Mori Ma ^Bou
4:1-6
4
B̄a one Al Masih wa'ura susa ro ncoki kai sacara sarumbu kasakaina, nggomid̄oho rau pab̄uaku katenggo weki ndaimu b̄une ra iu b̄a Al Masih. B̄a one dou ma susa ro ncoki kai sacara sarumbu kasana, watid̄u karawina dosa. 2 B̄ara ndedena, pab̄uapu nggomid̄oho morimu d̄i dunia ake b̄une ra kane'ekai b̄a Allah Ta'ala, ro laina ra kane'ekai b̄a manusia. 3 Ntoina, nggomid̄oho wa'ura ntoi poda karawimu au ra ca'u karawi b̄a dou-dou ma wati pata Ruma. Mori nggomid̄oho wati tahona. Nggomid̄oho mab̄atuku hawa nawasumu, ca'u mawu, ca'u katu'u ndiha, nono d̄i mawukai ro nembamu berhala ^dini'i podakai b̄a ade. 4 Ake dou ma wati pata Ruma, mbora akana b̄a one nggomid̄oho wati ^batumu b̄une mori siad̄oho, karawi dosa kai wati wara hampana. B̄ara ndedena, siad̄oho kab̄awa ro katunana nggomid̄oho. 5 Pala siad̄oho peade pab̄uaku su'u ro tunduna d̄i Allah Ta'ala ma wa'ura sadia d̄imaparesa ncihi ro ncara dou ma mori ro dou ma made. 6 B̄ara ndedena, ndad̄i Injil wa'ura ngoa ro kahaba rau d̄i dou-dou mamade. Aona loakud̄u siad̄oho, ra wa'u paresa ncihi ro ncarana d̄i ade ka'ada'an sarumbu kasakaina – b̄une sara'a dou d̄iparesa ncihi ro ncarana – loa mori kai sacara rohani, b̄atu b̄une ra kane'ekai b̄a Allah Ta'ala.Mori Ro Woko Ela Al Masih
4:7-11
7 Sara'a au-au ne'era nggori wakatuna, b̄ara ndedena nggomid̄oho pab̄uapu kawara weki ro aina kabare, loakud̄u nggomid̄oho maloaku do'a. 8 Nancewi ese mai b̄a samenana ma wara, nggomid̄oho pab̄uapu poda-poda meci ro ca'umu d̄i sab̄ua lab̄o ma kalaina, b̄a one kai meci ro ca'u nggomid̄oho mangawa rauku cua kangampu angi. 9 Nggomid̄oho pab̄uapu tarimamu sab̄ua lab̄o ma kalaina d̄i cua-cua uma ndaimu, kai wati wetamu. 10 Nggomid̄oho wa'ura cua tarimamu bareka ma cua lai ra mbei b̄a Allah Ta'ala. B̄ara ndedena, kai dou ma kab̄ua kataho au ra mbei b̄a Allah Ta'ala, pab̄uapu nggomid̄oho kanimu tenggo ro wa'u ede d̄i ru'u paralu samakai. 11 Dou ma wa'a haba, pab̄uaku karonggana haba ra d̄i Allah Ta'ala; dou ma karawi wea d̄i ru'u b̄a dou makalai, pab̄uaku karawina kai tenggo ro wale ra d̄i Allah Ta'ala loakud̄u d̄i ade samenana lampa rawi, Allah Ta'ala loa d̄ikad̄ese ro kantasa kai ncai Isa Al Masih. Siaku ma ntau kuasa ro ma patu d̄ikad̄ese ro kantasa ru'u santoi-ntoina. Amin.
Susa Ro Ncoki D̄i Iu B̄a Ela Al Masih
4:12-19
12 Cina ro angi ra meci b̄a nahu! Nggomid̄oho ake mawancu susa ro ncoki iumu b̄ara wunga ^di'uji. Pala aina mbora akamu, b̄une-b̄une wara au-au ma heba poda ma ndad̄i d̄i nggomid̄oho. 13 Pala, pab̄uapu nggomid̄oho iu sana b̄ara ^batumu susa ro ncoki sama-sama lab̄o Al Masih. Ndad̄i peasi nggara d̄ese ro ntasa Al Masih ^dikatada, nggomid̄oho ^dimaneo ade. 14 Nggomid̄oho malabaku nggara nggomid̄oho d̄ikab̄awa ro katunasi b̄ara nggomid̄oho imbi ro ^batumu Al Masih. Ede aona Roh ma d̄ese ro ntasa, eded̄u Roh Allah, wara d̄i nggomid̄oho. 15 Aina kone sab̄ua dou rau ade weki nggomid̄oho masusa ro ncoki b̄ara sia ndad̄ina dou mahade dou, atao mpangana, atao dou dab̄ae, atao b̄ara sia kalu'una weki ade masa'ala dou makalai. 16 Pala nggara nggomid̄oho susa ro ncokimu b̄ara nggomid̄oho ela Al Masih, aina majamu b̄ara lampa rawi ede. Rentapu syuku d̄i Allah Ta'ala, b̄a one nggomid̄oho ma wa'aku ngara Al Masih.
17 Wa'ura raka wakatuna Allah Ta'ala paresana ncihi ro ncara dunia. Ro ela ndai Allah Ta'ala d̄iparesa ulu ncihi ro ncarana. Nggara Allah Ta'ala natampu'u ulusi d̄i ndai, b̄uneku ndad̄ina peade lab̄o dou-dou ma wati imbi d̄i Injil ede? 18 D̄i ade Kitab Suci wara ratunti ndake,
<<Nggara dou-dou ma taho rau wa'ura nggonggi ^dikasalama,
au walipu d̄imandad̄i lab̄o dou-dou madosa ma wati pata Ruma!>>
19 B̄ara ndedena, nggara warasi dou-dou ma susa ro ncoki b̄ara ra kane'ekai b̄a Allah Ta'ala, pab̄uaku dou-dou ede mori kai mataho ro imbikai wekina d̄i Marakandad̄i siad̄oho.Allah Ta'ala d̄imambei ncauna au ra sake-Na.