Yesu a laɓzata madarlaŋw anta ege reŋsəleɗ aha gbak
10
A dəwze anta,
Bay Madakal Yesu,
a may madarlaŋw ege vedəye reŋsəleɗ aha gbak.
A laɓzata gbak gbak a tama anta ŋ uzam ege tewtew leŋ ŋ kəva ege tewtew maa mbe a ha anta a nanda ŋma yam.
2 A təwse ca,
a zlepetene,
a ŋgaya:
«Səkan kála dakala ŋ la,
cemey,
hejəye parham ŋ pet aza.
Hune jene mbahw ŋ heje la anta malaɓaha hejəye ma la zlan ege zeney,
ŋ pet səkan anta.
3 Ana ebe ŋghe,
hune nda!
Sa laɓzahune ana uzəye ŋtəməye ŋ taba menjernjer ege.
4 Hune ɗaw ŋ ŋta kaw səlay ara asa ra səkwaw,
kaw bakatar ara səkwaw,
kaw ŋte ara səkwaw.
Mada hune kanda ata taf cemey,
hune ɗaw ŋ deŋ ŋ zlepzetene ŋ hejəye səkwaw.
5 «Mada hune kadam a wata ɗala kaw vekey ca,
hune zlap aza kwagwa:
“Zəhay manja ata ge ŋghe.”
6 Mada ɗala a kaɗaw ŋ lem zəhay a wata anta ca,
zəhay ŋkune a nanja ata heje anta,
mada ɗala a kaɗaw zəhay anta səkwaw ca,
zəhay anta a nezenha aza ata hune.
7 Mada heje ujek anta kálamzahune aza a wata anta ca,
hune nja ka a təwse,
hune zam səkan,
hune sa səkan maa əy kavalahune,
mavəday ɗala mala zlan ca,
laŋtar gef anta ca,
aka.
Hune ɗaw ŋ nda ata ujek,
ata ujek səkwaw.
8 «Mada hune nda ŋ uzam kaw vekey,
mada hejəye ma a təwse ege əy kálamzahune aza ca,
hune zam səkan maa əy kanavalahune.
9 Hune rehzata hejəye ma kadawar ege a təwse,
hune zlepetene ŋ hejəye tewtew cemey:
“Bay mala Gazlavay ata hejəye kándaha aza hwas ara hune!”
10 Cemey,
mada hune nda ŋ uzam kaw vekey maa hejəye əy kalamzahune səkwaw ca,
hune nda ŋ hubakw ma a təwse,
hune zlepetene ca:
11 “Kaw berdeberde mala uzam ŋkune ma ata ŋgas ŋcene ege ca,
nene ŋtawahune aka ndar ŋ ghwalza ca,
hune kála səkan ma kadak səkwaw!
Cemey,
hune san ka kadak kadak,
bay mala Gazlavay ata hejəye kándaha aza hwas ara hune.”»
12 Aya,
Yesu a zlap zeney,
a ŋgaya:
«Njenjəwen,
a pes laja guma cemey,
guma mala uzam anta a nala pa ŋ dadawar aha guma mala uzam Sawdawma.»
Hejəye ma ŋ uzam ege ma kaɗaw ŋ lamza Gazlavay səkwaw
13 Aya,
Yesu a ŋgaya:
«Hune hejəye ma ŋ uzam Kawrajəyŋ ege,
dadawar a nendewzahune!
Hune hejəye ma ŋ uzam Baytəysayda ege,
dadawar a nendewzahune!
Mada keɗe zaɓəla ege maa Gazlavay a lata ŋ taba ŋkune ŋghe ege,
əy la ŋ uzam Təyrus ey ŋ uzam Səydawn ca,
hejəye ma a təwse ege,
əy nabawza lanja tata ege aza zlezle,
əy naca rəgwac bakatar serek ege ata kusam tata,
əy neteteŋgel ŋ wenjek ŋ ghwalza ca,
əy kája mbahw aza a tama Gazlavay,
əy kábawza unaf tata ege aza.
14 Mavəday anta,
a pes laja guma ca,
Gazlavay a naŋgwavahune day aha ata uzam Təyrus ey uzam Səydawn.
15 Ca,
hune hejəye ma ŋ uzam Kafarnahum ege,
hune cakza ca,
Gazlavay a nagalzahune mgba ata uzlaf vaw?
Kaw askwaw!
Hwa nanda ata lanja hejəye mamacamac ege.»
