Baloa l'inda isalɔ nda
Yɔani
Nseseɔ
1
Eme Nkpɛga nde maa Kanisà, neoandekei owɛ Gayo nkóndaga nde mamɔ, neokóndi a domi.
2 Mpa, nkóndaga nde mamɔ, nekabi nte éma nd'aɔ bhulibhu atɔisanɛ, na ngobho aɔ akandɛgɛ sinde meema aɔ akandiki nee ndɔ. 3 Adhuma nejangi kpɛɛ, mbènɔ nde badhasu bàlebei adhuma babhii na tɔndɔlisa la bende, o na domi asub'aɔ, na bende olenda asub'a domi. 4 Nndag'a beli inde amopi bujɛmɛ mati, na nndag'a nde ɔka la bende Ban'ami batamba a domi.
Tambela anja nda Gayo
5 Nkóndaga nde mamɔ, éma nde ɔkɔli ang'a bàlebei badhasu nangɛbɛ ang'a batambi, aɔngiani bende o nde nto a domi. 6 Batɔndɔlisi yɔnga la ekóndi aɔ asub'a Kanisà nd'asu. Belebele, ootabelɛ a tamba nd'abɔ sinde am'bɔngɛli nee Mokongaa. 7 Nga, bakɛngɛtisi tamba nd'abɔ a bhɛda la nkási nda Kilisitɔ, makanga dɔ̀a la éma nde atoi ang'a bande nndaga bamúbha Mokonga. 8 Ìbo yɛu atɔlɛli na besu beetabelɛ bato bía bandɔ. Nga, a kɔla la ìbo bejuana n'ibɔ a nkási a labha la domi.
Mbinɔ a Diɔtɛlɛfɛ bona Dɛmɛtiliɔ
9 Adhu neandekei Kanisà nyia-baloa, mpa Diɔtɛlɛfɛ mmbe aki akónda boobhisagala mosá ndɔ, nndaga asɔɔkab. 10 Ang'a indɔ, n'aye mande negee o, nɛnɔtɔmilaga mande éma nde akɔla, nga iyɛ ayɔngaga ajede na mbéa a yɔnga l'asu. Nnda masa indɔ, iyɛ nnda aepikila bàlebei badhasu. Na bande ai ba na sei a pikila la bàlebei badhasu ndɔ, aki aɛkɔ́misa, na bèaga l'abɔ dhɔlɔ a Kanisà.
11 Mpa nkóndaga nde mamɔ Gayo, obá-i okengelaga kɔla la éma ajede, mpa ind'anja yɛu gɔɛ. Nto nde akɔla ind'anja a nde mmbe ma Mokonga. Mpa, mmbe akɔla bujede nnd'amúbha Mokonga.
12 Bato bɔbhu batɔndɔlisa, Dɛmɛtiliɔ a nde nto manja. Nangɛbɛ domi nde a asub'aɛ antɔndɔlisa. Na besu bɛyɔnga hɛlɛ a yɔnga l'aɛ, na owɛ oúbha bende bɔtɔndɔlisi asu ndɔ a nde nda domi.
Nseseɔ l'inda sungia
13 Ne na éma áti a ngodea l'aɔ, mpa nndaga nekóndi andekea l'aɔ a baloa nde, iisi. 14 Nɛɛkɛtɛli bende aanga bɛɔnana mande mbènɔ-mbènɔ nde ani na abá bɛtɔmiaga áma imoti.
15 Bɔkɔlɔ abɛ na owɛ.
Badhasu baosesei. Ooseseɛ badhasu nde ba o kela nto na ina aɛ.