Luk 9

Yesu a laɓzata malaɓ anta ege wam aha gbak

Yesu a javata malaɓ anta ege wam aha gbak tata. A veletene ɓarɓar ey ɓardakw ŋ gamata zəwet malula ege aza tewtew ma ŋ hejəye leŋ ŋ rehzata hejəye aza ŋ dawar tata ege. 2 A dəwze anta, a laɓzata ŋ ghwelzetene bay mala Gazlavay ata hejəye leŋ ŋ rehzata hejəye ma kadawar ege. 3 Aya, a zlepetene, a ŋgaya: «Hune nda, hune ɗaw ŋ ŋta səkan kaw vemey ara asa ra ŋkune ege ata taf səkwaw: kaw zlambay səkwaw, kaw bakatar səkwaw, kaw səkan ma ata zam səkwaw, kaw səlay səkwaw. A zeney, kaw vayay a ɗaw ŋ ŋta rəgwac ara gbak səkwaw! 4 Kaw a katay, mada ɗala kálamzahune a wata anta cemey, hune nja ka a təwse ha ata vah maa hune kananda ŋkune. 5 Kaw a katay, ata la maa hejəye əy kalamzahune səkwaw ca, hune ŋtaw berdeberde ma ata ŋgas ŋkune ege aza, hune geɓzetene uzam tata aka. Ana ebe ŋghe, a neghwelzetene ca, tata hejəye gay ege.»

6 Aya, malaɓ Yesu ege wese, tel əy nda tata. Əy nda ŋ uzam ege parpar parpar. Kaw a katay, əy kaghwal Ma Mewe ma Taŋtaŋ a Gazlavay ŋ hejəye leŋ əy kerehzata hejəye aza ŋ dawar tata ege.

Ŋkwaɓ kéŋgene aza ŋ Həyrudus Antəypas ata Yesu

7 Həyrudus, bay ma mbal hayak Galəyləy a zləme hejəye əy kazlap ata səkan ege tewtew maa ata Yesu ey madarlaŋw anta ege, əy kalata. Ma anta kálalakza aza, mavəday hejəye vedəye əy kazlap ata Yesu, əy ŋgaya: «Heje anta ca, ara Yuhana ma gwarzamha aka ŋ jeɓ.» 8 Vedəye, əy ŋgaya: «Ara Eləya ma ndaha.» Vedəye zeney yam, əy ŋgaya «Ara ɗala teŋguleŋ ŋ taba uzəye ma zlap ma a Gazlavay ma zlezle ege ma gwarzamha aka ŋ jeɓ,» əy ya. 9 Cemey, Həyrudus a zlap ŋ ha anta, a ŋgaya «Sa ma zlap ŋ rezlene ha Yuhana mala baptəysma anta aza. Heje maa sa kezləme, əy kazlap ma ŋghe ege tewtew a heɗe ŋghe ca, ara vayay?» Aya, a mpam ŋ gəre Yesu.

Yesu a zemetene səkan ŋ hejəye day aha bəlakw jaɓan

10 Maa malaɓ Yesu ege, əy zenha aza ara Yesu ca, əy slepene səkan ege tewtew maa əy lata ŋ uzam ege wese. Aya, a ŋtata madarlaŋw anta ege wese, əy nda tata gagaha, kəɗe ŋ uzam maa əy kayaɓa Baytəysayda. 11 Cemey, maa hejəye vəram əy zləme Yesu mbəy ɗak a təwse wese ca, əy səbaraw. A təwse ca, Yesu a lamzata a sasam. A ghwelzetene zlap a bay mala Gazlavay ata hejəye leŋ a rehzata hejəye ma ɗawza ege ŋ dawar tata ege.

12 Cemey, maa pes slaɓ ŋ ndav ca, malaɓ Yesu ma wam aha gbak ege wese, əy zenha mbermber ara Yesu, əy zlepene, əy ŋgaya: «Zlepetene ŋ hejəye əy manda ŋ uzam ege ey ujek ma a mazlam ege ŋ lem səkan ta zam leŋ la ma ata wan, mavəday ete ŋghe ca, heje a damaw.» 13 Cemey, a zlepetene, a ŋgaya: «Hune a ha ŋkune, hune veletene səkan ŋ zam.» Əy zenene, əy ŋgaya: «Səkan ta zam ara nene peŋ jaɓan leŋ ŋkəlef gbak. Ketegəre, hwa kaɗaw nene nda ŋ səkamha səkan ta zam anta ŋ hejəye ŋghe anta ege tewtew ka vaw?» 14 Ŋ taba hejəye anta ege ca, mawal ege əy la aza bəlakw jaɓan. A zlepetene ŋ madarlaŋw anta ege, a ŋgaya: «Hune njazata ka njakw njakw, rajaɓan rajaɓan ege.»

