Baloa nda
Yuda
Nseseɔ
1
Eme Yuda, ne nde muna-amá-Yakɔbɔ, ne nde nkɔbɛ nde ma Yesu Kilisitɔ. Nenoandekei benu nde Ebha Mokonga anokogi, anokóndi na anolanga a yɔnga la Yesu Kilisitɔ.2 Mokonga atɔdisɛ anu bonja, bɔkɔlɔ na ekóndi nd'aɛ.
Bàgolisi a mbéa bamɔna mande mokpata
Olengɛ go 2 Pɛt 2.1-17
3 Badhami bakóndaga, nedhu na sei kpɛɛ a andekea l'anu a yɔnga la bolamisi nde be nee besu bɔbhu. Nɛɔni bende atɔlɛli nenoandekeɛ a dhodeisa la meema anu, bomaneɛ boosobela nde Mokonga aepi bato nde baɛ nkobà imoti sìa. 4 Nenoandekei bo nga, bato bajede bangi a nsɔlɔ anu a bɔsɔmbi. Batia a asii ajede mbinɔ a boangɔ nda Mokonga nde masu nga bende, bakɔlɛ éma bhulibhu nde meema abɔ akóndi. Ibɔ bankɔ́mi Yesu Kilisitɔ, mmbe a nde ngele a ngolisi nde masu na Mokama. Toa la kala, Ketabo nda Mokonga ai n'aye mɛnɔ asɔ̀i yɔnga nd'abɔ.
5 Nangɛ sinde boúbha na yɔnga ndɔ bhuu, nekóndi kanisisa l'anu bende, Mokama ai aeoloisi baIsilaɛli nkobà imoti a tosa l'abɔ a lɛɛngɔ a Misili, mpa ab'aetíndisa bande ai bakɔ́mi lebea l'aɛ. 6 Bokanisɛ to mbinɔ a bamalaeka bimoti : bande ai babhɔnisi bokama nde Mokonga ai aepi, aba batoa ibɔ bamɛnɛ a mpuɔ nd'abɔ. Mokonga ai aenyangigi na ngolí a ngɔa, ab'aebhísa asub'a ngɔmɔ, a dhoda nda mɛyɔ a bondeaga la esa mati nda mokpata. 7 Bokanisɛi go mbinɔ a Sɔdɔmɔ, Gɔmɔla na bɔma nda bhi-bhi bhi-bhi. Nga, n'ibɔ ai bangilili bosalati ajede bía bamalaeka ndɔ. Ai bakɔla bosalati na sei-sei a éma nda ngobho inde anyɛnani na ind'a koto. Banoba a nsa nda mɛyɔ, na indɔ a nde maanɔ ang'a bato bɔbhu.
8 Nangɛbɛ n'ibɔ bakɔlana masa bo. Njei nde baɔta a masa inde aujisa ngobho abɔ na bhɔnisa la bokama nda Mokonga. Bayɔnga ajede ang'a bamalaeka a boumu. 9 Nangɛ Mikaɛli, mokama nde ma bamalaeka, mbènɔ nde ai bakokotana na sanea la kiinda a Mósa bona Diabɔlɔ, nnd'ai akɔli indɔ. Ai agii gɔɛ nde ate: «Mmbɛ Mokama aɔɔnisi ha giti!» 10 Mpa, bato ndɔ bayɔngaga ajede a éma-li bhulibhu nde nnda baúbha. Maɛnɛkɔ abɔ atamba áma imoti na tambela l'abɔ bía banyama nde nnda ba na maɛnɛkɔ. Indɔ ndɔ aebungisaga ndɔ. 11 Boanya ang'abɔ! Nga, babelei nde asii ajede nda Kaini†. Na baedhema bato nga badɔ̀ɛ botondi† sinde Balama ai akɔla nee. Boanya ang'abɔ! Nga, babungaga mande a yɔnga la bujede l'abɔ sinde Kɔla† ai akɔlani nee.