16 A zlepetene ŋ madarlaŋw anta ege zeney,
a ŋgaya:
«Kaw vayay ma tehzahune zlam ata zlap ŋkune ca,
a teh ca,
zlap naka yam.
Kaw vayay ma lamza zlap ŋkune səkwaw ca,
a lamza səkwaw ca,
zlap naka yam.
Kaw vayay ma lamza zlap naka səkwaw ca,
a lamza səkwaw ca,
zlap a ɗala ma leɓekey.»
Madarlaŋw Yesu ege ma reŋsəleɗ aha gbak wese, əy zenha aka ata laghwal zlap a Gazlavay
17 Aya,
maa madarlaŋw Yesu ege reŋsəleɗ aha gbak ege wese əy zenha ca,
əy kasasam dakala,
əy zlepene ŋ Yesu,
əy ŋgaya:
«Bay Madakal,
maa nene kazlap a zlam ŋkwa ca,
kaw zəwet malula ege yam,
əy ketehzeney zlam.»
18 A təwse ca,
a zenetene,
a ŋgaya:
«Sa kégəre Sayɗanuª,
a ndavha aka mgba ata uzlaf ana van ma kazam.
19 Hune teh zlam kadak kadak ata zlap ŋgha:
Sa kavalahune ɓardakw ŋ dak ŋgas ata zezekw ege ey reje ege leŋ ata ɓardakw Sayɗanu tewtew,
ma kaɗaw ŋ gərehune ata nje səkwaw.
Kaw səkan wende a kanalahune askwaw.
20 Hune ɗaw ŋ sasam mavəday maa zəwet malula ege əy ketehzahune zlam səkwaw,
cemey,
hune sasam mavəday zlam ŋkune ege əy kéŋtereye mgba ata uzlaf.»
Yesu a kasasam
21 A təwse ca,
Zəwet Gazlavay,
a velene sasam dakala ŋ Yesu,
a həmanza Gazlavay,
a ŋgaya:
«Vana,
Gazlavay,
la ma mgba ata uzlaf ey la ma ata hayak tewtew mala ŋkwa.
Sa kalahwaw wasay mavəday hwa kéghwelzetene taŋtaŋ ŋkwa ŋ hejəye ma kasan səkan ege səkwaw ana uzəye veɗekw ege.
Cemey,
ŋ hejəye kəleŋ ege ey hejəye ma san səkan ege ca,
hwa káɓahza səkan anta ka ata tata.
Ayaw,
Gazlavay,
hwa káɗawza ŋ law,
ana ebe ŋghe anta.»
22 Aya,
Yesu a zlepetene ŋ hejəye ma a təwse ege tewtew,
a ŋgaya:
«Vana Gazlavay kévelekey səkan ege aza tewtew asa ra naka.
Kaw ɗala teŋguleŋ ma kesenekey,
sa,
sa Mba Gazlavay ca,
askwaw,
səy vana teŋguleŋ anta.
A zeney,
kaw ɗala ma kasan Gazlavay,
ara vana ca,
askwaw yam,
səy sa,
sa Mba Gazlavay anta teŋguleŋ naka leŋ hejəye maa sa kaɗaw ŋ ghwelzetene ŋ san yam.»
23 A dəwze anta,
a bawha tama kəɗe aha madarlaŋw anta ege,
a zlepetene ŋ tata gagaha,
a ŋgaya:
«Zəhay Gazlavay mbəy ata hune,
hune ma gəre səkan ma Gazlavay a la ata nje ŋkune ŋghe!
24 Ayaw,
sa kazlapahune,
uzəye ma zlap ma a Gazlavay ege ma zlezle ey bay hayak ma zlezle ege vəram,
əy káɗaw ŋ gəre səkan maa hune gəre a nje ŋkune ŋghe,
cemey,
əy kégəre askwaw!
Əy káɗaw ŋ zləme ma maa hune kezləme ŋghe,
cemey,
əy kézləme askwaw!»
Laslaŋgal ma ata ɗala Samarəya
25 Aya,
a təwse ca,
maghwal ma maŋkanaŋkan wende aka,
a gwarzam,
a ɗaw ŋ slanza Yesu,
a ɗawza,
a ŋgaya:
«Madakal,
sa nalaw,
ŋ lem səfan ma kaŋtakw səkwaw ca,
vemey?»
26 Yesu a zenene,
a ŋgaya:
«Ma kéŋtereye ŋ laŋkan ma ŋtakwaw ca,
vemey?
Hwa jəŋge ŋma ca,
vemey?»