15 A təwse ca, əy lemzene ma anta. Əy njazata hejəye anta ege ka ana maa a zlepene anta. 16 Aya, Yesu ŋta a ŋta peŋ ma jaɓan ege leŋ ŋkəlef ma gbak ege wese, a sar la kəɗe mgba ata uzlaf. A lene wasay ŋ Gazlavay, ata səkan ta zam ege wese. A dəwze anta, a ŋgata ka, a veletene ŋ madarlaŋw anta ege. Aya, əy ɓezetene ŋ hejəye tewtew. 17 A təwse ca, kaw vayay a zam səkan həraɗ ana maa a kaɗawaw. Əy cam ma menha, ujam ghef ghef, wam aha gbak.

Pəyer a ghwalza Yesu ca, ara Kərəystu

18 A pes wende aka, Yesu a karak Gazlavay, mbəy teŋguleŋ anta. Madarlaŋw anta ege əy a həzlar. Aya, a ɗawzata, a ŋgaya: «Hejəye əy kazlap ata sa vaŋgay? Əy ŋgaya sa ca, sa vayay?» 19 Madarlaŋw anta ege, əy zenene, əy ŋgaya: «Hejəye vedəye əy zlap ca, hwa Yuhana mala baptəysma. Hejəye vedəye zeney, əy ŋgaya hwa Eləya, mba ma zlap ma a Gazlavay ma zlezle. Hejəye vedəye zeney yam, əy ŋgaya, hwa mba ma zlap ma a Gazlavay ma zlezle ma gwarzamha aka ŋ jeɓ.»

20 Aya, Yesu a ɗawzata zeney, a ŋgaya: «Ca, hune eze yam ca, hune zlap sa ca, sa vayay?» A təwse ca, Pəyer a ŋta zlap, a zlepene, a ŋgaya: «Hwa Kərəystu maa Gazlavay a laɓaza ŋ rehzata hejəye.» 21 Cemey, Yesu a ŋgazata ka, kaw əy ɗaw ŋ zlap ma anta kaw ŋ vayay səkwaw.

22 A zeney, a ŋgaya: «Səy sa, sa Mba Ɗala masa gef dakala. Madakal dakal ma ata ha Yahudu ege, madakal dakal mala kwakwas ege leŋ maghwal ma maŋkanaŋkan ege, əy keneɗewekey səkwaw, əy nejekey aza. Cemey, ata wan mamahkaɗ anta ca, sa nagwarzamha aza ata lamac.»

Zlap ata taf ma ata səbar Yesu

23 Aya, Yesu a zlepetene ŋ hejəye tewtew, a ŋgaya: «Mada ɗala a kaɗaw ŋ səberekey ca, a ɗaw ŋ deŋza ata ha anta səkwaw, mesew gef ma kanadaha ata ha anta, maŋta mpe gafaŋgal anta, mesəberekey ata pes ata pes a unaf teŋguleŋ. 24 Hune san ka, kaw vayay, ma kaɗaw ŋ rehza ha anta ca, a nakuɗapza aza. Cemey, ma kuɗapza ha anta aza mavəday sa ca, a nerehza aza. 25 Mada ɗala a lem səkan ma a manhayak ŋghe tewtew ana maa unaf anta a kaɗawaw, cemey, a kuɗapza ha anta aza, akwaw ca, a gayza ha anta aza ca, səkan maa a lem tewtew ŋghe anta a necekzene vaw? 26 Kaw vayay, ma la hawa ata sa leŋ ata zlap naka ege ca, sa, sa Mba Ɗala, sa nala hawa a heɗe ata vah maa sa kenezenha ŋ ɓardakw naka, ŋ ɓardakw a Gazlavay leŋ ŋ ɓardakw mala malaɓ Gazlavay ma keweɗ ege yam. 27 Ayaw, sa kazlapahune: Njenjəwen, hejəye vedəye ŋ taba hejəye ma ete ŋghe ege ca, əy kanamac askwaw, səy əy megəre bay mala Gazlavay ata hejəye aza kwagwa.»

