹Zuuba,
nka ɩ hɔ kʊ wɔɔ hɩ bɩ si?
Nka Zuuba a paŋŋa hɩnka nɩ?›
39 Ezayii deem-deem b'a hɩ kʊ bɔ minto y'a ka,
ŋ b'a dam ma,
ŋn'a si y:
40 ‹A ŋ mɩm ta,
an ŋ heer ka,
kʊ ŋ mɩm b'a da ma an lɛɛ yɩ,
kʊ ŋ heer b'a da ma an a jɩ ma y,
kʊ ŋ b'a bɔ a taam,
kʊ m ŋ waa y.›
41 Ezayii naa do hɩ,
bala,
a Yeezuu lɛbɔʊrɛ bɩ yɩ,
an a mim dɩnda.
42 Kan bɩ kɩ haay,
jɩtannɔ wɔɔ barla,
gʊta a mim si.
Bɩ,
*farizɛɛnrɔ wɔɔ minto,
ŋ bɩr a kasɛtɩ karɛ y.
Bala,
ŋ yɩ nyi bam,
ŋ y'a la a ra *sokʊmacɛ b'ʊ.
43 Gʊɔɔ lɛbɔʊrɛ ŋ n'a ŋʊarɛ,
ŋ bɩr a kam Woso hɔ ma y.
44 Yeezuu n a leer busu,
an a hɩ,
a ʊ:
«Gʊaa k'a sɩra ka mɔɔ ʊ bɩ,
sɩra bɛɛ a ka mɔɔ ʊ y,
Zɩ k'a mɔɔ nyɔɔ b'a sɩra ka ʊ.
45 Bɩ gʊaa k'a nɩ mɔɔ yɩrɛ,
Zɩ k'a mɔɔ nyɔɔ b'a n'a yɩrɛ.
46 Mɔɔ m lɛɛgure,
m bʊr durnya ʊ,
kʊ gʊaa k'a nɩ sɩra kam mɔɔ ʊ bɩ bɩ gɔɔta monsigə ʊ y.
47 Kʊ gʊaa mɔɔ lemim ma,
b'a n a si y,
mɔɔ bɛɛ n n'a dʊdɔ karɛ y.
Bala,
mɔɔ n bʊr kʊ m bɩ durnya dʊdɔ ka y,
bʊr mɔɔ ʊ kʊ m bɩ durnya bʊmbɔ.
48 Gʊaa k'a kaanm mɔɔ m,
a n mɔɔ lemim bɩ si,
a zaa dʊdɔkər ta ʊ.
Lemim kʊ mɔɔ hɩ bɩ y'a dʊdɔ kam durnya nyarɛ hinni ʊ.
49 Mɔɔ n m mɩŋŋa mim dɩnda y,
Mɔɔ Zɩ k'a mɔɔ nyɔɔ b'ɩ hɔ kʊ mɔɔ m ga m,
m a hɩ bɩ hɩ mɔɔ m,
kʊ m a hɩ.
50 Mɔɔ dɔ mɔɔ ʊ,
a lɛ bɩ,
*mɩsɩrbaa k'a nyarɛ ba ʊ bɩ m.
Hɔ kʊ mɔɔ n'a hɩm bɩ,
a hɩ mɔɔ nawʊrɛ amba mɔɔ Zɩ a hɩ mɔɔ m bɩ m.»