Nggahi Ro Eli Allah Ta'ala Ma Mori
1:1-4
1
Isi sura ake mab̄oha Nggahi Ro Eli Allah Ta'ala ma mbei mori, eded̄u Nggahi Ro Eli Allah Ta'ala ma wa'ura wara ra'aipu saramba wa'una. Nami wa'ura ringamu, ro wa'ura eda mada b̄a ndaimu. Nami wa'ura eda madamu ro wa'ura nenti b̄a rima ndai nami. 2 Wakatu katada mori ede, nami edamu. B̄ara ndedena nami mbeimu sakasi mab̄oha ede. Nami ngoa ro kahabamu d̄i nggomid̄oho mab̄oha mori masapodakaina ro ma ede ro hid̄i, ma wara sama-sama lab̄o Ama, ro wa'ura katada d̄i nami. 3 Au ra wa'u eda ro ringa b̄a nami, ede rauku d̄ingoa ro kahaba b̄a nami d̄i nggomid̄oho, loakud̄u nggomid̄oho lab̄o nami b̄atu kananu mori sab̄ua lab̄o Ama ro lab̄o Ana-Na, Isa Al Masih. 4 Nami tuntimu ake loakud̄u ndai poda-poda neo adeta.Allah Ta'ala Eded̄u Taroa
1:5-10
5 Akeku haba rawa'u ringa b̄a nami ra d̄i Ana-Na ro nami makaronggana d̄i nggomid̄oho: Allah Ta'ala eded̄u taroa, ro d̄i Sia wati wara ma rindi. 6 Nggara nggahisi b̄a ndai b̄a one ndai mori sab̄ua lab̄o Sia, kone sapodakaina ndai mori ade rindikaina, ndad̄i ndai ta cowa nataho kai nggahi ro eli atao kai ruku ro rawita. 7 Pala nggara ndai morisi d̄i ade taroa sama b̄une Allah Ta'ala ma wara d̄i ade taroa, ndad̄i ndai mori tenggo, taho d̄i sab̄ua lab̄o makalaina, ro ra'a Isa Al Masih, Ana-Na, ma karasona ndai ra d̄i sara'a dosa.
8 Nggara nggahisi b̄a ndai b̄a one ndai wati dosata, ndad̄i ndai tatipuku weki ndaita; ro Allah Ta'ala wati warana d̄ei ade ndaita. 9 Pala nggara ndai mangakusi dosa-dosa ndai d̄i Allah Ta'ala, Sia d̄imambei au ra sake-Na ro nakarawiku au ma adil. Sia d̄imakangampu wea dosa-dosa ndai ro nakarasoku ndai ra d̄i sara'a ruku ro rawi ndai ma ncara. 10 Pala nggahisi b̄a ndai b̄a one ndai wati dosata, ndai wi'ikaita b̄une-b̄une Allah Ta'ala ma cowa ro ndai wati wi'ita nggahi ro eli Allah Ta'ala d̄ei ade ndaita.