Isa Al Masih b̄une santika wadu dasa uma
2:1-10
2
B̄ara ndedena, pakipu ra d̄i wekimu samenana ma da^bae; ai walina nuntu ro nggahi cowamu, ro aina coro-coro. Aina hiana ade, ro aina kab̄awa ro katunamu dou makalai. 2 Pab̄uapu nggomid̄oho ndad̄imu b̄une ana dou to'i ma b̄oupu ra nggana b̄a inana, mane'e ncau susu rohani ma raso. Kai ndedena, nggomid̄oho ^dimanaha na'e ro d̄imaraka salama. 3 D̄i ade Kitab Suci wara ratunti ndake, <<Nggomi wa'ura iu b̄a ndaimu b̄a one Ruma nawancuku tahona.>>4 B̄ara ndedena, maipu d̄i Ruma. Sia b̄une santika wadu mori, wadu ra paki b̄a dou b̄ara rawi'ikaina wati wara onena; pala ra kad̄ale b̄a Allah Ta'ala mandad̄i wadu ma ntau co'i. 5 Nggomid̄oho b̄une santika wadu mori. B̄ara ndedena, pab̄uapu nggomid̄oho ngawamu ^dikani ^dikatu'ukai Uma Allah Ta'ala ma rohani. Kai ndedena, nggomid̄oho ndad̄i imam-imam ma mori d̄i ru'u b̄a Allah Ta'ala mpoa mpa. Ro kai ncai Isa Al Masih, nggomid̄oho d̄onggo ro mbeimu d̄i Allah Ta'ala koroba rohani ma ca'u b̄a Allah Ta'ala. 6 B̄a one d̄i ade Kitab Suci wara ratunti ndake,
<<Nahu wa'ura ka^daleku sab̄ua wadu ma ntau co'i,
ra wi'i b̄a Nahu d̄i Sion kai wadu ma ipi penti;
ro dou ma imbi d̄i Sia wati ^dikato'i wea adena.>>
7 Wadu ede na'ipi podaku ntauna co'i d̄i ru'u b̄a nggomid̄oho ma imbi. Pala d̄i ru'u b̄a dou-dou ma wati imbi, na^bohaku b̄a ayat-ayat Kitab Suci ake,
<<Wadu ma wati ra kani b̄a dou-dou mataki tu'u uma ede
palasi mandad̄i wadu ma ipi penti,>>
8 ro
<<Edeku wadu ma kandad̄ina dou satunu,
wadu ma kandad̄ina siad̄oho mbo'o.>>
Siad̄oho satununa b̄ara siad̄oho wati imbina d̄i nggahi ro eli Allah Ta'ala. Ndedeku ra wa'u katantu b̄a Allah Ta'ala mab̄oha siad̄oho.
9 Pala nggomid̄oho eded̄u bangsa ra ka^dale, imam-imam ma karawi wea sangaji, bangsa ma raso, d̄i ru'u b̄a Allah Ta'ala mpoa mpa, ela ndai Allah Ta'ala. Allah Ta'ala ma rakad̄ale nggomid̄oho ro ma ra'ou kalosa nggomid̄oho ra d̄i marindi lu'u ade taroa-Na ma ede ro hi^di, loakud̄u nggomid̄oho ngoa ro kahabamu haba mab̄oha ruku ro rawi-Na ma heba poda. 10 Ntoina nggomid̄oho laina ela Allah Ta'ala, pala ake nggomid̄oho wa'ura ndad̄i ela Allah Ta'ala. Ntoina nggomid̄oho wati kasi ade b̄a Allah Ta'ala, pala ake nggomid̄oho wa'ura rakamu kasi ade Allah Ta'ala.
Ada-ada Allah Ta'ala
2:11-17
11 Cina ro angi meciku! Nggomid̄oho eded̄u dou lai rasa ro dou mamai ngge'e samporo mpa d̄i dunia ake. B̄ara ndedena, nahu maraho poda-poda loakud̄u nggomid̄oho aina ^batumu hawa nawasu manusia ma lewa ao ncau nawa ro sarumbu. 12 Ruku ro rawimu d̄i woha dou ma wati pata Ruma pab̄uapu taho poda, ndad̄ina nggara siad̄oho nafitinasi nggomid̄oho kai dou madab̄ae, siad̄oho pab̄uaku mangakuna ruku ro rawimu ma taho, ndad̄ina siad̄oho naroi ro wadiku Allah Ta'ala wakatu ainaina maikai-Na.