Labaw kusam Yesu

28 Kála anta wan jamahkaɗ a dəwze maa Yesu a zlap ma ŋghe ege ca, a ŋta ata Pəyer, Yuhana leŋ Yakuba, əy tev ŋ barla ŋ rak Gazlavay. 29 Maa a karak Gazlavay wese ca, kəɗe ca, nje anta baw a baw anta, rəgwac ma ata kusam anta a baw anta pepeɗek tezlezle, a kayayaŋ. 30 A təwse a təwse ca, hejəye gbak aka, əy kazlap a mbe. Ara ata Musa ey Eləya. 31 Əy ghwalha kusam tata aka ta ŋ ɓardakw Gazlavay ma keweɗ. Əy kazlap a Yesu ata laŋtakw zlan anta ŋ lamac anta ŋ Urusaləyma.

32 Ca, ata Pəyer ey malaɓ ma gbak ege wese ca, əy káwan tata kəlaŋkəlaŋ. Cemey, maa əy fəɗaha aza ca, əy gəre ɓardakw ma keweɗ a Yesu leŋ hejəye ma gbak ma ara mbe ege wese. 33 Aya, maa ata Musa ey Eləya wese, əy kanayakza aka ca, Pəyer a zlepene, a ŋgaya: «Bay ŋcene, kadak ca, heje nja ka ete ŋghe. Nene naba guɗakw ege mahkaɗ: teŋguleŋ mala ŋkwa, teŋguleŋ mala Musa, teŋguleŋ mala Eləya.» Cemey, a kasan səkan ma a kazlap səkwaw.

34 Maa a kazlap ca, kəɗe ca, mahwabakw a ndaha, jaɓ a jaɓata. A təwse ca, maa mahwabakw a jaɓata aza wese ca, əy kálalak tata. 35 Əy zləme ula a jaha ŋ mahwabakw anta, a ŋgaya: «Ebe ŋghe ca, ara mba naka maa sa mayaw, hune tehzene zlam!» 36 A dəwze maa ula a jaha wese ca, kəɗe, madarlaŋw anta ege wese, əy sar la ca, Yesu mbəy teŋguleŋ anta. A təwse ca, nja əy nja ka tete, kaw əy kághwalza səkan maa əy gəre anta ŋ kaw vayay askwaw.

Yesu a gam zəwet malula ma ŋ ha mbaw

37 A mapat anta, ata Yesu ey malaɓ anta ma mahkaɗ ege wese əy tadakwha aka ŋ barla. Hejəye vəram əy ndaha ŋ ŋgelene ma. 38 A təwse ca, heje wende aka ŋ taba hejəye ma ɓecha ege ara mbe wese, a ja ula, a ŋgaya: «Madakal, sa jahwaw mbahw, sarza mba naka ŋgha! Ara malay, san hahar a heɗe. 39 Zəwet malula anta kámbal ca, a təwse a təwse, a ja ula, a ɓərazlza, a gwegwecza a mazlazlay, a lene hubaf ŋ pakam anta. A sene gef dakala, a negeɓza ca, səpek a dəwze maa káŋgwavza. 40 Ca, sa kárak madarlaŋw ŋkwa ege ŋ gamza, əy kula səkwaw.»

41 Aya, a zenene, a ŋgaya: «Hey! Hune hejəye dadawar ege ma kaɗaw ŋ lemzekey səkwaw ege ŋghe, sa nanja ka ara hune zeney ca, walaŋ həda vaŋgay? Sa nesewahune zeney ca, walaŋ vanay?» Aya, Yesu a zlepene ŋ cen mba wese, a ŋgaya: «Daza mba ŋkwa anta ete ŋghe!»

42 Maa mba wese a kandaha ara mbe ca, zəwet malula wese a nahza ata hayak, a ɓərazlza, a gwegwecza a mazlazlay. Ca, Yesu a bebecza zəwet wese, ŋ damha aza ŋ mba anta, a rehza aza. Aya, a zlepene ŋ cen mba wese, a ŋgaya: «Ŋghe mba ŋkwa.» 43 Hejəye tewtew əy ŋga ŋkwaɓ, əy ŋgaya: «Njenjəwen ca, Gazlavay ca, ɓardakw anta aka,» əy ya.

Yesu a ghwalza lamac ey lagwarzamha anta aka ŋ jeɓ zeney

Aya, maa kaw vayay a kaŋga ŋkwaɓ ata səkan maa Yesu a la tewtew ŋghe wese ca, a zlepetene ŋ madarlaŋw anta ege, a ŋgaya: 44 «Hune teh zlam kadak kadak ata ma maa sa kanazlapahune na ŋgha, hune ca ka ŋ ha ŋkune ege: Əy nembelekey, sa, sa Mba Ɗala, əy nevelzekey asa ra hejəye.» 45 Cemey, madarlaŋw anta ege ca, əy kasan səkan maa ma anta a ɗaw ŋ zlap səkwaw, mavəday ma anta kéghweleye a bəza tewtew askwaw, əy kula ŋ zləme səkwaw. Əy kalalak ŋ ɗawza Yesu ata ma anta.

