Al Masih Mabantuna Ndaita
2:1-6
2
Ana-anaku! Nahu tuntiku ake d̄i ru'u b̄a nggomid̄oho loakud̄u nggomid̄oho aina karawimu dosa. Pala nggara warasi ma karawi dosa, ndad̄i ndai wara sab̄ua dou d̄imahoruta, eded̄u Isa Al Masih ma adil ede; Sia d̄imaraho d̄i ru'u b̄a ndai d̄i tando Ama. 2 Kai ncai Isa Al Masih edeku dosa-dosa ndai d̄ikangampu wea, ro laina dosa-dosa ndai mpoa, malaisi dosa samenana manusia rau.3 Nggara ndai to'asi d̄i parenta-parenta Allah Ta'ala, ede tandana b̄a one ndai tapataku Allah Ta'ala. 4 Dou ma nggahi, <<Nahu kapata Allah Ta'ala,>> pala wati to'ana d̄i parenta-parenta-Na, dou ede nacowaku, ro Allah Ta'ala wati wara d̄ei ade dou ede. 5 Pala dou ma to'a d̄i nggahi ro eli Allah Ta'ala, dou ede nameci ro ca'uku Allah Ta'ala kai mpuruna. Edeku tandana b̄a one ndai mori sab̄ua lab̄o Allah Ta'ala. 6 Cou-cou ma nggahi b̄a one sia namori sab̄ua lab̄o Allah Ta'ala, sia pab̄uaku b̄atuna cara mori Al Masih.
Parenta Ma B̄ou
2:7-17
7 Cina ro angi meci ro ca'u b̄a nahu! Ra tunti b̄a nahu ake laina sab̄ua parenta ma b̄ou. Ake parenta ntoira wa'ura karongga d̄i nggomid̄oho ra'aipu nggomid̄oho tampu'u imbimu d̄i Al Masih; eded̄u haba ra d̄i Allah Ta'ala ra wa'u ringa b̄a nggomid̄oho sawatipu b̄a ede. 8 Kone ade ndedekaina, parenta ratunti b̄a nahu ake b̄ou rau; b̄ara poda ro ncihina parenta ede loa d̄i'eda d̄i ade mori Al Masih ro d̄i ade mori nggomid̄oho. B̄a one marindi nanaha mbora ro taroa ma poda nawa'ura tampu'u kalea.
9 Dou ma nggahi b̄a one sia wara d̄i ade taroakaina pala dou ede mbuipu fa'a adena d̄i cina ro angina, dou ede mbuipu wara d̄i ade marindi saraka ake. 10 Cou-cou ma meci ro ca'u cina ro angina, namori d̄i ade taroa ndad̄ina wati wara au-au rau d̄i sia ma kandad̄ina dou makalai mab̄u d̄i ade dosa. 11 Pala dou ma fa'a ade d̄i cina ro angina, nawara d̄i ade marindi. Sia nalampaku d̄i ade marindi, ro wati b̄adena ta b̄e d̄ilaokaina, b̄ara marindi ede makandad̄ina sia wati loana eda.
12 Nahu tuntiku d̄i ru'u b̄a nggomid̄oho, Anad̄oho, b̄a one dosamu wa'ura kangampu wea b̄ara Al Masih. 13 Nahu matunti d̄i ru'u b̄a nggomid̄oho, ma ndad̄i Ama, b̄a one nggomid̄oho mapataku Sia ma wa'ura wara ra'aipu saramba wa'una. Nahu tuntiku d̄i ru'u b̄a nggomid̄oho, Dou-dou sampela, b̄ara nggomid̄oho wa'ura kakoamu Iblis.
14 Nahu tuntiku d̄i ru'u b̄a nggomid̄oho, Anad̄oho, b̄ara nggomid̄oho mapataku Allah Ta'ala, ama ndaita. Nahu tuntiku d̄i ru'u b̄a nggomid̄oho, ama-ama, b̄ara nggomid̄oho mab̄adeku Nggahi ro eli Allah Ta'ala ma wa'ura wara ra'aipu saramba wa'una. Nahu tuntiku d̄i ru'u b̄a nggomid̄oho, Dou-dou sampela, b̄ara nggomid̄oho tenggo. Nggahi Ro Eli Allah Ta'ala wara d̄ei ademu, ro nggomid̄oho wa'ura kakoamu Iblis.