27 A təwse ca,
heje wese a zenene,
a ŋgaya:
«Laŋkan ma anta a zlap ca,
ɗaw Gazlavay Madakal ŋkwa a unaf ŋkwa tewtew,
a zəwet ŋkwa tewtew,
a ɓarɓar ŋkwa tewtew,
leŋ a ŋkwaɓ ŋkwa tewtew.
A zeney,
səy hwa ɗaw mesleje ŋkwa ana ha ŋkwa.»
28 Aya,
Yesu a zlepene,
a ŋgaya:
«Hwa kézenha zlap a heɗe a heɗe.
Nda,
la ana mbe,
hwa nelem səfan ma kaŋtakw səkwaw.»
29 Cemey,
heje anta,
a ɗaw ŋ ŋta hawa aza ata nje anta.
A təwse,
a ɗawza Yesu zeney,
a ŋgaya:
«Ca,
mesleje naka anta ca,
vayay?»
30 Aya,
Yesu a zlepene zeney,
a ŋgaya:
«Heje Yahudu wende aka,
a gwarzamha aka ŋ Urusaləyma,
a nda ŋ Yerəykaw.
Maa a kanda ata taf ca,
ŋhel ege əy takaw,
əy mbalaw,
əy cekwene rəgwac ma ata kusam aza,
gazl gazl əy gazl ka,
əy yakza aka,
mbəy slaɓ ŋ mac,
tel əy nda tata.
31 A dəwze anta,
mala kwakwas wende aka,
a nda ta ŋ taf anta yam.
Cemey,
maa a gəre heje wese ca,
pəla a baw anta ta ata zlaŋgal,
a nda anta.
32 A dəwze anta zeney,
ɗala ma ŋ taba Leweŋkaw ege a nda ta ŋ taf wese zeney,
a ndewzene,
mbe yam,
pəla a baw ata zlaŋgal,
a nda anta war.
33 Cemey,
mbəlam wende aka,
ara ɗala Samarəya,
a nda ta ŋ taf wese ŋ ŋcəwerha,
a hwasha ara mbe,
a gəre heje anta ca,
a lene hahar.
34 Aya,
a zenha ara mbe,
a benene mbəlah anta ege aza a melª leŋ a mavaw,
paɗ a peɗene ka a maslaga.
A dəwze anta,
a tew ata berjeŋ anta,
a jeɓza ŋ ujek mbəlakw ege,
a tal ŋ rehza.
35 A mapat anta maa a kananda anta ata leŋcəwer anta ca,
a velene səlay ŋ madakal ujek mbəlakw ege wese,
a zlepene,
a ŋgaya:
“Tal ŋ rehza heje ŋghe,
mada hwa kágay səlay day aha maa sa valahwaw ŋgha ca,
sa nezenzahwaw aka maa sa kenezenaha ete ŋghe,”»
36 Aya,
Yesu a zlap zeney,
a ɗawza maghwal ma maŋkanaŋkan wese,
a ŋgaya:
«Ara hwa ca,
ŋ taba hejəye ma mahkaɗ ŋghe ege wese ca,
mesleje a ɗala maa ŋhel ege əy gazl ka ata taf wese ca,
vayay?»
37 Maghwal ma maŋkanaŋkan wese,
a zenene,
a ŋgaya:
«Mesleje anta ca,
ara ɗala ma san hahar ŋ lene taŋtaŋ ŋ rehza wese.»
Aya,
a təwse,
Yesu a zlepene a ŋgaya:
«Nda,
hwa la ana mbe yam.»
Yesu mbəy a wata ata Marta ey Marəyama
38 Ata Yesu ey madarlaŋw anta ege əy kanda ata taf.
Aya,
əy dam ŋ uzam wende aka,
wala wende aka,
zlam anta Marta,
a lamza Yesu a wata anta.
39 Marta anta ca,
zlaŋgan haldəma aka,
zlam anta Marəyama.
A təwse ca,
Marəyama wese,
a ndaha,
a nja ka a həzlar Bay Madakal,
a keteh zlam ata ma maa a kazlap.
40 Marta a kala zlan ege vedəye vedəye ma ata da səkan ege ma ata zam.
Aya,
a ndaha,
a zlepene ŋ Yesu,
a ŋgaya:
«Bay Madakal,
zlana ŋgha a geɓzekey zlan aka tewtew ŋ sa teŋguleŋ naka ana ebe ŋghe ca,
a kandəramzahwaw vaw?
Zlepene mandaha ŋ cekzekey!»