Ma pa ma dakal ŋ taba madarlaŋw ege ca, vayay?

46 Madarlaŋw Yesu ege əy ja səbakw ŋ taba tata, əy ɗaw ŋ san ɗala ma dakal ŋ taba tata ca, vayay? 47 Cemey, Yesu a kasan ledeŋ ŋkwaɓ tata. Aya, a ŋta mbaw, a deŋza aka a tama anta, 48 a zlepetene a ŋgaya: «Kaw vayay ma lamza mba ŋgha aza, mavəday maa a keɗewekey ca, a lam ca, sa anta. Kaw vayay ma lemzekey yam, a lam ca, Gazlavay ma leɓekey. Ayaw, ɗala ma pa ma pəzekw ŋ taba ŋkune tewtew ca, mbe ara ɗala ma pa ma dakal.»

Ɗala ma kaɗa gham a hune askwaw ca, ara heje ŋkune

49 Aya, Yuhana a ŋta zlap, a ŋgaya «Bay ŋcene, nene kégəre heje wende aka, a kagamata zəwet malula ege a zlam ŋkwa. Cemey, nene káɗaw ŋ tak ka, mavəday mbe ca, mbəy ŋ taba lajav ŋtakwaw askwaw.» 50 Cemey, Yesu a zenene, a ŋgaya: «Hune ɗaw ŋ tak ka səkwaw, mavəday ɗala ma kaɗa gham a hune askwaw ca, ara ɗala ŋkune.»

Hejəye uzam Samarəya ege əy kalamza Yesu səkwaw

51 Ata vah maa Yesu slaɓ ŋ yakza manhayak aka ŋ nda anta mgba ara Gazlavay ca, a mbal unaf, ŋ nda ŋ Urusaləyma. 52 A təwse ca, a laɓzata uzəye malaɓ anta ege a tama a tama. Aya, tel əy nda ŋ uzam ma ŋ hayak Samarəya ŋ slene la ma ata wan. 53 Cemey, hejəye ma a təwse ege ca, əy kaɗaw ŋ lamza səkwaw, mavəday a nda kəɗe ŋ Urusaləyma. 54 Maa ata Yuhana ey Yakuba, əy gəre maa hejəye ŋghe anta ege əy kaɗaw ŋ lamza səkwaw ca, əy ɗawza, əy ŋgaya: «Bay Madakal, hwa kaɗaw nene ɗawha kwahwaw ma mgba ata uzlaf matadakwha ata tata, maŋkəɗawata aza vaw?» 55 Aya, a bawha tama kəɗe aha tata, a ghemata. [A ŋgaya: «Ma ŋcakwzahune ŋ zlap ana ebe ŋghe ca, ara zəwet vekey? Mba Ɗala a ndaha ca, ŋ kuɗapzata hejəye aza səkwaw, cemey, a ndaha ca, ŋ rehzata».] 56 Aya, tel əy nah ma ŋ uzam matakan.

Hejəye ma kaɗaw ŋ səbar Yesu ege

57 Maa əy kanda ata taf ca, heje wende aka, a ndaha a zlepene ŋ Yesu, a ŋgaya: «Sa nasəbarahwaw kaw a katay ata la maa hwa kananda.» 58 A təwse ca, a zenene, a ŋgaya: «A mbəyga ege ca, uley tata ma ata wan aka, vəgem ege yam ujek tata aka. Cemey, sa, sa Mba Ɗala ca, kaw la naka cekuɗe ende ŋghe ma ata zazak askwaw.»

59 A zlepene ŋ ɗala wende, a ŋgaya: «Səberekey!» A təwse ca, heje anta a zenene, a ŋgaya «Bay Madakal, pelzekey taf, sa nda ŋ mpas aza vana aza kwagwa.» 60 Aya, a zenene, a ŋgaya: «Yakzata hejəye mamacamac ege aka, əy mampas hejəye tata ege mamacamac. Cemey, hwa ca, nda ŋ ghwalza bay mala Gazlavay ata hejəye.»

61 A təwse ca, heje wende aka zeney, a zlepene, a ŋgaya: «Sa ca, sa nasəbarahwaw Bay Madakal, cemey, pelzekey taf, sa nda ŋ zlepezetene aza ŋ hejəye ma a wata naka ege kwagwa.» 62 Yesu a zlepene, a ŋgaya: «Kaw vayay ma kaɗas a zləye, a sar la a dəwze ca, heje anta mbəy kadak ŋ lene zlan ŋ Gazlavay, səkwaw.»