13 Kai ngara Ruma, pab̄uapu nggomid̄oho to'amu d̄i sanikina dou makuasakai manusia: nataho d̄i ru'u b̄a Kaisar ma ndad̄i dou ma nenti kuasa, 14 ro d̄i ru'u b̄a gubernur ra hanta b̄a Kaisar ^dimahukumna dou ma karawi madab̄ae ro ^dimalia ro horoma dou ma karawi mataho. 15 B̄a one akeku d̄i ne'e b̄a Allah Ta'ala eded̄u loakud̄u kai ruku ro rawi-ruku ro rawimu ma taho nggomid̄oho pulamu asa dou ma nuntu ro nggahi ma sampula. 16 Pab̄uapu nggomid̄oho morimu kai dou ma mardeka, pala aina kanimu mardekakai ede ^di^bontokaimu ruku ro rawimu madab̄ae, malaisi moripu kai ada Allah Ta'ala. 17 Kaco'ipu samenana dou, meci ro ca'upu d̄i cina ro angimu masama ela Al Masih. Dahupu d̄i Allah Ta'ala, ro lia ro horomapu Kaisar.
Susa ro ncoki Al Masih mandad̄i conto
2:18-25
18 Cina ro angi ma ndad̄i ada dou, to'apu d̄i rumamu kai lia ro horoma kapodamu; laina d̄i siad̄oho ma taho ade ro makambera mpoa, pala d̄i siad̄oho ma toku ro kasa rau. 19 Allah Ta'ala ^dimabarekana nggomid̄oho, nggara nggomid̄oho b̄ara kawaramu weki d̄i au ra kane'ekai b̄a Allah Ta'ala, kalembopu ademu d̄i ade susa ro ncoki b̄ara au ra karawi b̄a dou ma wati adil d̄i nggomid̄oho. 20 B̄a one auku ncewina nggara nggomid̄oho lembo ademu d̄i ade iumu hukuman ma sapodakaina ^di'iu b̄a nggomid̄oho b̄ara rawi ncaramu? Pala nggara nggomid̄oho malembosi ade d̄i ade iukaimu susa ro ncoki b̄ara karawimu ma ncihi, ndad̄i Allah Ta'ala ^dimabarekana nggomid̄oho. 21 D̄i ru'u b̄a edeku Allah Ta'ala kad̄alena nggomid̄oho.B̄a one ndai Al Masih wa'ura susa ro ncokina d̄i ru'u b̄a nggomid̄oho, ro kai ndedena Sia mbeina d̄i nggomid̄oho sab̄ua conto ma taho, loakud̄u nggomid̄oho ^batumu au ra karawi b̄a Sia. 22 Sia watipu parana karawina dosa, ro wati parana kone sab̄ua dou rau maringana Sia nuntu ro nggahi cowa. 23 Wakatu Sia i'a ro ^ba'a b̄a dou, Sia wati i'a ro ^ba'a cepena. Wakatu Sia susa ro ncokina, Sia wati kadahuna dou; Sia na^donggo mpa parakara-Na d̄i Allah Ta'ala, Hakim ma adil ede. 24 Ndai Al Masih matunduna dosa-dosa ndaita d̄i weki-Na d̄i haju salib, loakud̄u ndai tahori weki ade kuasakai b̄a dosa, ro mori b̄atu au ra kane'ekai b̄a Allah Ta'ala. Suwu-suwu Al Masih edeku ma katahona nggomid̄oho. 25 Ntoina nggomid̄oho b̄une jimba ma santuda, pala ake nggomid̄oho wa'ura wa'a mbali d̄imab̄atu Ma'ompukai jimba ro Sia masandaka mori nggomid̄oho.