Ana-ana Allah Ta'ala
3:1-10
3
Tiopu Allah Ta'ala nawancuku meci ro ca'una ndaita, ndad̄ina ndai kandad̄ina ana-ana-Na. Ro ncihi romo ndai ake eded̄u ana-ana Allah. B̄ara ndedena dunia ma dab̄ae ake wati patana ndaita, b̄ara dunia wati patana Allah Ta'ala. 2 Cina ro angi ra meci ro ca'u b̄a nahu! Ndai wakatu ake eded̄u ana-ana Allah, pala ka'ada'an ndai peasi watipu tantuna. Pala ndai tab̄adeku b̄a one wakatu namana Al Masih, ndai d̄imandad̄i b̄une Sia, b̄ara ndai d̄ima'eda Sia d̄i ade ka'ada'a-Na ma sapodakaina. 3 Samenana dou ma wi'i weki d̄i Al Masih, jaga ro sandaka weki ndaina loakud̄u poda-poda rasona, raso ra d̄i dosa b̄une Al Masih rau maraso.4 Dou ma karawi dosa, nasapaku hukum Allah; b̄a one dosa eded̄u b̄ara sapana hukum Allah. 5 Nggomid̄oho mab̄adeku b̄a one Al Masih maina d̄imakambora dosa-dosa manusia, ro d̄i ade weki Sia wati wara dosa. 6 Samenana dou ma mori sab̄ua lab̄o Al Masih, wati karawi ncauna dosa. Dou ma karawi ncau dosa, wati paranana eda Al Masih atao patana Sia.
7 Ana-anaku, aina co'omu cou-cou rau makasantuda nggomid̄oho. Dou ma karawi au ra kane'ekai b̄a Allah Ta'ala eded̄u ana Allah b̄une Al Masih eded̄u Ana Allah. 8 Pala dou ma karawi ncau dosa eded̄u ana Iblis, b̄ara Iblis dosana ra'aipu saramba wa'una. Ru'u akeku Ana Allah maikaina, eded̄u d̄imakalelina ruku ro rawi Iblis.
9 Dou ma wa'ura ndad̄i Ana Allah, wati karawi ntuwuna dosa, b̄ara tabe'a ndai Allah Ta'ala wara d̄i sia. Ro b̄a one Allah Ta'ala ede Amana, ndad̄i sia wati laona karawi ncau dosa. 10 Akeku cua laina ana-ana Allah lab̄o ana-ana Iblis: cou-cou mawati karawi au ra kane'ekai b̄a Allah Ta'ala, atao wati meci ro ca'una cina ro angina ma sama imbi lab̄o sia, sia laina ana Allah.
Meci Ro Ca'u D̄i Sab̄ua Lab̄o D̄imakalaina
3:11-18
11 Ra aipu saramba wa'una haba ake wa'ura karongga d̄i nggomid̄oho: Ndai pab̄uaku meci ro ca'u sab̄ua lab̄o makalaina. 12 Ndai aina b̄une la Kain, ma ndad̄i ana Iblis ro hadena ari ndaina. B̄ab̄auku la Kain hadekaina arina? B̄ara sara'a ra karawi sia eded̄u ncara, pala au ra karawi b̄a arina eded̄u ncihi. 13 B̄ara ndedena, Cina ro angiku, aina mbora akamu nggara dou-dou dunia ake wati ca'una d̄i nggomid̄oho. 14 Ndai wa'ura b̄adeta b̄a one ndai wa'ura losa ra d̄i madekai, ro lao peso weki aka hid̄i morikai. Ndai tab̄adeku ede, b̄ara ndai mameci ro ca'u d̄i cina ro angita. Dou ma wati meci ro ca'u, aona mbuipu kuasakai b̄a made. 15 Dou ma wati ca'u d̄i cina ro angina eded̄u dou mahade dou, ro nggomid̄oho mab̄adeku b̄a one dou ma hade dou wati ntauna mori masapodakaina ro ma ede ro hid̄i. 16 Kai ncai akeku ndai tab̄adeku cara meci ro ca'ukai d̄i sasama manusia: Al Masih wa'ura d̄onggona mori-Na d̄i ru'u b̄a ndai. B̄ara ndedena, ndai rau pab̄uaku d̄onggo mori ndai d̄i ru'u b̄a cina ro angi ndaita! 17 Nggara sab̄ua dou ma ncihi mori ro wokona edana cina ro angina masusa ro ncoki mori, pala wati ngawana bantu cina ro angina ede, b̄uneku loana dou ede nggahi b̄a one sia nameci ro ca'uku Allah Ta'ala? 18 Ana-anaku! Ndai aina meci ro ca'u kai asa mpoa atao kai nggahi mpoa. Maira ndai ta meci ro ca'uku kai ade ma raso d̄i ade ruku ro rawi ndaita.
Disa D̄i Tando Allah Ta'ala
3:19-24
19 Ndedeku carana ndai b̄adekaita b̄a one ndai lu'u d̄i ade kalompo ana-ana Allah ma poda, ro ndai sana ade d̄i tando Allah Ta'ala. 20 Ndai ta b̄adeku, b̄a one nggara ndai kancarasi b̄a ade ndai, loa ro tingi Allah Ta'ala nancewi na'e ntewikaisi lab̄o loa ro tingi ade ndai, ro b̄a one Sia nab̄ade sara'aku. 21 Ndad̄i, Cina ro angi ra meci b̄a nahu, nggara ade ndai watisi kancarana ndai, ndai ta disaku satando Allah Ta'ala. 22 Ro au ra raho b̄a ndai d̄i Sia, ndai tarakaku b̄ara ndai to'a d̄i parenta-parenta-Na ro karawita au ma kasana wea ade-Na. 23 Ra parentakai b̄a Sia d̄i ndai eded̄u: Ndai pab̄uaku imbi d̄i Ana-Na, eded̄u Isa Al Masih, ro ndai pab̄uaku cua meci ro ca'u angi, b̄une ra wa'u parentakai b̄a Al Masih d̄i ndaita. 24 Samenana dou ma to'a d̄i parenta-parenta Allah Ta'ala, namori sab̄ua lab̄o Allah Ta'ala, ro Allah Ta'ala namori sab̄ua lab̄o siad̄oho. Ro ndai ta b̄adeku b̄a one Allah Ta'ala mori sab̄ua lab̄o ndai, b̄ara Sia wa'ura mbeina Roh-Na d̄i ndaita.