Baloa l'inda ibale nda
Yɔani
Nseseɔ
1
Eme, Nkpɛga nde màa Kanisà yɛu neandeki baloa nde ang'a Emáa mmbe Mokonga ansɔmbɔli, na ban'aɛ nde neekóndi domi. Na nndaga masa eme nganga yɛu neekóndi, mpa go na bɔbhu bande baúbha domi ndɔ. 2 Benokóndi nga, domi nde aiki asub'asu, n'iyu abá mande na besu a mɛyɔ.3 Ang'a Ebha Mokonga na Yesu Kilisitɔ, Muna-Ebha, asopɛ boangɔ, nga belendɛ a domi na a ekóndi.
Domi na ekóndi
4 Ne na bujɛmɛ mati a ɔna la sinde adha ban'aɔ batamba asub'a domi ndɔ, sinde Ebha asososii nee. 5 Mbènɔ nde mpa, Emá nɛɔmɛmi bende: Bekóndanɛi nkunguan'asu. Nndaga neoandekei nde maanɔ nda mbènɔ-mbènɔ, a gɔɛ nde inde ai be nee toa l'a kɛngɛtisa†. 6 Ekóndi, a nde lenda la sinde maanɔ nda Mokonga asòsii nee. Na maanɔ nde ai bɔɔkí toa l'a kɛngɛtisa a nde bende: «Bolendɛ asub'a ekóndi.»
7 Nga, bato a mbéa batì baóbeli asub'a lɛɛngɔ. Bakɔ́mi lebea la bende, Yesu Kilisitɔ ai abhii a ngobho a koto. Ang'a indɔ yɛu, ibɔ ba nde bato a mbéa na banjiu nde ba Kilisitɔ. 8 Bokèngemanɛi nga bende, ɛkɔli nd'asu abhia-i akua bosa. Atɔlɛli gɔɛ bɔdɔ̀ɛ nde elèɔ nd'anu bhuu.
9 Kela nto nde nnd'aiki asub'a egolisi nda Kilisitɔ, Mokonga nndaga asub'aɛ. Mmbe aiki asub'a egolisi, a na Ebha na Naɛ go. 10 N'aye nto n'abhii nɔngɔ anu, n'abhia na egolisi atɔɔ, bompikila-i na bolebea-i bende angiɛ na mɔtɛ anu 11 nga, mmbe ampikila kesi balebeani n'iyɛ a ɛkɔli nd'aɛ ajede.
Nseseɔ l'inda sungia
12 Ne na yɔnga atì a ngodea l'anu, mpa nndaga nekóndi andekea l'anu a baloa. Mpa, nɛɛkɛtɛli bende nebhia nɔngɔ anu na ambola la na benu áma imoti nga bebɛ na bujɛmɛ mati.
13 Bana-alɔɔb, bande Mokonga ansɔmbɔli am'abɔ, baosesei.