Roh Allah Lab̄o Roh Musu Al Masih
4:1-6
4
Cina ro angi ra meciku! Aina imbimu d̄i samenana dou ma mangaku nantau Roh Allah, pala uji wa'upu siad̄oho d̄i b̄adekaimu sab̄ua roh ma wara d̄i siad̄oho ede ra d̄i Allah Ta'ala atao laina. B̄a one mboto nabi palasu nawa'ura lampa rero tab̄e-b̄e. 2 Ndakeku carana d̄i b̄adekai b̄a nggomid̄oho sab̄ua ede Roh Allah atao laina: Dou ma mangaku b̄a one Isa Al Masih maina d̄i dunia kai manusia, dou ede nantau Roh ma ramai ra d̄i Allah Ta'ala. 3 Pala dou ma wati mangaku mab̄oha lampa rawi ede, dou ede wati ntauna Roh Allah. Dou ede nantau roh ra d̄i Musu Al Masih. Nggomid̄oho wa'ura ringamu b̄a one roh ede d̄imamai, ro ake sia wa'ura wara d̄i ade dunia ake.4 Pala Ana-anaku, nggomid̄oho eded̄u ntau Allah Ta'ala. Nggomid̄oho wa'ura kakoamu nabi-nabi palasu, b̄a one Roh ma wara d̄i nggomid̄oho nancewi ntau kuasa ntewikaisi lab̄o ma wara d̄i dou-dou ntau dunia ake. 5 Nabi-nabi palasu ede nanuntu ro nggahiku mab̄oha lampa rawi dunia, ro dunia naringa ro kade'eku nggahi ro eli siad̄oho, b̄ara siad̄oho ntau dunia. 6 Pala ndai eded̄u ana-ana Allah; ro dou ma pata Allah Ta'ala, naringa ro kade'eku nggahi ro eli ndaita. Ro dou ma laina ntau Allah Ta'ala, wati ringa ro kade'ena nggahi ro eli ndaita. Ndedeku carana d̄i b̄adekai b̄a ndai cua laina Roh ma mbei ngoa ro tei ma poda lab̄o roh ma kasantuda.
Allah Ta'ala Ede Nameci Ro Ca'u
4:7-21
7 Cina ro angi meci b̄a nahu! Maira ndai tameci ro ca'uku sab̄ua lab̄o ma kalaina, b̄ara meci ro ca'u ramaina ra d̄i Allah Ta'ala. Dou ma meci ro ca'u eded̄u Ana Allah ro sia napataku Allah Ta'ala. 8 Dou ma wati meci ro ca'u, wati patana Allah Ta'ala; b̄a one Allah Ta'ala eded̄u nameci ro ca'u. 9 Allah Ta'ala katadana b̄a one Sia nameci ro ca'uku ndaita kai nggaduna Ana-Na ma kese weki d̄i dunia ake loakud̄u ndai raka mori kai ncai Ana-Na ede. 10 Akeku meci ro ca'u ede: Laina ndai ma wa'ura meci ro ca'u Allah Ta'ala, pala Allah Ta'ala ma meci ro ca'u ndaita ro nggaduna Ana-Na loakud̄u kai ncai Sia ndai d̄ikangampu wea dosa-dosa ndaita.
11 Cina ro angi meci b̄a nahu, nggara Allah Ta'ala ndede ipi meci ro ca'una ndai, ndai rau pab̄uaku meci ro ca'u sab̄ua lab̄o ma kalaina. 12 Wati kone sab̄ua dou rau ma parana eda Allah Ta'ala, pala nggara ndai cua-cua meci ro ca'usi, ndad̄i Allah Ta'ala d̄imandad̄i sab̄ua lab̄o ndai ro meci ro ca'u-Na nandad̄i mpuruna d̄i ade weki ndai.
13 B̄a one Allah Ta'ala wa'ura mbeina d̄i ndai Roh-Na, ndad̄i ndai tab̄adeku b̄a one ndai wa'ura mori sab̄ua lab̄o Allah Ta'ala, ro Allah Ta'ala mori sab̄ua lab̄o ndai. 14 Ndai nami wa'ura edamu Ana Allah, ro nami ma ngoa ro kahabana b̄a one Sia ra nggadu b̄a Ama d̄imandad̄i Sangaji Makasalama dunia ake. 15 Cou-cou ma mangaku b̄a one Isa ede Ana Allah, ndad̄i Allah Ta'ala namori sab̄ua lab̄o dou ede, ro dou ede rau namori sab̄ua lab̄o Allah Ta'ala. 16 Ndai tab̄adeku ro ta'imbiku d̄i meci ro ca'u Allah Ta'ala d̄i ndaita.
Allah Ta'ala ede nameci ro ca'u. Dou ma morina rakuasakai b̄a meci ro ca'u, dou ede nasab̄uaku lab̄o Allah Ta'ala, ro Allah Ta'ala nasab̄uaku lab̄o sia. 17 Meci ro ca'u rakandad̄i mpuruna d̄i ade weki ndai, loakud̄u ndai ta disa d̄i Ainaina Pengadilan. Ndai d̄imadisa, b̄ara mori ndai d̄i dunia ake sama b̄une mori Al Masih. 18 Dou ma iu meci ro ca'u Allah Ta'ala, wati iuna dahu; b̄ara meci ro ca'u ma mpuruna nakamboraku samenana iu dahu. Ndad̄i tadara b̄a one dou wati iuna meci ro ca'u Allah Ta'ala kai mpuruna nggara dou ede nadahusi satando Ainaina Pengadilan. 19 Ndai tameci ro ca'uku, b̄ara Allah ta'ala wa'ura meci ro ca'u uluna ndaita. 20 Nggara dou nanggahisi, <<Nahu kameci ro ca'u Allah Ta'ala,>> pala sia wati meci ro ca'una cina ro angina ma sama imbi lab̄o sia, dou ede nacowaku. B̄a one dou nggara watisi meci ro ca'una cina ro angina ra edana, wati lu'u b̄a aka sia loana meci ro ca'u Allah Ta'ala ma wati loa d̄i'eda. 21 B̄ara ndedena, akeku parenta ra mbei b̄a Al Masih d̄i ndaita: Cou-cou ma meci ro ca'u Allah Ta'ala pab̄uaku meci ro ca'u rauna cina ro angina ma sama imbi lab̄o sia.