Rahi lab̄o wei
3:1-7
3
Ndede rau nggomid̄oho, dou-dou siwe ma wa'ura nika, pab̄uapu to'a d̄i rahimu loakud̄u nggara warasi d̄i ade weki siad̄oho ma wati to'a d̄i nggahi ro eli Allah Ta'ala, ruku ro rawimu naloaku kandad̄i siad̄oho ndad̄i imbi. Ro wati paraluna nggomid̄oho nggahi au-au d̄i siad̄oho, 2 b̄ara siad̄oho na'edaku ruku ro rawimu ma raso ro saleh. 3 Ntikamu aina ntika ta ari mpoana, misakai b̄une kantika honggo atao kanimu sinci ro jima, atao kanimu kani ro lombo ma nggali-nggali co'i. 4 Pala, pab̄uapu ntikamu ede ra maina ra d̄i d̄ei ade mpidamu, nggahi ro elimu ma mapu ro ntika, edeku ma ipi ntau co'i d̄i ntanda b̄a Allah Ta'ala. 5 Kai cara akeku, aipu jaman ma'ulu dou-dou siwe mantau agama ma wi'i weki d̄i Allah Ta'ala makantika weki kai to'a d̄i rahi siad̄oho. 6 Ndede rau la Sara, sia nato'a d̄i la Ibrahim ro ouna sia rumana. Nggomid̄oho ake eded̄u ana-ana la Sara, nggara nggomid̄oho ma kalampasi lampa rawi-lampa rawi ma taho ro wati dahumu d̄i au-au rau.7 Ro nggomid̄oho rau, dou-dou mone ma wa'ura ntau wei, pab̄uapu mori kai loa timba ro lemba d̄i weimu, ro kai kawaramu weki b̄a one siad̄oho eded̄u dou-dou ma mapu ro rome. Karawipu d̄i siad̄oho kai horoma, b̄a one siad̄oho sama-sama lab̄o nggomid̄oho, d̄imatarima bareka mori ma sapodakaina ra mbei b̄a Allah Ta'ala. Kalampapu ake loakud̄u wati wara ma tapana do'amu.
Iu susa ro ncoki b̄ara karawi ma taho
3:8-22
8 Cumpukaina eded̄u: pab̄uapu nggomid̄oho kasab̄ua nggahi ro kasab̄ua kananu. Pab̄uapu nggomid̄oho cua-cua meci ro ca'u angi b̄une sa'e lab̄o ari. Ro pab̄uapu nggomid̄oho cua kasi ade ro cua ka'awa weki. 9 Aina cola cepemu rawi ma'iha kai rawi ma'iha, atao i'a ro ^ba'a kai i'a ro ^ba'a; pala cepekaipu kai rahomu bareka d̄i Allah Ta'ala. B̄a one Allah Ta'ala kad̄alena nggomid̄oho loakud̄u nggomid̄oho tarimamu bareka ra d̄i Sia. 10 D̄i ade Kitab Suci wara ratunti ndake,
<<Dou ma ne'e iu mori
ro mane'e iu ainaina-ainaina ma taho,
pab̄uaku jaga ro sandaka asana loakud̄u wati nuntu ro nggahina lampa rawi-lampa rawi ma dab̄ae
ro wati rentana nggahi ro eli cowa.
11 Sia pab̄uaku kad̄o'ona weki lab̄o lampa rawi ma dab̄ae ro pab̄uaku karawina ma taho;
sia pab̄uaku karawi kapodana ade ^dirakakaina mori ma taho ro sana.
12 B̄a one Ruma naca'u tio dou-dou ma b̄atu au ra kane'ekai-Na,
ro Ruma naringa ro kade'e ncauku do'a-do'a sia^doho;
pala Ruma wati ca'una d̄i dou-dou ma karawi mada^bae.>>
13 Cou ma ne'e karawi madab̄ae d̄i nggomid̄oho, nggara nggomid̄oho maca'usi karawi mataho? 14 Pala nggomid̄oho kone mapab̄ua iu susa ro ncoki b̄ara karawimu lampa rawi-lampa rawi ma taho, nggomid̄oho malabaku! Aina dahu kone d̄i cou-cou rau, ro aina darura ademu. 15 Pala d̄ei ademu, pab̄uapu nggomid̄oho lia ro horomamu Al Masih ma ncihi ncao kai Rumakaina. Ro pab̄uapu nggomid̄oho sadia ncau ^dicambekaimu d̄i sanikina dou ma sod̄i mab̄oha au d̄i ne'emu ma wara d̄i nggomid̄oho. 16 Pala kalampapu ede kai mapu nggahi ro eli ro horoma. Ro pab̄uapu ade mpidamu raso, loakud̄u nggara nggomid̄oho fitinasi b̄a dou b̄ara nggomid̄oho morimu mataho kai ^batumu Al Masih, ndad̄i dou ma fitinamu ^dimamaja. 17 Nancewi tahopu susa ro ncoki b̄ara karawi mataho – nggara ede rakane'ekaisi b̄a Allah Ta'ala – ntewikaisi susa ro ncoki b̄ara karawi ma da^bae. 18 B̄a one ndai Al Masih madenac sakali mpa, d̄i ru'u santoi-ntoina b̄ara dosa manusia – sab̄ua dou ma wati wara ncara, made d̄i ru'u b̄a dou ma ncara. Al Masih karawi ndedekaina loakud̄u Sia naloa d̄anda ro wa'a nggomid̄oho d̄i Allah Ta'ala. Sia rahade sacara sarumbu kasakaina, pala rakamori mbali sacara rohani. 19 D̄i ade ka'ada'an roh, Sia lao ngoa ro kahabana haba ma ramai ra d̄i Allah Ta'ala d̄i roh-roh ra bui: 20 eded̄u roh dou-dou ma wati to'a d̄i Allah Ta'ala aipu jaman la Nuh. D̄i wakatu ede Allah Ta'ala ngenana kai lembo ade santoi la Nuh ndawina lopi. Dou-dou ma wara d̄i lopi mpa – sara'ana wara waru dou – ra kasalama ra d̄i mbere lino ede. 21 Au ma ndad̄i ede eded̄u ibarakai kandeu raso ma kasalamana nggomid̄oho.Kandeu raso ake laina sab̄ua upacara karaso sarumbu ra d̄i samenana ma sampu-sampu, malaisi tanda rahomu d̄i Allah Ta'ala loakud̄u Allah Ta'ala mbeina ade mpida ma raso kai ncai mori mbali Isa Al Masih, 22 ro wa'ura ne'e ese saroga. Ake, Sia nantau kuasa sama-sama lab̄o Allah Ta'ala ro maparenta sara'a mala'eka, ro sara'a makuasa ro sara'a tenggo ro wale.