Imbi Nakakoaku Dunia
5:1-5
5
6 Dou ma imbi b̄a one Isa Al Masih eded̄u Sangaji Makasalama ra sake b̄a Allah Ta'ala, dou ede eded̄u ana Allah. Dou ma meci ro ca'u amana, nameci ro ca'u rauku anana. 2 Kai ncai akeku ndai tab̄adeku b̄a one ndai ta meci ro ca'uku ana-ana Allah: Ndai ma meci ro ca'u Allah Ta'ala ro to'a d̄i parenta-parenta-Na. 3 B̄a one, mameci ro ca'u Allah Ta'ala aona nato'a d̄i parenta-parenta-Na. Ro parenta-parenta-Na wati tanina d̄i ru'u b̄a ndaita, 4 b̄a one sanikina ana Allah nawa'uku kakoa dunia ma dab̄ae ake. Ro ndai ta kakoaku dunia kai imbi ndaita. 5 Couku mawa'una kakoa dunia? Dou ma imbi mpa b̄a one Isa Al Masih eded̄u Ana Allah.Mbei Sakasi Mab̄oha Isa Al Masih
5:6-12
6 Isa Al Masih edeku ma mai d̄i dunia kai oi ro kai ra'a madekai-Na. Sia mai laina kai oi mpoa, pala kai oi ro ra'a. Ro ndai Roh Allah ma mbei sakasi b̄a one ede napodaku, b̄ara Roh wati paranana cowa. 7 Wara tolu ma ndad̄i sakasi d̄i saroga:e 8 Roh Allah, oi ro ra'a -- tolu-toluna ede mbeina sakasi ma sama. 9 Ndai ta imbiku sakasi ra mbei b̄a manusia, pala saksi Allah Ta'ala nancewi tenggo wali. Ro edeku sakasi ra wa'u mbei b̄a Allah Ta'ala mab̄oha Ana-Na. 10 B̄ara ndedena, dou ma imbi d̄i Ana Allah, wa'ura tarimana sakasi ede d̄ei adena; pala dou ma wati imbi d̄i Allah Ta'ala, wa'ura wi'ikaina b̄une-b̄une Allah Ta'ala ma cowa, b̄ara sia wati imbina d̄i au ra nggahi b̄a Allah Ta'ala mab̄oha Ana-Na. 11 Akeku sakasi ede: Allah Ta'ala wa'ura mbeina d̄i ndaita mori masapodakaina ro ma ede ro hid̄i, ro ana-Na edeku fu'u mori ede. 12 Dou ma ntau Ana Allah nantau mori, ro dou ma wati ntau Ana Allah, sia wati ntauna mori masapodakaina ro ma ede ro hid̄i ede.
Mori Masapodakaina Ro Ma Ede Ro Hid̄i
5:13-21
13 Nahu matunti d̄i ru'u b̄a nggomid̄oho ma imbi d̄i Ana Allah, loakud̄u nggomid̄oho mab̄adeku b̄a one nggomid̄oho wa'ura ntaumu mori masapodakaina ro ma ede ro hid̄i. 14 Ro ndai disa satando Allah Ta'ala, b̄ara ndai ta imbi podaku b̄a one Sia nambeiku au ra raho b̄a ndai ade do'ata, nggara rahosi b̄a ndai au-au ma ncihi ncao b̄une ra kane'e-Na. 15 Ndai tab̄adeku b̄a one Sia nacambeku do'a ndai nggara ta rahosi d̄i Sia, ndad̄i ndai tab̄ade rauku b̄a one Sia nambeiku d̄i ndai au ra raho b̄a ndai d̄i Sia.
16 Nggara edasi b̄a nggomid̄oho sab̄ua dou d̄i ade weki sasama ela Al Masih ma karawi dosa ma wati kandad̄ina dou ede mbora mori masapodakaina ro ma'ederahid̄i, pab̄uapu nggomid̄oho do'amu d̄i Allah Ta'ala; ro Allah Ta'ala d̄imambei mori masapodakaina ro ma ede ro hid̄i ede d̄i sia. Ake ma wara hubungan lab̄o siad̄oho ma dosa wati kandad̄ina siad̄oho mbora morina ede. Pala wara dosa ma kandad̄ina dou mbora morina ede. Mab̄oha lampa rawi ede nahu wati nggahiku b̄a one nggomid̄oho pab̄uaku do'amu d̄i Allah Ta'ala. 17 Samenana ruku ro rawi ma ncara eded̄u dosa, pala wara dosa ma wati kandad̄ina dou mbora mori masapodakaina ro ma ede ro hid̄i ede.
18 Ndai tab̄adeku b̄a one samenana dou ma wa'ura ndad̄i ana-ana Allah, wati karawina dosa, b̄ara Ana Allah masandakana, ro iblis wati loana karawi au-au d̄i sia.
19 Ndai tab̄adeku b̄a one ndai eded̄u ntau Allah Ta'ala, konena sara'a dunia ake kuasakai b̄a Iblis.
20 Ndai tab̄adeku b̄a one Ana Allah wa'ura maina ro wa'ura mbeina d̄i ndai loa ka'ao, loakud̄u ndai pata Allah Ta'ala ma sapodakaina. Ndai mori kasab̄ua weki lab̄o Allah Ta'ala ro mori sab̄ua lab̄o Ana-Na eded̄u Isa Al Masih. Akeku Allah Ta'ala ma poda, ro akeku mori masapodakaina ro ma ede ro hid̄i.
21 Ana-anaku, kad̄o'opu wekimu ra d̄i berhala-berhala!