^Buneku carana kasana wea ade Allah Ta'ala
13:1-19
13
Pab̄uapu nggomid̄oho ngge'e mpa meci ro ca'umu sab̄ua lab̄o ma kalaina kai sasama ela Al Masih. 2 Aina hau ademu tarima ao d̄i umamu dou-dou ma watipu ra pata b̄a nggomid̄oho.B̄a one kai karawimu b̄une ede, parana wara dou, kai wati kawarana weki, wa'ura tarima aona mala'eka d̄i umana. 3 Aina nefamu dou-dou ma wara ade uma bui, b̄une-b̄une nggomid̄oho rau wara d̄i ade uma bui sama-sama lab̄o siad̄oho.Ro dou-dou ra karawi kai sa^bera ne'e b̄a dou ma kalai, pab̄uapu nggomid̄oho kawaramu d̄i siad̄oho b̄une-b̄une nggomid̄oho rau ra karawi b̄a dou b̄une ede.4 Samenana dou pab̄uaku kaco'ina nika ro nekuna, b̄ara ndedena pab̄uaku rahi ro wei to'a sab̄ua lab̄o ma kalaina. Dou ma sampu ro nggele ro dou majina d̄ihukum b̄a Allah Ta'ala.
5 Ai to'ina morimu kuasakai b̄a na'e ade d̄i piti, pala nggomid̄oho pab̄uapu ncihi mpa kai au ra ma wara d̄i nggomid̄oho.B̄ara Allah Ta'ala wa'ura nggahina, <<Nahu wati ^dimaco'o atao d̄imatu'u wi'i nggomi.>> 6 B̄ara ndedena ndai tadisaku nggahi,
<<Ruma eded̄u Mabantuku,
nahu wati dahuku.
Au ^diloa karawi b̄a manusia d̄i nahu?>>
7 Aina nefamu d̄i dou-dou mana'ekaimu marakaronggana au ra nggahi b̄a Allah Ta'ala d̄i nggomid̄oho.Tio kab̄aepu b̄uneku siad̄oho morina ro b̄uneku siad̄oho madena, ro ^batupu imbi siad̄oho. 8 Isa Al Masih ngge'e mpa samana, nataho ntoina, ake, ro sampe santoi-ntoina. 9 Aina kade'emu d̄i samenana pahu ngoa ro tei malai-lai pahu makasantuda nggomid̄oho.Ade ndai pab̄uaku ^dikatenggokai b̄a taho ade Allah Ta'ala, edeku ma taho; laina atoran-atoran mab̄oha ngaha ro nono. Dou-dou ma ntoina ma to'a d̄i atoran-atoran ede wati rakana onena.
10 Ndai wara ntauta sab̄ua mezba d̄i ru'u d̄onggo ro mbeikai koroba d̄i Allah Ta'ala. Ro imam-imam ma karawi d̄i ade Kema Ruma, wati ntauna hak ngaha koroba ma wara ese wawo mezba ede. 11 Ra'a binata ra d̄onggo ro mbei mandad̄i koroba ^dikangampukai dosa, d̄i wa'a b̄a imam agung ta d̄ei ^Bili Mawancu Raso, pala sarumbu binata ede d̄i ka'a ari mai b̄a kema. 12 B̄ara ndede rauna Isa Al Masih madena ari mai b̄a ta^da ncai na'e kota ^dikarasokai ela-Na ra d̄i dosa kai ra'a ndai-Na. 13 B̄ara ndedena, maira ndai talaoku d̄i Sia ari mai b̄a hid̄i kemakai ro d̄ikab̄awa ro ^dikatuna rau sama-sama lab̄o Sia. 14 B̄a one d̄i dunia wati wara hid̄i d̄i ngge'ekai ma ede ro hid̄i d̄i ru'u b̄a ndaita; ndai tangupaku hid̄i ^dingge'ekai d̄imamai kento. 15 B̄ara ndedena, kai ncai Isa Al Masih, pab̄uaku ndai roi ro wadi ncau-ncau Allah Ta'ala; ede tandana koroba syuku ndai d̄i ru'u b̄a Sia, ra d̄onggo ro mbei b̄a ndai kai renta b̄a wiwi d̄ikad̄ese ro kantasakai ngara-Na. 16 Aina nefa karawi mataho ro cua bantu angi, b̄ara akeku koroba-koroba ma kasana wea ade Allah Ta'ala.
17 ^Batupu parenta dou-dou mana'ekaimu, ro to'apu d̄i siad̄oho.B̄ara siad̄oho natio kab̄ae ncauku sarumbu ro nawamu, ro siad̄oho pab̄uaku su'u ro tunduna d̄i Allah Ta'ala. Nggara nggomid̄oho mato'asi d̄i siad̄oho, siad̄oho naloa karawi kai sana ade; nggara watisi, ndad̄i siad̄oho d̄imakarawi kai ncoki ade, ro ede wati kamaina ma taho d̄i ru'u b̄a nggomid̄oho.
18 Do'a ncau-ncaupu d̄i ru'u b̄a nami. Nami ma'imbi podaku ade mpida nami naraso, b̄a one ade samenana lampa rawi nami mane'e ncau karawi au ma ncihi. 19 Nahu maraho poda-poda, loakud̄u nggomid̄oho do'a weamu d̄i ru'u b̄a nahu loakud̄u Allah Ta'ala wa'a rocina nahu lao mbali d̄i nggomid̄oho.
Do'a ^bontokai
13:20-21
20 Allah Ta'ala wa'ura kamori mbalina Ruma ndaita, Isa Al Masih ra d̄i madekaina. B̄ara made-Na ede Sia ake ndad̄i Ma'ompukai Ma ^Dese Ro Ntasa d̄i ru'u b̄a ndaita, ndai eded̄u jimba-jimba-Na. Made-Na ede rau makasahana au ra sake ma ede ro hid̄i ra ndawi b̄a Allah Ta'ala lab̄o ndai. 21 Raho-raho to'i mpa Allah Ta'ala fu'u b̄a taho ro ntai ede kancihina nggomid̄oho kai samenana ma taho d̄iparalu b̄a nggomid̄oho ^dikalampakaimu au ra kane'ekai-Na. Raho-raho to'i mpa kai ncai Isa Al Masih, Allah Ta'ala karawina d̄i ndaita, au ra kane'ekai-Na. Pab̄uaku Al Masih d̄iroi ro wadi santoi-ntoina! Amin.
^Bontokai sura
13:22-25
22 Nahu ma raho loakud̄u nggomid̄oho tio ka^baemu au-au ra ngoa ro tei b̄a nahu ake kai lembo ade, b̄a one sura nahu ake wati ipi ^dondona. 23 Pab̄uapu nggomid̄oho b̄ademu b̄a one cina ndaita la Timotius wa'ura kalosa ra d̄i uma bui. Nggara sia nawa'usi ramai d̄i hid̄i nahu ake, nahu d̄imawa'a sia wakatu nahu mai lambaku nggomid̄oho.
24 Karonggapu salam nami d̄i samenana dou mana'ekaimu ro d̄i samenana ela Allah Ta'ala. Tarima raupu salam cina ro angi ma sama imbi lab̄o ndai d̄i Italia.
25 Raho-raho to'i mpa Ruma barekana nggomid̄oho sara'ana.