15 Aina meci ro ca'umu dunia ake, atao au-au ma wara d̄i ade dunia ake. Nggara nggomid̄oho mameci ro ca'usi dunia, nggomid̄oho wati d̄imameci ro ca'u Ama. 16 B̄a one samenana ma wara d̄i dunia, eded̄u d̄i ne'e b̄a sarumbu ro d̄ine'e b̄a isi mada ro mori sombo, laina ra maina ta Ama, malaisi ra maina ta dunia. 17 Dunia ro samenana ma wara tad̄eina d̄i ne'e b̄a manusia, wunga mborana. Pala dou ma b̄atu au ra kane'ekai b̄a Allah Ta'ala, namori sampe santoi-ntoina.
Musu Al Masih
2:18-29
18 Ana-anaku, cumpukai jaman nad̄enira! Wa'ura ngoa d̄i nggomid̄oho sawatipu b̄a ede b̄a one Musu Al Masih d̄imamai; ro ake wa'ura mboto wontu dou-dou ma musu Al Masih. Edeku tandana b̄a one cumpukai jaman nad̄enira. 19 Musu-musu Al Masih ede eded̄u dou-dou ma wa'ura tu'u wi'i ndai, b̄ara siad̄oho sapodakaina laina dou-dou ndaita. Nggara podasi siad̄oho dou-dou ndai, tantu siad̄oho ngge'e mpa sama-samana lab̄o ndai. Pala siad̄oho tu'u wi'ina ndai, loakud̄u tadana b̄a one wati kone sab̄ua dou rau ra d̄i siad̄oho ma poda-poda lu'u d̄i kalompo ndaita.
20 Pala nggomid̄oho wa'ura tarimamu Roh Allah rambei b̄a Isa Al Masih ro b̄ara ndedena nggomid̄oho sara'ana patamu ngoa ro tei ma poda ro ma ncihi. 21 Ndad̄i nahu tuntiku ake d̄i nggomid̄oho laina b̄ara nggomid̄oho wati patamu ngoa ro tei ma poda ro ma ncihi, pala bara nggomid̄oho wa'ura pata podamu, ro nggomid̄oho mab̄ade rauku b̄a one wati wara cowa d̄i ade ngoa ro tei ma poda ro ma ncihi ede.
22 Ma nuntu ro nggahi cowa eded̄u dou ma nggahi b̄a one Isa laina Sangaji Mambei salama ra sake b̄a Allah Ta'ala. Dou ede Musu Al Masih; sia wati mangakuna Ama ro Ana. 23 Dou ma wati mangaku Ana, aona wati tarimana Ama rau. Ro dou ma mangaku Ana, aona natarimaku Ama rau.
24 B̄ara ndedena, haba rawa'u ringa b̄a nggomid̄oho ra'aipu saramba-rambana nggomid̄oho imbimu pab̄uapu nggomid̄oho jaga kataho d̄ei ademu. Nggara haba ede jaga katahosi b̄a nggomid̄oho, nggomid̄oho d̄imamori sab̄ua ncau lab̄o Ana ro lab̄o Ama. 25 Ro akeku ra sake b̄a ndai Al Masih d̄i ndaita eded̄u mori masapodakaina ro ma ede ro hid̄i.
26 Nahu tuntiku ake d̄i nggomid̄oho mab̄oha dou-dou ma wunga ngupa ncai d̄itipukaina nggomid̄oho. 27 Pala mab̄oha ndai nggomid̄oho, Al Masih wa'ura mbeina Roh-Na d̄i nggomid̄oho. Ro santoi Roh-Na wara d̄i nggomid̄oho, wati pori warana dou makalai mangoa ro teina nggomid̄oho. B̄ara Roh-Na mangoa ro tei nggomid̄oho mab̄oha samenana au-au; ro au ra ngoa ra tei-Na ede napodaku, laina nuntu ro nggahi cowa. B̄ara ndedena, pab̄uapu nggomid̄oho to'amu d̄i au ra ngoa ro tei b̄a Roh ede, ro pab̄uaku nggomid̄oho ngge'e mpa mori sab̄uamu lab̄o Al Masih.
28 Ndad̄i, ana-anaku, ngge'e mpa mori sab̄uamu lab̄o Al Masih, loakud̄u pea wakatu Sia maina, ndai satando Sia kai disa poda, ro wati cilita weki b̄ara maja. 29 Nggomid̄oho wa'ura b̄ademu b̄a one Al Masih mori b̄atu b̄une ra kane'ekai b̄a Allah Ta'ala. B̄ara ndedena nggomid̄oho pab̄uapu b̄ade raumu b̄a one sanikina dou ma mori b̄atu au ra kane'ekai b̄a Allah Ta'ala eded̄u ana Allah.