12 Ibɔ yɛu babhìsa nkokoto a nsɔlɔ anu a mbènɔ a léa la eléa la ekóndani, aki baléa na kuta makanga soni, ago aki bakaba masa kuta la ibɔ nganga. Ibɔ, ba nde bía ebundu nde kukisa ahehuisa makanga mbúa. Ba nde bía mee nde nnd'abɔta mbùa nangɛ abɛ a mbènɔ a bɔta-li. Na n'aye bahúu miigi-li, ab'akua nkobà ibale. 13 Bakèngani na kukai akpɛ nda ngɛji na ɛkɔli abɔ nda soni a nde bía hulu a kukai a ngɛji. Bakèngani na balɛlɛngɔa nde bahomaga. Mokonga aye aebhísii mpuɔ asub'a dhoda mati kpɛɛ a mɛyɔ.
14 A yɔnga l'abɔ yɛu nde Ɛnɔka, nto nde maa ɛbɔtɛana nda sobe-lalɔ toa la ang'a Adamu, ai alabhi ate: «Bolengɛ to, Mokama abhia na bamalaeka a bobhu nde baɛ batì kpɛɛ 15 nga bende, asɔ̀ɛ yɔnga nda bato bɔbhu. Asɔ̀a mande yɔnga nda bato a ilɔlɔ bɔbhu a yɔnga la bujede nd'abɔ bhulibhu nde ai bakɔli, na yɔnga ajede-jede bhuu nde ai bayɔngi ang'a Mokonga.» 16 Bato ndɔ nnda ba na bujɛmɛ. Baikili masa lákanaga na bakua ibɔ nganga sei-sei a éma ajede. Nyɔɔ abɔ atumi masa na yɔnga la boebhebha na ind'a jangisa la bato a yɔnga la ɛmbɔ nd'abɔ ibɔ bamɛnɛ.
Maanɔ ang'a bakilisitɔ
17 Mpa, benu, badhami bakóndaga, bokanisɛ yɔnga nde batetei nde ba Mokama nde masu Yesu Kilisitɔ ai bayɔngi kala. 18 Ai banongodea bende: «A mbènɔ a sungia, bato banɔtɛbhɛaga mande. Babelea mande sei-sei nd'abɔ ajede† inde nnd'ansikisa Mokonga.» 19 Ibɔ yɛu ba nde tine a katanisa la bato. Baaka masa yɔnga nda na lɛɛngɔ, nndaga ba na meema a Mokonga. 20 Mpa benu, bakóndaga, bomɛ hɛlɛ asub'a boosobela nd'anu inde nnd'a na bujede. Bɔmɛmɛi a ekanda nda Meema Mbhumani. 21 Boikɛi asub'a ekóndi nda Mokonga, na bondeaga la bonja nda Mokama nde masu Yesu Kilisitɔ mmbe anopa lenda l'a mɛyɔ.
22 Boekuliɛi ngomi bato nde ba na maamaa. 23 Boelamisɛ batɔɔ a tosa l'abɔ a nsa. Na batɔɔ go, boekuliɛ ngomi n'aha bootea. Bɔbhɛdia-i mɛnɔ ngɔmbɛ nd'abɔ nde aujuanigi na tambela nd'abɔ nd'ajede.
Ebhebhɔ nda sungiaga
24 Ang'a mmbe aanga anolanga nga bogua-i a ilɔlɔ na kidisa l'anu mosá la boumu nd'aɛ makanga kpɔkɔsɔ asub'a bujɛmɛ mati. 25 Ang'a Mokonga iyɛ nganga, Namisi nde masu nyɛnɛla l'a Yesu Kilisitɔ, Mokama nde masu, abɛ na boumu, botì, ekanda, bokama, mosá la éma-li bhulibhu, mbènɔ nde, na a mɛyɔ na mɛyɔ, Abɛ bo!